Asmaye husna aur ism-e-aazam.

اسمائے حسنیٰ اور اسم اعظم۔ قرآن میں بتایا گیا ہے کہ "ولله الأسماء الحسنى" سورہ نمبر 7، آیت 180۔ یعنی اللہ ہی کے لیے ہیں اچھے نام، یعنی best names۔ یہ بات قرآن میں 4 مقامات پر کہی گئی ہے: سورہ نمبر 7، آیت 180؛ سورہ نمبر 17، آیت 110؛ سورہ نمبر 20، آیت 8؛ سورہ نمبر 59، آیت 24۔

یہاں "نام" سے مراد نام نہیں ہیں، بلکہ صفات یعنی attributes ہیں۔ یعنی تمام اچھی صفتیں خدا ہی کے لیے ہیں۔ اسمائے حسنیٰ کی تعداد کیا ہے؟ ایک حدیث میں بتایا گیا ہے کہ اسمائے حسنیٰ کی تعداد 99 ہے۔

بعض علماء نے اسمائے حسنیٰ کی تعداد میں اضافہ کیا ہے، چنانچہ وہ کہتے ہیں کہ اسمائے حسنیٰ کی تعداد 1000 تک ہے (تفسیر ابن کثیر، جلد 2، صفحہ 269)۔ مگر اس معاملے میں تعداد کی حیثیت اضافی ہے۔ یہ تعداد دراصل انسانی فرہنگ یا مجموعۂ الفاظ یعنی vocabulary کے اعتبار سے ہے۔ انسانی زبان کے الفاظ محدود ہوتے ہیں، لیکن خدا ایک لامحدود ہستی ہے، اس لیے خدا کی صفات بھی اپنی حقیقت کے اعتبار سے لامحدود ہیں۔

اسمائے حسنیٰ کی 99 تعداد گویا کہ خدا کی نمائندہ صفات ہیں۔ اس اعتبار سے خدا کی بقیہ صفات بھی براہِ راست یا بالواسطہ طور پر انہی بنیادی صفات میں شامل ہیں۔ کتابِ معرفت مولانا وحید الدین خان، صفحہ نمبر 341۔