دعوت کا رد عمل

آپ نے اپنی دعوتی مہم کا آغاز کیا، تو وہ سارے واقعات پیش آنے شروع ہوئے جو کسی معاشرہ میں نئي آواز بلند ہونے کی صورت میں پیش آتے ہیں ۔ کچھ لوگ حیران تھے کہ یہ کیا چیز ہے۔ عبد بن حمید نےاپنی مسند میں نقل کیاہے کہ قریش کے سرداروں نے ایک بار عتبہ بن ربیعہ کو اپنا نمائندہ بنا کر آپ کے پاس بھیجا۔ اس نے آپ کی تردید میں ایک لمبی تقریر کی، جب وہ کہہ چکا تو آپ نے کہا فَرَغْتَ، اس نے کہا ہاں۔ آپ نے بسم اللہ الرحمٰن الرحیم کہا اور حم سجدہ کی ابتدائی 13آیتیں پڑھ کر اسے سنائیں ۔ عتبہ نے سن کر کہا بس بس، اس کے سوا اور کچھ تمہارے پاس نہیں (حَسْبُك حَسْبُك، مَا عِنْدَك غَيْرُ هَذَا؟)آپ نے فرمایا نہیں ۔ اس کے بعد روایت کے الفاظ حسب ذیل ہیں

فَرَجَعَ إِلَى قُرَيْشٍ، فَقَالُوامَا وَرَاءَك؟ قَالَمَا تَرَكْتُ شَيْئًا أَرَى أَنَّكُمْ تُكَلِّمُونَهُ بِهِ إِلَّا كَلَّمْتُهُ، قَالُواهَلْ أَجَابَك؟ قَالَنَعَمْ، وَالَّذِي نَصَبَهَا بَنِيَّةً، مَا فَهِمْتُ شَيْئًا مِمَّا قَالَ غَيْرَ أَنَّهُ قَالَأَنْذَرْتُكُمْ صَاعِقَةً مِثْلَ صَاعِقَةِ عَادٍ وَثَمُودَ ، قَالُواوَيْلَك يُكَلِّمُك رَجُلٌ بِالْعَرَبِيَّةِ لَا تَدْرِي مَا قَالَ، قَالَلَا، وَاللهِ مَا فَهِمْتُ شَيْئًا مِمَّا قَالَ غَيْرَ ذِكْرِ الصَّاعِقَةِ (مسند ابویعلی، حدیث نمبر 1818)۔ يعني، پھر عتبہ قریش کے پاس آیا۔ انہوں نے پوچھا کیاہوا۔ عتبہ نے جواب دیا، تم لوگ جو کچھ کہتے وہ سب میں نے کہہ ڈالا۔ انہوں نے پوچھا پھر کیا کوئی جواب دیا۔ عتبہ نے کہا ہاں۔ پھر بولا خدا کی قسم اس نے جو دلیل دی، اس سے میں کچھ نہیں سمجھا، سوا اس کے کہ تم کو عا د و ثمود جیسے کڑکے سے ڈرایا ہے۔ قریش نے کہا تمہارا برا ہو ایک شخص تم سے عربی میں بات کر رہاہے اور تم نہیں سمجھتے کہ اس نے کیا کہا۔ عتبہ نے کہا خدا کی قسم اس نے جو کچھ کہا اس سے میں کڑکے کے سوا کچھ نہیں سمجھا۔

کچھ لوگ جو مذہب کے ایک خاص روایتی ڈھانچے سے مانوس ہو چکےتھے، انہیں آپ کی دعوت میں اسلاف کی تحقیر کی بو نظر آئی۔ ابونعیم نے دلائل النبوۃ میں نیز نسائی او ر بغوی وغیرہ نے نقل کیاہے کہ حضرت ضماد مکہ آئے تاکہ عمرہ کریں۔ ایک روز وہ ایک مجلس میں بیٹھ گئے جس میں ابو جہل، عتبہ بن ربیعہ اور امیہ بن خلف تھے۔ ابو جہل نے کہا

