November 1990

یکم نومبر 1990

سورہ بلد میں نجدین کا لفظ ہے۔ یعنی دو بلندیاں۔ آیت کے الفاظ بتاتے ہیں کہ دو بلندیوں سے مراد دومطلوب چیزیں ہیںـــــ اخلاقی نجد اور شرعی نجد ۔ اخلاقی نجد سے مرادوہ بھلائیاں ہیں جو خود فطرت کے زور پر آدمی کو معلوم ہیں اور شری نجد سے مراد وہ بھلائیاں ہیں جو وحی کے ذریعہ معلوم ہوتی ہیں۔

آجکل انسان جس طرح ظالم اورسرکش ہو گیا ہے ، اس کو سوچ کر میری زبان سے نکلا : شرعی معیار پر جانچنا تو درکنار، یہ انسان تو اخلاقی معیار پر ہی اپنے آپ کور دکر رہا ہے۔

2 نومبر 1990

آج جمعہ کا دن تھا۔ مقامی جامع مسجد میں جمعہ کی نماز پڑھی۔ اولا خطبہ میں اور اس کے بعد دوسری رکعت کے آخر میں قنوت نازلہ پڑھی گئی ۔ کافروں اور مشرکوں کے لئے ہلاکت اور بربادی کی بد دعا کی گئی ۔ اس بد دعا کا پس منظر بابری مسجد کا مسئلہ ہے۔

بابری مسجد کے نام پر مسلمانوں نے "ایکشن کمیٹی" بنائی ۔ اس کے بعد دھواں دھار تقریریں کی جانے لگیں۔ بائیکاٹ ، ریلی، جلوس، مارچ ،اسلامی لشکر ، آدم سینا وغیرہ کے پر شور ہنگاموں کے ساتھ یہ اعلان کیا گیا تھا کہ بابری مسجد کسی کو چھونے نہیں دی جائے گی۔ آخر میں بار بار اعلان کیا گیا کہ ہم نے مسلمانوں کے حفاظتی دستے تیار کر لئے ہیں۔ وہ ہر جگہ ہندووں کو روک دیں گے۔ مگر ان سب کے باوجود30 اکتوبر 1990کو ہندو بڑی تعداد میں اجودھیا کے اندر داخل ہوگئے۔ انھوں نے بابری مسجد کا ایک گنبد توڑ ڈالا۔ اس کے اوپر بھگوا جھنڈالہرادیا۔ وغیرہ ۔کوئی ایک مسلمان بھی بابری مسجد کی حفاظت کے لئے نہیں نکلا۔

اب ہر جگہ مسجدوں میں ہندوؤں کے خلاف بد دعائیں کی جار ہی ہیں۔ میرے نزدیک وہ بھی غلط تھا اور یہ بھی غلط ہے۔ پہلے مسلمانوں کو یہ کرنا تھا کہ وہ پر امن تحریک چلائیں ۔ اور اب یہ چاہئے کہ وہ ہندوئوں کی ہدایت اور اصلاح کے لئے دعائیں کریں۔ مگرمسلمان نہ پہلے مرحلہ میں صحیح روش اختیار کر سکے اور نہ اب وہ صحیح روش اختیار کر رہے ہیں۔

3 نومبر 1990

ایک صاحب سے ملاقات ہوئی ۔ ان کی شادی ان کے والدین نے کر دی تھی ۔ اب وہ اپنی موجودہ بیوی سے غیر مطمئن ہیں ، اور اس کو چھوڑ کر دوسرا نکاح کرنا چاہتے ہیں۔ میں نے اس کی مخالفت کی۔ میں نے ان سے کہا :

زندگی کو کامیاب بنانے کے لئے ہمیشہ ایک ایسی رفیقہ حیات کی ضرورت ہوتی ہے جو اپنے شوہر کے ساتھ قربانی کی حد تک مساعدت کرے اورکسی آدمی کے لئے ایسی رفیقہ حیات صرف اس کی پہلی بیوی بن سکتی ہے ۔ اس کی دوسری بیوی کبھی اس کے لئے ایسی رفیقۂ حیات نہیں بن سکتی۔

4 نومبر 1990

5 نومبر 1990

قدیم زمانہ میں ترکی کے پاس بہت بڑا بحری بیڑا تھا۔ مگرجب بحری جہازوں کو بھاپ سے چلانے کا دور آیا تو وہ اتنا پچھڑ گئے کہ نئے طرز کی کشتیوں کو حاصل کرنے اور ان کو استعمال کرنے کو بھی وہ اپنے لئے خطرناک سمجھنے لگے۔

