دعوت کے مصالح

ہر دور میں ایسے لوگ ہوتے ہیںجو زمانہ کے اثرات سے محفوظ رہتے ہیں اور اپنی فطرت کی آواز پر کان لگائے ہوئے ہوتے ہیں ۔ عرب معاشرہ میں بھی فطری سادگی اور ملت ابراہیمی کے بقایا کے نتیجہ میں ایسے متعدد لو گ تھے جو سچائی کی تلاش میںتھے اور بت پرستی کو نا پسند کرتے تھے۔ عرف عام میںان کو حنفاء کہا جاتاتھا۔ مثلاً قس بن ساعد ہ، ورقہ بن نوفل وغیرہ۔ ایسے ہی ایک شخص حنیف جند ب بن عمر والد وسی تھے۔ وہ زمانہ جاہلیت میں کہا کرتے تھے

انَّ ‌لِلْخَلْقِ خَالِقًا لَكِنِّي لَا أَدْرِي مَنْ هُوَ(الإصابة في تمييز الصحابة لابن حجر العسقلاني، جلد 3،صفحہ 424)۔یعنی یقیناً خلق(creation) کا کوئی خالق ہے، مگر میں نہیں جانتا وہ کون ہے۔

جب انہیں آپ کی بعثت کی خبر ملی تو وہ اپنی قوم کے 75آدمیوں کو ساتھ لے کر آئے اور سب نے اسلام قبول کر لیا (الاصابة في تمييز الصحابة، جلد3، صفحہ424)۔ ابو ذر غفاری بھی اسی قسم کے متلاشیوں (seekers)میں سے تھے۔ انہیں آپ کےبارے میں علم ہو ا تو اپنے بھائی کو مکہ بھیجا کہ آپ کی خبر لے کر آئے۔ بھائی نے واپس جاکر آپ کے بارے میں جو رپورٹ دی اس کا ایک فقرہ یہ بھی تھا

فرأيت رجلا يسمّيه الناس الصابئ هو أشبه الناس بك (الاصابۃ فی تمییز الصحابۃ، جلد7، صفحہ107)۔يعني،میں نے ایک آدمی کو دیکھا جس کو لوگ بد دین کہتے تھے، وہ تم سے بہت زیادہ مشابہ تھا۔

عَنْ أُمِّ عَبْدِ اللهِ بِنْتِ أَبِي حَثْمَةَ، قَالَتْوَاللهِ إنَّا لَنَتَرَحَّلُ إلَى أَرْضِ الْحَبَشَةِ، وَقَدْ ذَهَبَ عَامِرٌ فِي بعض حاجاتنا، إِذا أَقْبَلَ عُمَرُ بْنُ الْخَطَّابِ حَتَّى وَقَفَ عَلَيَّ وَهُوَ عَلَى شِرْكِهِ- قَالَتْوَكُنَّا نَلْقَى مِنْهُ الْبَلَاءَ أَذًى لَنَا وَشِدَّةً عَلَيْنَا- قَالَتْفَقَالَإنَّهُ لَلِانْطِلَاقُ يَا أُمَّ عَبْدِ اللهِ. قَالَتْفَقُلْتُنَعَمْ وَاللهِ، لَنَخْرُجَنَّ فِي أَرْضِ اللهِ، آذَيْتُمُونَا وَقَهَرْتُمُونَا، حَتَّى يَجْعَلَ اللهِ مَخْرَجًا . قَالَتْ فَقَالَ صَحِبَكُمْ اللهِ، وَرَأَيْتُ لَهُ رِقَّةً لَمْ أَكُنْ أَرَاهَا، ثُمَّ انْصَرَفَ وَقَدْ أَحْزَنَهُ- فِيمَا أَرَى- خُرُوجُنَا(سیرت ابن ہشام، جلد1، صفحہ342-43)۔يعني، ام عبداللہ بنت ابی حثمہ کہتی ہیں، خدا کی قسم ہم لوگ ملک حبش کی طرف کوچ کر رہے تھے اور میرے شوہر عامر اپنی بعض ضروریات کے لیے گئے ہوئے تھے۔ اتنے میں عمر بن الخطاب آگئے اور میرے پاس آکر کھڑے ہو گئے، وہ ابھی تک اسلام نہ لائے تھے۔ ہم لوگوں کو ان سے بڑی تکلیفیں اور سختیاں پہنچی تھیں۔ انہوں نے کہا، اے ام عبد اللہ ! کوچ ہورہا ہے۔ میں نے کہا ہاں، خدا کی قسم ہم لوگ اللہ کی زمین میں سے کسی زمین میں چلے جائیں گے۔ اس لیے کہ تم لوگ ہمیں ستاتے ہو اور ہمارے اوپر زیادتیاں کرتے ہو۔ یہاں تک کہ اللہ ہمارے لیے کوئی نکاسی کی جگہ پیدا کردے۔ ام عبد اللہ کہتی ہیں ۔ عمر نے کہا خدا تمہارا ساتھی ہو۔ یہ کہتے ہوئے ان کی آنکھوں میں رقت پیدا ہو گئی جو میں نے کبھی نہیں دیکھی تھی۔ اس کے بعد وہ چلے گئے اور ان کو ہمارے مکہ سےجانے کا بہت ملال تھا۔