هَذَا الرَّجُلُ الَّذِي فَرَّقَ جَمَاعَتَنَا وَسَفَّهَ أَحْلَامَنَا وَأَضَلَّ مَنْ مَاتَ مِنَّا وَعَابَ آلِهَتَنَا فَقَالَ أُمَيَّةُالرَّجُلُ مَجْنُونٌ غَيْرَ شَکٍّ (دلائل النبوۃ لابی نعیم، حدیث نمبر 187)۔ يعني،اس شخص نے ہماری جماعت میں اختلاف ڈال دیا۔ ہم سب کو بیوقوف بتایا۔ ہمارے اسلاف کو گمراہ قرار دیا۔ ہمارے معبودوں کو برا بھلا کہا۔ امیہ بولا اس آدمی کے پاگل ہونے میں کوئی شک نہیں۔

يا عمرو بن مرة أمر الله عيشك أتأمرنا برفض آلهتنا وأن نفرق جمعنا وأن نخالف دين آبائنا الشيم العلى إلى ما يدعونا إليه هذا القرشي من أهل تهامة لا حبا ولا كرامة(اے عمر و بن مرہ ! خدا تیری زندگی تلخ کردے کیا تو ہم کو ہمارے معبودوں کوچھوڑنے کا حکم دیتا ہے اور یہ کہ ہم اپنی جمعیت کو منتشر کردیں، اوراپنے باپ دادا کے دین کی مخالفت کریں جو اخلاق عالیہ کے مالک تھے۔ یہ تہامہ کا رہنے والا قریشی ہمیں کس چیز کی طرف بلاتا ہے اس میں نہ کوئی شرافت ہے نہ کرامت )۔

وہ ہمارے گزرے ہوئے اسلاف کو احمق ثابت کرنا چاہتا ہے اور جس کا ایسا ارادہ ہو وہ کبھی فلاح نہیں پاسکتا (تاریخ دمشق لابن عساکر، جلد46، صفحہ345)۔

کچھ لوگوں کے لیے حسد مانع ہو گیا۔ کیوں کہ آپ اپنی پیغمبری کا اعلان کررہے تھے۔ دوسرے لفظوں میں یہ کہ میرے پاس حقیقت کا علم ہے اور انسان کے لیے ہمیشہ یہ مشکل ترین امر رہا ہے کہ وہ کسی کے بارے میں یہ اعتراف کرے کہ خدا نے اس کو حقیقت کا وہ علم دیا ہے جو خود اسے نہ مل سکا۔ بیہقی نے مغیرہ بن شعبہ سے نقل کیا ہے کہ ابو جہل بن ہشام نے ایک روز ان سے علیحٰدگی میں کہا

وَاللهِ إِنِّي لَأَعْلَمُ أَن مَا يَقُول حق، وَلَكِن [يمنعنى] شئ، إِنَّ بَنِي قُصَيٍّ. قَالُوافِينَا الْحِجَابَةُ.فَقُلْنَانَعَمْ.ثُمَّ قَالُوا فِينَا السِّقَايَةُ فَقُلْنَانَعَمْ.ثُمَّ قَالُوا فِينَا النَّدْوَةُ. فَقُلْنَا نَعَمْ. ثُمَّ قَالُوافِينَا اللِّوَاءُ.فَقُلْنَانَعَمْ... قَالُوامِنَّا نَبِيٌّ! وَاللهِ لَا أَفْعَلُ (السيرة النبوية لابن كثير، جلد1، صفحہ 507)۔ يعني،خدا کی قسم میں خوب جانتاہوں کہ جو کچھ یہ کہتے ہیں ، حق ہے مگر مجھے ایمان لانے میں ایک چیز مانع ہے۔ بنی قصی نے کہا کہ کعبہ کی دربانی ہماری ہے۔ ہم نے کہا ہاں۔ پھر بنی قصی نے کہا حاجیوں کو پانی پلانے کا کام ہمارا ہے۔ ہم نے کہاہاں۔ پھر بني قصی نے کہا کہ دارالندوہ میں ہمارا حق ہے، ہم نے کہا ہاں۔ پھر انہوں نے کہا جنگ میں جھنڈا اٹھانا ہماری ذمہ داری ہے۔ ہم نے کہا ہاں۔ اب وہ کہتے ہیں کہ نبوت ہمارے اندر ہے۔ پس خدا کی قسم میں ہر گز اس کو نہیں مانوں گا۔