کہا جا تا ہے کہ سلطان عبدالحمید ثانی نے بھاپ کی طاقت سے چلنے والا بحری بیڑہ (اسطول )تیار کرایا تو ترکی کے علماء نے اصرار کیا کہ اس کو استعمال کرنے سے پہلے اس پر بخا ری شریف کا ختم ہونا چاہئے۔ علماء کا اصرار جب بڑھ گیا توکسی فوجی افسر نے ان پر طنز کرتے ہوئے کہا کہ بحری بیٹرہ بخار ( بھاپ )سے چلتا ہے نہ کہ بخاری سے( ان الأسطول يسير بالبخار لا بالبخاری).

موجودہ زمانہ کے مسلم علما نے اپنی روش سے جدید انسان کے لئے اسلام کو ایک مضحکہ بنا دیا۔ اگر وہ مسجدوں اور مدرسوں میں خاموش رہ کر اپنا روایتی کام کرتے تو یہ ان کے لئے اس سے بہتر تھا کہ وہ نا کافی لیاقت کے ساتھ مسلمانوں کی رہنمائی کے لئے باہر نکل پڑیں۔

6 نومبر 1990

گوئٹے (Goethe) 1749میں جرمنی میں پیدا ہوا ، اور 1832 میں اس کی وفات ہوئی۔ اس کی عظمت اتنی زیا دہ ہے کہ اس کولٹر ری جائنٹ( literary giant) کہا جا تا ہے۔ اس کا ایک قول انگریزی میں میں نے ان لفظوں میں پڑھا کہ انسانیت قوموں کے اوپر ہے:

Mankind is above nations

گوئٹے کے زمانہ میں قومی تحریک کا دور تھا۔ لوگ یہ کہنے لگے تھے کہ میرا ملک خواہ وہ حق پر ہو یا ناحق پر (my country, tight or wrong) مگر گوئٹے کی فطرت انسانیت کو زیادہ بلند سمجھتی تھی، اس لئے وہ اس قسم کے تصور قومیت کو قبول نہ کرسکی۔ اسی طرح اگر کچھ لوگ مذہب کا ایسا ایڈیشن پیش کریں جس میں انسانیت کو بلند درجہ نہ مل رہا ہو تو لوگوں کی فطرت ایسے مذہب کا بھی انکار کر دے گی۔

7 نومبر 1990

موجودہ زمانہ کے مسلمانوں کا یہی عام ذہن رہا ہے ۔ نہ صرف انگریزوں کو بلکہ تمام قوموں کو وہ اپنا دشمن سمجھے ہوئے ہیں۔ یہی وجہ ہے کہ موجودہ زمانہ میں مسلمانوں کے درمیان کوئی دعوتی تحریک ابھر نہ سکی ۔ دوسرے دوسرے کاموں پر تو مسلمانوں نے ضرور" دعوت " کا لیبل لگارکھا ہےمگر حقیقی دعوتی عمل کا ان کے درمیان کوئی وجود نہیں۔ دعوت کا کام ہمیشہ خیرخواہی کے جذبہ کے تحت انجام پاتا ہے۔ جب مسلمانوں نے اپنی مدعو قوموں کو دشمن کے خانہ میں ڈال رکھا ہو تو ان کے لئے کسی خیر خواہا نہ عمل کا جذبہ مسلمانوں میں کیونکر پیدا ہو گا۔

8 نومبر 1990

طرابلس میں کلیتہ الدعوة الاسلامیہ کے نام سے ایک کالج ہے۔ اس کا ایک سالانہ مجلہ عربی زبان میں نکلتا ہے جس کا نام "مجلة الدعوة الاسلامية“ ہے۔ اس کا شمارہ 1988 ۱(العدد الخامس ) پچھلے دنوں ملا ۔ اس کے آخر میں ایک خبر درج تھی جو میرے لئے ایک ذاتی اہمیت رکھتی ہے ۔