ہر زمانہ میں کچھ ایسے خیالات ہوتے ہیں جو عوامی ذہنوں میں جڑ پکڑ جاتے ہیں ۔ جب تک خیالات کی یہ دیوار نہ ٹوٹے کوئی آواز محض اپنی فلسفیانہ صداقت کی بنیاد پر ان کے اندر قبولیت حاصل نہیں کرسکتی۔ ابتدائی زمانہ میں اہل عرب کی طرف سے جس اختلاف کا مظاہرہ ہوا، وه محض ہٹ دھرمی یا مصلحت پر ستی کی بنا پر نہ تھا۔ بلکہ اس لیے تھاکہ ان کی سمجھ میں نہ آتا تھا کہ کعبہ کے متو لیوں کے سوا بھی کسی کا دین صحیح او ر برحق ہو سکتا ہے۔ جو عرب قبائل یہود کے پڑوس میں بسے ہوئے تھے وہ نسبتاً اس قسم کی اعتقادی پیچیدگی سے محفوظ تھے، کیوں کہ یہود سے وہ سنتے رہتے تھے کہ ہماری کتابوں میں لکھا ہوا ہے کہ عرب میں ایک نبی کا ظہور ہوگا

فَلَمَّا سَمِعُوا قَوْلَهُ أَنْصِتُوا، وَاطْمَأَنَّتْ أَنْفُسُهُمْ إِلَى دَعْوَتِهِ وَعَرَفُوا مَا كَانُوا يَسْمَعُونَ مِنْ أَهْلِ الْكِتَابِ مِنْ ذِكْرِهِمْ إِيَّاهُ بِصِفَتِهِ، وَمَا يَدْعُوهُمْ إِلَيْهِ، فَصَدِّقُوهُ وَآمَنُوا بِه(المعجم الکبیر للطبرانی، حدیث نمبر849)۔يعني، انصار کے لوگوں نے جب آپ کا کلام سنا تو وہ چپ ہو گئے، ان کا دل آپ کی دعوت پر مطمئن ہوگیا۔ انہوں نے اہل کتاب سے آپ کے جو اوصاف سنے تھے اور جس چیز کی طرف آپ نے ان کو بلایاتھا، ان کو پہچانا۔ انہوں نے آپ کی تصدیق کی او ر آپ پر ایمان لائے۔

يا قوم! اسْبِقُوا إِلَى هَذَا الرَّجُلِ قَبْلَ أَنْ تُسْبَقُوا إِلَيْهِ فَوَاللهِ إِنَّ أَهْلَ الْكِتَابِ لَيُحَدِّثُونَ أَنَّ نَبِيًّا يَخْرُجُ مِنَ الْحَرَمِ قَدْ أَظَلَّ زَمَانُهُ (دلائل النبوة لأبي نعيم، حدیث نمبر 222)۔يعني، اے قوم، اس آدمی کا ساتھ دینے میں جلدی کرو قبل اس کے کہ اور لوگ اس کی طرف سبقت کریں۔ خدا کی قسم، اہل کتاب کہہ رہے ہیں کہ حرم سے ایک نبی ظاہر ہوگا جس کا زمانہ قریب آگیا ہے۔