کچھ لوگ آپ کے اس لیے مخالف ہوگئے کہ آپ کی دعوت کو مان لینے میں انہیں اپنا اقتصادی خطرہ نظر آتاتھا۔ اسلام سے قبل خانہ کعبہ ایک بہت بڑ ا بت خانہ تھا جس میں تمام مذاہب کے بت رکھے ہوئے تھے حتٰی کہ اس میں مسیح اور مریم کی بھی تصویر یں تھیں۔ اس طرح کعبہ تمام مذاہب کے لوگوں کی زیارت گاہ بن گیاتھا۔ چارحرام مہینوں کی غرض بھی یہی تھی۔ کیوں کہ اس زمانے میں تمام مذاہب کے لوگ مکہ آتے رہتے تھے۔ اگربتوں کو خانہ کعبہ سے ہٹا دیاجاتا تو کوئی شخص کعبہ کی زیارت کے لیے نہ آتا اور مکہ کا بازار جو چار مہینوں تک لگا رہتا تھا، بند ہوجاتا۔ اس لیے مکہ کے باشندے آپ کی دعوت کو اپنے لیے خطرہ محسوس کرتے تھے۔ ان کاخیال تھا کہ اگر توحید کا دین فروغ پاگیا تو یہ غیر ذی زرع علاقہ بالکل تباہ ہوجائے گا نیز کعبہ کی تولیت نے قریش کو مختلف قبائل میں سرداری کا مقام دے رکھا تھا۔ ایک مورخ لکھتے ہیں :

کانت اموالھا وتجارتھا تسافرفی الشرق والغرب فی ظلال معاہدات تجاریۃ بینھا و بین اہم و ثنیۃ مثلھا کفارس وامم مسیحیۃ کا لجشۃ و کمثل بیز نطۃ وکانت قریش تتصوران تاییدھا لرسالۃ محمد انمایعنی شیئا واحد اھون ان تتحلل الامم المجاورۃ لھابل و قبائل العرب نفسھا المقیمۃ علی الوثنیۃ من تعھد اتھا بحمایۃ تجارۃ قدیش وقوافلھا واذا حدث ذلک فھذ ایعنی موت قریش تجاریا واقتصاد یا وانتھاء عصر سیادتھا علی العرب۔ یعنی، قریش کے اموال اور ان کی تجارتیں مشرق و مغرب میں سفر کرتی تھیں۔ یہ سفر تجارتی معاہدوں کے تحت ہوتا تھا جو انہوں نے دوسری قوموں سے کر رکھا تھا۔ مثلاً فارس، حبشہ اور بازنطینی سلطنت۔ قریش کا خیال تھا کہ اگر انہوں نے رسالت محمدی کی تائید کی تو اس کا مطلب صرف ایک ہوگا، وہ یہ کہ پڑوسی قومیں او ر عرب کے بت پرست قبائل معاہدات ختم کردیں گے جو انہوں نے قریش کے تجارتی قافلوں کے بارے میں کر رکھے ہیں اور جب ایساہو گا تو یہ قریش کی تجارتی موت کے ہم معنی ہوگا اور عرب پر ان کی قیادت ختم ہو جائے گی۔

چنانچہ سورہ واقعہ (56:82)کی آیت ’’وَتَجْعَلُوْنَ رِزْقَکُمْ اِنْکُمْ تُکَذِّبُوْنَ‘‘کی ایک تفسیر یہ کی گئی ہے کہ تم تکذیب کواپنی غذا بنا رہے ہو۔ یعنی یہ سمجھ رہے ہو کہ پیغمبر اسلام کی دعوت توحید کا انکار کر کے تم اپنی اقتصادیات اور اموال کو محفوظ رکھ سکو گے۔

