Maherbani karna

مہربانی کرنا۔ حدیث میں آیا ہے کہ پیغمبرِ اسلام صلی اللہ علیہ وسلم نے فرمایا: "رحم کرنے والوں پر خدائے رحمان رحم کرے گا۔ " تم لوگ زمین والوں پر رحم کرو، آسمان والا تم پر مہربان ہو۔ عن عبدالله بن عمر يبلغ به النبي صلى الله عليه وسلم: "الراحمون يرحمهم الرحمن، ارحموا أهل الأرض يرحمكم من في السماء." سنن ابی داؤد، کتاب الادب، باب فی الرحمہ۔

زندگی کا نظام رحم کے اصول پر قائم ہے: ہر ایک کو چاہیے کہ وہ دوسرے کے ساتھ رحمت و شفقت کا معاملہ کرے۔ کوئی کسی پر زیادتی نہ کرے، کوئی کسی سے عداوت نہ رکھے۔ کوئی آدمی جب دوسرے کے ساتھ رحم کا معاملہ کرتا ہے تو وہ خود اپنے انسانی رتبے کو بلند کر لیتا ہے۔ وہ اپنی روح کو یہ احساس دیتا ہے کہ میں نے وہ کیا جو مجھ کو۔

وہ اپنی روح کو یہ احساس دیتا ہے کہ میں نے وہ کیا جو مجھے کرنا چاہیے تھا۔ اس کے برعکس، جب کوئی آدمی دوسرے کے ساتھ بے رحمی کا سلوک کرے تو وہ اپنی روح کو بتاتا ہے کہ میں نے وہ کیا جو مجھ کو نہیں کرنا چاہیے تھا۔ یہی وجہ ہے کہ آدمی کو رحم دلی کر کے سکون حاصل ہوتا ہے۔ اور جو آدمی بے رحمی کا طریقہ اختیار کرے، وہ ہمیشہ بے سکونی اور بے چینی میں مبتلا رہتا ہے۔

خدا کی سب سے بڑی صفت رحم اور مہربانی ہے۔ اس کی اس صفت کے مظاہر ساری دنیا میں ہر طرف پھیلے ہوئے ہیں۔ یہی وجہ ہے کہ جب کوئی آدمی رحم دلی کا سلوک کرتا ہے تو وہ خدا کا پسندیدہ بندہ بن جاتا ہے۔ ایسے آدمی کو دنیا میں بھی خدا کی مدد ملتی ہے، اور آخرت میں وہ زیادہ بڑے پیمانے پر خدائی مدد کو حاصل کرے گا۔

اس کے برعکس، جو آدمی دنیا میں اس طرح رہے کہ وہ دوسروں کے ساتھ بے رحمی کی روش اختیار کیے ہوئے ہو، اس نے اپنے آپ کو خدا کی نگاہ میں مجرم بنا لیا۔ وہ دنیا میں تو خدا کی رحمت سے محروم رہے گا، اور آخرت میں بھی وہ مزید اضافے کے ساتھ خدا کی رحمت سے محروم کر دیا جائے گا۔ دوسروں کے ساتھ مہربانی کرنا احسان نہیں ہے، بلکہ خدمت ہے۔ یہ اپنی بڑائی کا اظہار نہیں ہے، بلکہ دوسروں کے حقوق کی ادائیگی ہے۔

ہر آدمی کی یہ ذمہ داری ہے کہ وہ دوسرے کو بھائی کی نظر سے دیکھے، اور اس کے معاملے میں اپنی برادرانہ ذمہ داریوں کو پورا کرے۔ اسلامک تعارف: مولانا وحید الدین خان، صفحہ نمبر 318۔