الاستاد الهوني في ذمة اللہ کے عنوان کے تحت بتایا گیا تھا کہ عبداللہ محمد الھونی 4 فروری1988 کو انتقال کر گئے ۔ وہ طرابلس کی جامعتہ الفاتح (فاتح یونیورسٹی) میں ذمہ دارانہ منصب پر فائز تھے۔ خبر میں بتایا گیا تھا کہ وہ نہایت مومن ومخلص آدمی تھے۔ اس کے ساتھ وہ اعلیٰ علمی ذوق رکھتے تھے۔ وہ مصر کے شہر سلوم میں پیدا ہوئے۔ اس کے بعد وہ ہجرت کر کے لیبیا آئے۔ انھوں نے طرابلس یونیورسٹی سے 1971 میں ممتازنمبروں کے ساتھ ایم اے پاس کیا تھا۔

9 نومبر 1990

11 نومبر 1990

The Soviet Union will drop the words of "Soviet" and "Socialist" from

its name and become the "Union of Sovereign Republics."

اشتراکی روس کی مارکسزم سے واپسی انسان عقل کی نارسائی کا بڑا عجیب ثبوت ہے۔

12 نومبر 1990

بھارتیہ جنتا پارٹی نے اجودھیا میں رام مندر کی تحریک چلائی تو ہندو عوام کی ایک بھیڑ اس کے گرد جمع ہوگئی ۔ پارٹی کے صدر لال کرشن اڈوانی نے سومناتھ سے اجودھیا تک دس ہزار کیلومیٹر کی رتھ یا ترا کی تو سارے راستہ میں ہندوؤں کی طرف سے انھیں زبردست استقبال ملا۔مگر اس بھیڑ کی وجہ سے وہ غلط فہمی میں نہیں پڑے۔

اسی کا نام حقیقت پسندی ہے۔ موجودہ زمانہ کے مسلم رہنماؤں میں حقیقت پسندی مفقود نظر آتی ہے۔ مثال کے طور پر مولانا ابوالاعلی مودودی نے پاکستان میں غلاف کعبہ (۱۹۶۳) اور یوم شوکت اسلام(۱۹۷۰) کا جلوس نکالا۔ انھوں نے قادیانی مخالف تحریک (۱۹۷۵) میں دھواں دار حصہ لیا۔ ان کے اس قسم کے جلسے اور جلوسوں میں مسلمان بڑی تعداد میں شریک ہوئے۔ انھوں نے اس بھیڑ کو دیکھ کر سمجھ لیا کہ پاکستان کے مسلم عوام ان کے ساتھ ہیں۔ اور وہ اس پوزیشن میں ہیں کہ پاکستان میں حکومت بناسکیں۔

اسی غلط فہمی کے تحت انھوں نے اپنی ساری طاقت بحالی جمہوریت کی تحریک (۱۹۶۵) میں لگا دی۔ مگر جب الکشن ہوا تو ان کے صرف چند آدمی پاکستان اسمبلی کے لئے منتخب ہو سکے ۔۲۴ اکتوبر ۱۹۹۰ کے الکشن میں بھی جماعت اسلامی نے بڑے بڑے نعروں کے ساتھ حصہ لیا۔ مگر اس بار بھی اپنے صرف چند آدمیوں ہی کو وہ اسمبلی میں پہنچا سکے۔ اس تباہ کن جد وجہد کا اتنا فا ئدہ بھی نہیں ہوا کہ مولانا مودودی آخر میں اپنی غلطی کا اعتراف کر لیتے۔

13 نومبر 1990

" جنگ کی تیاریاں " یا " جنگ کے لیے تیاریاں " دونوں فقرے اردو زبان میں استعمال کئے جاسکتے ہیں، اور دونوں ہی صحیح سمجھے جائیں گے۔ لیکن انگریزی میں ایسا ہونا ممکن نہیں۔ انگریزی میں اس مفہوم کے لئے ؟ preparations of war نہیں کہا جاۓ گا ، بلکہ preparations for war کا جملہ استعمال کیا جائے گا۔

یہ ایک سادہ سی مثال ہے جو اردو اور انگریزی کے فرق کو بتاتی ہے ۔ انگریزی میں ہر چیز کی معیار بندی ہو چکی ہے۔ معیار سے کم درجہ کی زبان وہاں قابل قبول نہیں ہوتی ۔ جبکہ اردو میں اس قسم کی معیار بندی نہیں ہوئی۔ اس لئے اردو میں معیاری زبان اور غیرمعیاری زبان دونوں ہی مل جاتی ہیں۔ یہی وجہ ہے کہ انگریزی زبان میں معیار سے کم درجہ کی کتابوں کا مارکٹ میں لا ناسخت مشکل ہے۔ اس کے برعکس اردو دنیا میں یہ حال ہے کہ کم تر معیار کی کتا بوں اور جرائد کا ہر طرف انبار لگا ہوا ہے ۔