آپ کی دعوت کے نتیجہ میں آپ کا وجود ایک سو الیہ نشان بن گیاتھا۔ دیکھنے والا دوسرے شخص سے پوچھتا کیا یہی وہ ہیں (أَهُوَ هُوَ)مسند ابویعلی الموصلی، حدیث نمبر 6830۔

وَيَمْشِي بَيْنَ رِجَالِهِمْ، وَهُمْ يُشِيرُونَ إِلَيْهِ بِالْأَصَابِعِ (مسنداحمد، حدیث نمبر 14456)۔ یعنی، آپ قافلوں کے درمیان چلتے تو لوگ انگلیوں سے آپ کی طرف اشارہ کرتے۔

اب کوئی مکہ آتا تو واپس جاکر اپنے ساتھی کو دوسری باتوں کے ساتھ یہ خبر بھی دیتا کہ مُحَمَّدُ بْنُ عبد الله تَنَبَّأَ، وَقَدْ تَبِعَهُ ابْنُ أَبِي قُحَافَةَ(دلائل النبوۃ للبیہقی، صفحہ 28)۔ یعنی، محمد بن عبد اللہ نے نبوت کا دعویٰ کیا ہے اور ابن ابی قحافہ ان کا ساتھ دے رہے ہیں۔ قریش نے آپ کا نام محمد کے بجائے مذممّ رکھ دیا (صحیح البخاری، حدیث نمبر 3533)۔ وہ آپ پر اپنے آباء و اجداد کو احمق قراردینے کا الزام لگاتے(مسند احمد، حدیث نمبر7036)۔ آپ کے راستہ میں رات کے وقت گندی چیزیں ڈال دیتے۔ ایک بار آپ نے ان کو دیکھ کر فرمایا يَا بَنِي عَبْدِ مَنَافٍ، أَيُّ جِوَارٍ هَذَا ( سیرت ابن ہشام،جلد1، صفحہ416)۔یعنی، اے قریش کے لوگو!یہ کیسا پڑوس ہے۔

ابو طالب کی زندگی تک وہ آپ کے خلاف کوئی جار حانہ کا رروائی کرنے کی ہمت نہ کرسکے۔ کیونکہ قبائلی نظام کے تحت آپ سے جنگ کرنا پورے قبیلۂ بنی ہاشم سے جنگ کرنے کے ہم معنی تھا۔ عمر بن الخطاب جب اسلام سے پہلے ایک بار تلوار لے کر آپ کے قتل کے ارادے سے نکلے توایک شخص کا یہ جملہ عمر کے غصہ کو ٹھنڈا کر نے کے لیے کافی تھا وَكَيْفَ تَأْمَنُ مِنْ بَنِي هَاشِمٍ وَبَنِي زُهْرَةَ وَقَدْ قَتَلْتَ مُحَمَّدًا؟(دلائل النبوۃ للبیہقی، جلد2، صفحہ219)۔ یعنی، بنو ہاشم اوربنو زہرہ سے کیسے بچ پاؤگے، جب تم محمد کو قتل کر دوگے۔ جب بھی کوئی شخص آپ کے خلاف جارحانہ ارادہ کرتا تو فوراً یہ سوال اس کے سامنے آجاتا۔ یہی وجہ ہے کہ مکہ میں جو جارحانہ مظالم ہوئے وہ زیادہ تر غلاموں اور لونڈیوں کے خلاف ہوئے۔ امام احمد اور ابن ماجہ نے حضرت عبداللہ ابن مسعود سے نقل کیا ہے کہ ابتدائی دور میں سات افراد نے مکہ میں اسلام کا اعلان کیا رسول اللہ صلی اللہ علیہ وسلم، ابوبکر،عمار، سعید،صہیب، بلال اور مقداد