مدینہ کے عرب قبائل، اوس اور خزرج کے ایما ن لانے میں پیش قدمی کرنے کی وجہ ان کا یہی ذہنی پس منظر تھا۔ تاہم مکہ کے لوگوں اور بیشتر عرب قبائل کے لیے صداقت کا معیار کعبہ کا اقتدار تھا۔ قدیم عرب میں کعبہ کی حیثیت وہی تھی جو بادشاہی نظام میں ’’تاج‘‘ کی ہوتی ہے۔ مزید یہ کہ تاج کے ساتھ صرف سیاسی اقتدار کا تصور وابستہ ہوتاہے، جب کہ کعبہ کے ساتھ اقتدار کے علاوہ تقدس کی روایات بھی کامل درجہ میں شامل تھیں۔ عام عرب اپنے سادہ ذہن کے تحت یہ سمجھتے تھے کہ جو کعبہ پر قابض ہو جائے وہی صداقت کا حامل ہے۔ بنوعامر کے ذو الجوشن الضبائی بتاتے ہیں کہ رسول اللہ صلی اللہ علیہ وسلم نے اس سے کہا 

يَا ذَا الْجَوْشَنِ، أَلَا تُسْلِمُ فَتَكُونَ مِنْ أَوَّلِ أَهْلِ هَذَا الْأَمْرِ؟ ، فَقُلْتُلَا، قَالَ لِمَ؟ قُلْتُإِنِّي رَأَيْتُ قَوْمَك قَدْ وَلِعُوا بِك، قَالَ فَكَيْفَ بَلَغَك عَنْ مَصَارِعِهِمْ بِبَدْرٍ؟ ، قُلْتُقَدْ بَلَغَنِي، قَالَفَإِنَّا نُهْدِي لَك، قُلْتُإِنْ تَغْلِبْ عَلَى الْكَعْبَةِ وَتَقْطُنْهَا، قَالَ لَعَلَّك إِنْ عِشْتَ تَرَى ذَلِك... قَالَ فَوَاللهِ إِنِّي بِأَهْلِي بِالْغَوْرِ إِذْ أَقْبَلَ رَاكِبٌ فَقُلْتُمَا فَعَلَ النَّاسُ؟ قَالَقَدْ وَاللهِ غَلَبَ مُحَمَّدٌ عَلَى الْكَعْبَةِ وَقَطَنَهَا، فَقُلْتُهَبِلَتْنِي أُمِّي، وَلَوْ أُسْلِمُ يَوْمَئِذٍ ثُمَّ أَسْأَلُهُ الْحِيرَةَ لَأَقْطَعَنِيهَا (مسند احمد، حدیث نمبر 16633)۔ يعني، اے ذو الجوشن تم اسلام کیوں نہیں  لاتے کہ تمہارا شمار اولین لوگوں میں ہو جائے۔ میں نے کہا نہیں۔ آپ نے فرمایا کیوں۔ میں نے کہا میں دیکھتا ہوں کہ آپ کی قوم آپ کے پیچھے پڑگئی ہے۔ آپ نے فرمایا بدر میں ان کی شکست کے بارے میں تم نے کیا سنا۔ میں نے کہا ہاں، مجھے معلوم ہے۔ آپ نے فرمایا ہم کو توتمہیں ہدایت کی بات بتانی ہے۔ میں نے کہا، ہاں بشر طیکہ آپ کعبہ کو فتح کر کے اس پر قابض ہو جائیں،آپ نے فرمایا اگر تم زندہ رہے تو دیکھ لو گے... اس کے بعد ایک روز میں اپنے گھر والوں کے ساتھ اپنے وطن غور میں تھا کہ ایک سوار آیا۔ میں نے پوچھا لوگوں کا کیا ہوا۔ اس نے کہا خدا کی قسم محمد نے کعبہ کو فتح کر لیا اور اس پر قابض ہو گئے۔ میں نے کہا میری ماں مجھے گم کرے، اگر میں نے اسی دن اسلام قبول کر لیا ہوتااورپھر محمد سے حیرہ مانگتا تو وہ ضرور دے دیتے۔

یہی وجہ ہے کہ جب مکہ فتح ہو گیا تو لوگ جو ق در جوق اسلام میں داخل ہوگئے۔ (النصر،110:2)