14 نومبر 1990

خیمہ افلاک کا ایستادہ اسی نام سے ہے نبض ہستی تپش آمادہ اسی نام سے ہے

لوگ اس طرح کی بے اصل بات کیوں کرتے ہیں۔ اس کی وجہ یہ ہے کہ آدمی کے اندراحساس استجاب (sense of awe) نہایت طاقت ور صورت میں موجود ہے۔ آدمی کو ایک ایسی ہستی چاہئے جس کو وہ انتہائی عظیم سمجھے، جس کا وہ غیرمعمولی اعتراف کرے۔ یہ احساس آدمی کے اندر خداوند ذوالجلال کے لئے تھا۔ مگر انسان خدا کو نہیں پاتا ، اس لئے وہ کسی انسان کو یہ برتر مقام دیدیتا ہے۔ اور اس کے حق میں غیرمعمولی برتری کا اظہار کر کے اپنے دل کو تسکین دیدیتا ہے۔

15 نومبر 1990

عراق نے صدام حسین کی قیادت کے تحت 2 اگست کو کویت پر قبضہ کیا تھا۔ امریکہ ساڑھے تین مہینہ سے عراق اور کویت کا محاصرہ کئے ہوئے ہے۔ مگر اب تک اس نے حملہ کر کے جنگ شروع نہیں کی۔ جنگ امریکہ کے لئے بے حد مہنگی پڑے گی ۔ کیوں کہ ماہرین کے اندازہ کے مطابق ، جنگ کی قیمت ایک بلین ڈالر روزانہ ہو گی۔ یہ بے پناہ خرچ اور دوسرے نقصانات کا اندیشہ امریکہ کو جنگ کا آغاز کرنے سے روکے ہوئے ہے۔

16 نومبر 1990

قومی آواز کے شمارہ16 نومبر میں پنجاب کے مہاراجہ رنجیت سنگھ (۱۸۳۹-۱۸۸۰) پر کے کے کھلر کا مضمون شائع ہوا ہے۔ مضمون نگار نے بتایا ہے کہ رنجیت سنگھ نہایت روشن خیال تھا۔ اس نے پنجاب میں پہلا چھا پہ خانہ قائم کیا۔ راوی ندی میں بھاپ سے چلنے والی مشینی کشتی چلائی ۔ اپنی فوج کو جدیدیورپی انداز سے ٹریننگ دی۔ انھوں نے پنجاب میں انگریزی تعلیم رائج کرنے کی کوشش کی۔ بندوق اور کارتوس کا کارخانہ قائم کیا۔ وغیرہ ۔

رنجیت سنگھ نہایت سادہ مزاج مہاراجہ تھا۔ وہ تخت کے بجائے معمولی نشست پر بیٹھتا تھا۔ اپنی ریاست میں سختی سے ظلم وزیادتی کو بند کر رکھا تھا۔ ہر مذہب کا احترام کرتاتھا۔

ایک مسلمان خوش نویس نے قرآن کا ایک نسخہ تیار کیا۔ وہ اس کا دس ہزار روپیہ چاہتے تھے۔ مگر رامپور ، لکھنؤ اور حیدر آباد کے نواب اتنی رقم دینے پر راضی نہیں ہوئے۔ اس کے بعد وہ اس نسخہ کولے کرلاہور پہنچے اور رنجیت سنگھ کے سامنے اس کو پیش کیا۔ مہاراجہ اپنی کرسی سے اٹھ کر کھڑا ہو گیا۔ قرآن کو بوسہ دیا اور اسی وقت دس ہزار روپیہ کی ادائیگی کا حکم صادر کر دیا۔

مہارا بہ کا وزیر خارجہ ایک مسلمان فقیر عزیز الدین تھا۔ اور بہت سے مسلمان اس کے یہاں اعلی عہدوں پر تھے۔ رنجیت سنگھ ہندی اور پنجابی کے علاوہ اردو اور فارسی زبان بخوبی جانتا تھا۔ اس کے یہاں دفترکی زبان فارسی تھی۔