فَأَمَّا رَسُولُ اللهِ صَلَّى اللهِ عَلَيْهِ وَسَلَّمَ فَمَنَعَهُ اللهُ بِعَمِّهِ أَبِي طَالِبٍ، وَأَمَّا أَبُو بَكْرٍ فَمَنَعَهُ اللهُ بِقَوْمِهِ، وَأَمَّا سَائِرُهُمْ فَأَخَذَهُمُ الْمُشْرِكُونَ، وَأَلْبَسُوهُمْ أَدْرَاعَ الْحَدِيدِ، وَصَهَرُوهُمْ فِي الشَّمْسِ (سنن ابن ماجہ، حدیث نمبر150؛مسند احمد، حدیث نمبر 3832 )۔ یعنی، رسول اللہ صلی اللہ علیہ وسلم کو اللہ نے ان کے چچا کے ذریعہ محفوظ رکھا۔ حضرت ابوبکر کی حفاظت ان کی قوم کے ذریعہ کرائی۔ بقیہ مسلمانوں کو مشرکین نے پکڑا۔ ان کو لو ہے کی زر ہیں پہنائیں اور سخت دھوپ میں  انہیں تپایا۔

اما م بیہقی نے حضرت عبد اللہ بن جعفر سے روایت کیا ہے کہ جب بنی ہاشم کے سردار ابوطالب کی وفات ہوگئی تو قریش کےکسی بد تمیز شخص نے آپ کے اوپر مٹی ڈال دی۔ آپ گھر واپس آئے تو آپ کی ایک لڑکی نے مٹی جھاڑی۔ اس وقت آپ نے فرمایا مجھے قریش سے اب تک کسی مکر وہ چیز کا سابقہ نہیں پڑاتھا۔ ابو طالب کی وفات ہو گئی تو انہوں نے اس قسم کی حرکتیں شروع کردیں۔ حضرت ابوہریرہ کی ایک روایت میں ہے

لَمَّا مَاتَ أَبُو طَالِبٍ تَجَهَّمُوا بِالنَّبِيِّ صَلَّى اللهُ عَلَيْهِ وَسَلَّمَ فَقَالَيَا عَمِّ مَا أَسْرَعَ مَا وَجَدْتُ فَقْدَك(حلیۃ الاولیاء، جلد 8، صفحہ308)۔یعنی، ابو طالب کی وفات ہو گئی تو قریش مکہ نے آپ کے ساتھ نہایت سختی کا برتاؤ کیا،آپ نے فرمایا چچا، آپ کے نہ ہونے کا احساس مجھے کتنی جلد ہو گیا۔

تین سال تک یہی سلسلہ جاری رہا، اس وقت یہ حال تھا کہ آپ گھر سے باہرنکلتے تو دیوانوں کی طرح آپ کا استقبال کیا جاتا۔ ایک روز ابو جہل کی تحریک سے ایک جماعت آپ کو گالیاں دے رہی تھی اور آپ کو برا بھلاکہہ رہی تھی کہ ایک شخص ادھر سے گزرا۔ مکہ کے ایک معزز شخص کے خلاف یہ سلوک اس کو نا قابل بر داشت معلوم ہوا۔ وہ آپ کے چچا حمزہ کے یہاں گیا ’’آپ کی غیرت کو کیاہوا‘‘ اس نے کہا ’’لوگ آپ کے بھتیجے کو ذلیل کر رہے ہیں اور آپ ان کی مدد نہیں کرتے ‘‘ حمزہ بن عبد المطلب کی عرب غیرت جوش میں  آئی، اسی وقت ابو جہل کے یہاں پہنچے اور اپنی لو ہے کی کمان اس کے سرپرد ے ماری اور کہا کہ ’’آج سے میں بھی محمد کا دین قبول کر تاہوں ، تم کو جو کرنا ہو کر و‘‘ (دِينِي دِينُ مُحَمَّدٍ، أَشْهَدُ أَنَّهُ رَسُولُ اللهِ، فَوَاللهِ لَا أَنْثَنِي عَنْ ذَلِك، فَامْنَعُونِي مَنْ ذَلِك إِنْ كُنْتُمْ صَادِقِينَ ) المعجم الکبیر للطبرانی، حدیث نمبر 2926۔

