ملاحظات

اخبار میں مولانا میرٹھی کا ایک مراسلہ شائع ہوا ہے۔ اس کا عنوان ہے ’’ رشدی کا شیطانی ناول‘‘اس مراسلہ کا ایک حصہ یہ ہے

’’بدنام زمانہ رشدی کا شیطانی ناول آج کل مذہبی دائروں سے نکل کر سیاسی حلقوں میں بھی بحث و مباحثہ اور ہنگاموں کا مرکز بنا ہوا ہے۔ جہاں تک اسلامی نقطہ نظرکا تعلق ہے، مسلمان حضرت رسول اکرم صلی اللہ علیہ وسلم کو کائنات کی بہترین شخصیت مانتے ہیں۔ وہ ہر بات برداشت کرسکتے ہیں ، مگر حضور کی توہین اور آپ کی شان میں گستاخی کو برداشت نہیں کر سکتے۔ اس سلسلہ میں علامہ خمینی کا اقدام قابل تعریف ہے۔ اور حضرت مولانا علی میاں کا بیان صداقت و حقیقت کا آئینہ دار ہے۔‘‘(قومي آزادی27فروری1989)

موجودہ زمانہ کے مسلمانوں میں یہ مظہر پوری طرح دیکھا جاسکتا ہے۔ ان کے اندر رسول اللہ صلی اللہ علیہ وسلم کے اسوۂ حسنہ کو اختیار کرنے کا جذبہ تو بالکل مفقود ہے۔ حقیقی اتباع رسول سے ان کے اکابر بھی خالی ہیں اور ان کے اصاغر بھی۔ البتہ آپ شہنشاہ ِ کونین ، سرور کائنات اور فخرِ موجودات کہہ کر اس پر فخر کرنے کا جذبہ اتنا زیادہ بڑھا ہوا ہے کہ اس کی خاطر وہ ساری دنیا میں دھوم مچانے کے لیے ہمہ وقت تیار رہتے ہیں۔

موجودہ مسلمانوں کے اسی مزاج کا نتیجہ ہے کہ خدا کے بارے میں خواہ کتنی ہی زیادہ مخالفانہ باتیں کہی جائیں ، انہیں اس پر کبھی جوش نہیں آتا، اور نہ اس پر ان کے جذبات بھڑکتے ۔ لیکن اگر ان کے پیغمبر کے بارے میں کوئی شخص گستاخی کا ایک کلمہ بول دے تو فوراً بھڑک کر لڑنے مرنے کے لیے تیار ہو جاتے ہیں۔

پاکستان کے قدرت اللہ شہاب صاحب نے مسلمانوں کی نفسیات کو دو واقعے کی شکل میں بہت خوبی کے ساتھ بیان کیا ہے۔ یہ دونوں واقعات ان کی ابتدائی طالب علمی کے زمانہ سے تعلق رکھتے ہیں۔ اس کو ہم ان کی کتاب سے یہاں نقل کر تے ہیں

محمد نہ ہوتے تو دنیا نہ ہو تی

یہ مصرعہ سن کر میرا ہندو دوست زور زور سے ہنسنے لگا۔ اور اس نے اسم محمد صلی اللہ علیہ وسلم کی شان میں کچھ گستاخیاں بھی کیں۔ میں نے آؤ دیکھا نہ تاؤ، لپک کر ایک پتھر اٹھایا ، اور اسے گھما کر ہندو لڑکے کے منہ پر ایسے زورسے دے مارا کہ اس کا سامنے کا آدھا دانت ٹوٹ گیا۔

لاشعوری کی وہ کون سی لہر تھی جو اللہ کے ساتھ مذاق پر تو خاموش رہتی تھی لیکن رسول اللہ صلی اللہ علیہ وسلم کے ساتھ گستاخی پر آناً فاناً جوش میں آگئی تھی؟۔

خدا کے بارے میںغیر حساس ہونا اور خدا کے پیغمبر کے بارے میںحساس ہونا بلاشبہ گمراہی ہے۔ اس کا ہدایت سے کو ئی تعلق نہیں۔ جو لوگ اس قسم کی خوش عقیدگی میں جی رہے ہیں، وہ قیامت کا انتظار کریں۔ اس وقت انہیں معلوم ہو جائے گا کہ یہ ایک نیا دین تھا جو انھوں نے خوداپنی طرف سے گھڑ رکھا تھا، خدا کے بھیجے ہو ئے دین سے اس کا کوئی تعلق نہ تھا۔

اصل یہ ہے کہ ایک اسلام کا دین ہے، دوسرا ہیرو پرستی کا دین۔ آدمی اگر صحیح معنوں میں اسلام کے دین پر ہو تو اس کے اندر خدا اور رسول دونوں کے ساتھ یکساںدرجہ میں تعلق ابھرے گا۔ وہ خدا پر ایمان سے بھی سرشار ہو گا اور رسول صلی اللہ علیہ وسلم پر ایمان سے بھی۔

مگر موجودہ زمانہ کے مسلمانوں کا دین اسلام نہیں ہے بلکہ ہیرو پرستی ہے۔ انھوں نے خدا کو اپنا خدا نہیں بنایا۔ البتہ پیغمبر کو انھوں نے اپنا ہیرو بنالیا ہے۔ پیغمبر ان کا ہیرو ہے ، نہ کہ حقیقی معنوں میں خدا کا رسول ۔ یہی وجہ ہے کہ خدا کی تو ہین کی جائے تو غیرجانبداربنے رہتے ہیں۔ اور اگر کوئی شخص رسول کے بارے میں تو ہین کا کلمہ بولے تو فوراًبھڑک اٹھتے ہیں۔