مہاراجہ رنجیت سنگھ کے حالات میں اس قسم کی چیزیں پڑھتا ہوں تو مجھ کو تعجب ہو تا ہے کہ سید احمد بریلوی کچھ خبروں اور افواہوں کو سن کر اس کے خلاف جنگ پر کیوں آمادہ ہو گئے۔ سید صاحب اور ان کے ساتھیوں کو چاہئے تھا کہ پہلے رنجیت سنگھ سے ملتے۔ اس سے نہ صرف موصولہ خبروں پر بات کرتے بلکہ اس کے سامنے اسلام کی دعوت پیش کرتے۔ یہ کتنی بڑی نعمت تھی کہ مہاراجہ رنجیت سنگھ فارسی اور اردو جانتا تھا۔ اس سے خود اپنی زبان میں مکمل گفتگو کی جاسکتی تھی۔ مجھ کو تو سید احم شہید بریلوی کا اتمام جہاد محض بے معنی فعل معلوم ہوتا ہے۔

17 نومبر 1990

مسٹر جناح نے مسلمانوں کے جذبات کو مجروح ہونے اور ان کو مشتعل ہونے سے بچانے کے لئے1918 میں جو عدالتی کامیابی حاصل کی تھی اس کا نتیجہ صرف یہ ہوا کہ سلمان پچھلے 70 سال سے زیادہ بڑے پیمانہ پر عین اسی مصیبت کا شکار ہو رہے ہیں۔ حقیقت یہ ہے کہ مسٹر جناح کا مذکورہ واقعہ ان کی وکالت کا ثبوت ہے نہ کہ ان کی قیادت کا۔ مسٹر جناح انسانوں کو یہ بتاتے کہ اس مسئلہ کا حل یہ ہے کہ تم اشتعال انگیزی کے با وجود مشتعل نہ ہو تو یہ ایک رہنمائی ہوتی۔ مگروہ اپنے آپ کوقائد ثابت کرنے کے بجائے صرف وکیل ثابت کرسکے۔

18 نومبر 1990

برما میں عرصہ سے فوجی حکومت ہے۔ عوامی مطالبہ پر وہاں الکشن کرایاگیا۔ مئی۱۹۹۰ میں ہونے والے اس الکشن میں نیشنل لیگ فار ڈیموکریسی ( N.L.D) بھاری اکثریت سے جیت گئی مگر وہاں کے فوجی جنرلوں نے اقتدار منتقل نہیں کیا۔ انھوں نے لیگ کے لیڈروں کو جیلوں میں بند کر دیا۔ عوام پرظلم کرنا شروع کیا۔ حتی کہ بدھوں کے عبادت خانوں میں بھی فوج گھس گئی۔ وغیرہ ۔

They lost an election, but Burma's generals will not surrender to

Democracy.

دنیا میں آدمی کے لئے ممکن ہے کہ وہ ہا ر کر بھی اپنی عظمت کا جھنڈا بلند رکھے۔ آخرت وہ مقام ہے جہاں آدمی یہ موقع کھو دے گا۔ وہاں عظمت صرف اس کو ملے گی جواقعتہ عظمت کا مستحق ہو نہ کہ وہ جس نے دھاندلی کے ذریعہ اپنے کو فرضی طور پر اونچا کر رکھا ہو۔

19 نومبر 1990

20 نومبر 1990

19 نومبر کو میں امریکہ کے سفر پر روانہ ہوا۔ اس سے ایک دن پہلے ریڈرس ڈائجسٹ (اکتوبر ۱۹۹۰ ) میں جیمز میکڈرموٹ (James McDermott) کا مضمون پڑھا۔ اس کا عنوان تھا ؛

Just Ten More Minutes

اس مضمون میں ایک امریکی ڈاکٹر ہو ورڈ ہالک ( Howard Balick ) کا قصہ بیان کیا گیا تھا۔ یہ بے حد دردناک قصہ تھا۔ اس کو میں نے آنسوؤں کی بارش کے درمیان پڑھا۔ ڈاکٹر بالک کے پاس پرائیویٹ پائلٹ کالائسنس تھا۔ 19 فروری۱۹۸۸ کو انھوں نے چار سیٹوں کا ایک جہاز (201 Mooney) کرایہ پر لیا۔ یہ چھوٹا جہاز ایک انجن پر چلتا تھا۔