حمزہ عرب کے مشہور پہلوان تھے۔ اب کچھ لوگوں کو حوصلہ ہوا اور مسلمانوں کی تعداد 30 تک پہنچ گئی۔ اس وقت مکہ میں دو انتہائی با اثر افراد تھے۔ ایک عمر بن الخطاب، دوسرے ابو جہل بن ہشام۔ آپ نے دعا فرمائی کہ خدایا، ان میں سے کسی ایک کے ذریعہ اسلام کو طاقت پہنچا (اللهُمَّ أَعِزَّ الْإِسْلَامَ بِعُمَرَ بْنِ الْخَطَّابِ أَوْ بِأَبِي جَهْلِ بْنِ هِشَامٍ) المعجم الکبیر للطبرانی، حدیث نمبر 10314۔ آپ کی یہ پکا ر اول الذکر کےحق میں قبول ہوئی۔ نبوت کےچھٹے سال حضرت عمر کا اسلا م بہت سے دوسرے لوگوں کو اسلام کی طرف لانے کا سبب بنا اور اب مسلمانوں کی تعداد چالیس ہوگئی۔ یہی وہ زمانہ ہے جب کہ مسلمان ابن ارقم کے مکان میں اپنا پوشیدہ مرکز بنائے ہوئے تھے۔ مستدرک الحاکم میں دار ارقم میں جمع ہونے والے مسلمانوں کی تعداد 39بتائی گئی ہے(مستدرک الحاکم، حدیث نمبر 6130)۔

مگر جو لوگ مروجہ نظام کے زیر سایہ عمل کر رہے ہوں، ان کی طاقت ہمیشہ زیادہ ہوتی ہے۔ چنانچہ ایک عارضی وقفہ کے بعد مظالم کا سلسلہ پھر شروع ہوگیا۔ آپ کو ہر قسم کی تکلیف دینے کے باوجود وہ آپ کو قتل نہ کرسکتے تھے۔ کیونکہ قبائلی رواج کے مطابق کسی قبیلہ کے ایک فرد کو قتل کر نا پور ے قبیلہ سے جنگ کرنے کےہم معنی تھا۔ یہی مسئلہ تھا جس کی بنا پر حضرت شعیب کی قوم نے ان سے کہا کہ اگر تمہارے قبیلہ کا خوف نہ ہوتا تو ہم تمہیں پتھر مارمار کر ہلاک کر دیتے (ھو د، 11:91)۔

قریش نے بنی ہاشم کے سردار اور آپ کے چچا ابو طالب بن عبد ا لمطلب سے مطالبہ کیا کہ وہ آپ کو قبیلہ سے خارج کردیں تاکہ قریش کے لیے آپ کو قتل کرنا ممکن ہوجائے۔ مگر ابوطالب کی غیرت اس کے لیے تیار نہ ہوئی۔ ایک بار قریش کی شکایت پر جب ابو طالب نے آپ سےکہا کہ تم ان کے بتوں پر تنقید کرناچھوڑ دو تو آپ کو اندیشہ ہوا کہ وہ آپ کو قریش کے حوالے کردیں گے (أَنَّهُ قَدْ بَدَا لِعَمِّهِ فِيهِ بَدَاءٌ أَنَّهُ خَاذِلُهُ وَمُسْلِمُه)۔مگر ابو طالب نے فوراً یہ کہہ کر آپ کو مطمئن کردیافَوَ الله لَا أُسْلِمُك لِشَيْءِ أَبَدًا(اللہ کی قسم، میں تمھیں کسی چیز کے بدلے کبھی بھی ان کے حوالے نہیں کروں گا)سیرت ابن ہشام، جلد2، صفحہ 266۔