امریکہ کے ہوائی اڈہ (Old Bridge Airpot) سے انھوں نے جہاز اڑایا۔ جہاز بلند ہوکر ۱۷۰ کیلو میٹر فی گھنٹہ کی رفتار سے اڑ رہا تھا کہ خراب موسم میں گھرگیا۔ اور آخر کار ایک دلدل میں گر پڑا ۔ ڈاکٹر بالک شدید طور پر زخمی ہو گئے۔ وہ ٹوٹے ہوئے جہاز میں پھنسے ہوئے کراہتے ہرہے ۔ ان کے جسم سے خون بہہ رہا تھا۔ بارش اور رات کے اندھیرے میں کچھ دکھائی نہیں دیتا تھا۔ انھوں نے بڑ بڑاتے ہوئے کہا کہ تم کیوں نہیں آرہے ہو .(Why aren't you coming) یہاں تک کہ نو گھنٹے کے بعد پولیس کی ایک ٹیم وہاں پہنی بڑی مشکلوں سے وہ نکال کر اسپتال پہنچائے گئے ۔ علاج کے بعد وہ دوبارہ تندرست ہو گئے۔

Why aren't you coming.

21 نومبر 1990

ٹائمس آف انڈیا (15نومبر 1990) کے صفحہ 3 پر ایک فوٹو چھپا ہوا ہے۔ اس میں ٹوپی پوش نوجوانوں کی ایک بھیٹر دکھائی دے رہی ہے ۔ وہ کعبہ(مسجد حرام ) کی ایک بہت بڑی تصویر اٹھائے ہوئے چل رہی ہے ۔ یہ اس جلوس کا فوٹو ہے جو دہلی کے مسلم نوجوانوں نے 14نومبر1990 کو نکالا تھا۔ یہ جلوس چاندنی چوک سے صدر بازار کے علاقہ تک گیا۔

یہ جلوس جس میں کچھ سکھ نوجوان بھی شریک تھے ، اپنے اعلان کے مطابق خاموش امن مارچ (Silent peace march) کے نام پر نکالاگیا تھا۔ مگراس نے اشتعال انگیز نعرے لگائے۔ مثلا اس کا ایک نعرہ یہ تھا : سکھ اور مسلم بھائی بھائی ، ہند و قوم کہاں سے آئی۔ موتیاکھان پہنچ کر جلوس رکا۔ وہاں سخت اشتعال انگیز تقریریں کی گئیں ۔

اس قسم کی حرکتوں کے نتیجہ میں علاقہ کے ہندووں میں جوابی اشتعال پیدا ہوا ۔ دونوں فرقوں میں ٹکراؤ ہوا۔ آزادانہ طور پر پتھراؤ اور چھرےبازی ہوئی ۔ پولیس نے گولی چلائی ۔ اطلاع کے مطابق ، اس میں آٹھ مسلمان مرگئے سیکڑوں آدمی زخمی ہوئے۔

ہندستان کی پچھلی پچاس سال کی تاریخ میں یہ پہلا واقعہ ہے کہ مسلمانوں کی بڑی تعداد اپنے لوگوں کے جلوس کی مذمت کر رہی ہے ۔ مجھے ایسا معلوم ہوتا ہے کہ 1990 کا خاتمہ مسلمانوں کے لئے نئے دور کا آغاز ہے۔ اب مسلمان جوش و خروش کی سیاست چھوڑ دینگے اور خاموش انداز میں زندہ رہنا سیکھیں گے۔

22 نومبر 1990

An expert is one who knows more and more about less and less.

موجودہ زمانہ میں کائنات کا مطالعہ نہایت وسیع پیمانہ پر کیا گیا ہے۔ مگر اس مطالعہ نے انسان کو صرف یہ بتایا ہے کہ کائناتی علم اتنا زیادہ ہے کہ کسی انسان کا دماغ اس کا احاطہ نہیں کرسکتا۔ چنانچہ علم کو اجزا اور پھر جزا کو مزید اجزاء تقسیم کر کے ان کا مطالعہ کیا جاتا ہے۔ کتناعظیم ہے خالق اور کتنا حقیر ہے اس کے مقابلہ میں انسان۔

23 نومبر 1990

ایک صاحب سے ملاقات ہوئی۔ وہ مسلم مفکرین کی لمبی فہرست گنانے لگے۔ میں نے پوچھا کہ کیا آپ جانتے ہیں کہ مفکرکس کو کہا جاتا ہے۔ ان کے پاس اس کا کوئی متعین جواب تھا۔ میں نے کہا کہ مفکر وہ انسان ہے جو حقائق متفرقہ کو حقیقت واحدہ میں تبدیل کر سکے ۔ آپ پہلے اس تعریف کوذہن میں رکھئے اور اس کے بعد مسلم مفکر کا نام بتائیے۔ وہ کوئی نام نہ بتا سکے ۔

24 نومبر 1990

اللہ نے دو دنیائیں بنائیں۔ ایک موجودہ دنیا جہاں آدمی شیطان کے پڑوس میں ہے۔ دوسری، آخرت کی دنیا جہاں آدمی اللہ کے پڑوس میں ہو گا۔ آخرت میں خدا کا پڑوس اس شخص کو ملے گا جو دنیا میں شیطان کے پڑوس پر راضی نہیں ہوا۔ جو آدمی موجودہ دنیا میں شیطان کے پڑوس پر راضی ہو جائے ، اس کے لئے یہاں بھی شیطان کا پڑوس ہے اور آخرت میں بھی شیطان کا پڑوس ۔

25 نومبر 1990

نومبر 1990 کے آخری عشرہ میں میں امریکہ میں تھا۔ اس قیام کے زمانہ میں اندازہ ہواکر یہاں کے مسلمانوں میں ایک نیا ماڈرن قسم کا اسلام پیدا ہو رہا ہے۔ یہاں مجھے ایک خصوصی تقریب میں لے جایا گیا۔ یہ ایک شاندار ہال میں نہایت اہتمام کے ساتھ انجام دی گئی تھی۔ میزوں پرکھانے کا انتظام تھا۔ ایک طرف مرد اور دوسری طرف عورتیں پوری زیبائش و آرائش کے ساتھ بیٹھی ہوئی تھیں۔ اس کے بعد ایک نوجوان لایا گیا اس کی ملاقات ایک نوجوان لڑکی سے کرائی گئی ۔ اس کے بعد اسٹیج پر تقریر ہوئی۔

26 نومبر 1990

27 نومبر 1990

امریکہ میں 6 ملین مسلمان رہتے ہیں۔ ان میں ایک قابل لحاظ تعداد ہندستانی اور پاکستانی مسلمانوں کی ہے۔ مسلمان تقریبایہ رائے رکھتے ہیں کہ ہندستان کے فسادات وغیرہ میں میں یکطرفہ طور پر صرف ہند وقصور وار ہیں مسلمان مکمل طور پر مظلوم ہیں ۔ ہندستان سے جو لوگ امریکہ جاتے ہیں وہ اس کی تصدیق کرتے ہوئے مسلمانوں کی مظلومیت پر تقریریں کرتے ہیں اور وہاں سے بڑی بڑی رقمیں لاتے ہیں۔

ایک خصوصی اجتماع میں یہاں ہندستانی مسلمانوں کا ذکر ہوا۔ میں نے کہا میری رائے بالکل بر عکس ہے ۔ میری رائے یہ ہے کہ ہندستان میں مسلمان ظالم ہیں اور ہندو مظلوم۔ یہ سن کر لوگ حیرت کے ساتھ میری طرف دیکھنے لگے۔ میں نے کہا کہ ہند و اگرمسلمانوں کی دنیا چھین رہا ہے تو مسلمان ہندووں کی آخرت چھینے ہوئے ہیں۔ پھر زیادہ بڑا مظلوم کون ہے۔ میں نے کہا کہ مسلمانوں کو چاہئے تھا کہ وہ ہندوؤں کے سامنے اسلام پیش کرتے وہ ہندوؤں سے داعی اور مدعو کا رشتہ قائم کرتے مگر مسلمان اس کے برعکس ان سے عداوت کارشتہ قائم کئے ہوئے ہیں۔ یہ بلاشہ مسلمانوں کاظلم ہے۔ اس معاملے میں وہ خدا کے یہاں پکڑ سے نہیں بچ سکتے۔

28 نومبر 1990

جون۶۲۱ء میں مدینہ سے ۲ ۷ مرد اور 3 عورتوں کاقافلہ مکہ آیا۔ وہ رات کے وقت عقبہ کے مقام پر رسول اللہ صلی اللہ علیہ وسلم سے ملے اور آپ کے ہاتھ پر اسلام کی بیعت کی۔ اس کو اسلام کی تاریخ میں بیعت عقبہ ثانی کہا جاتا ہے۔ اس بیعت میں مدینہ کے قبائل (اوس اور خزرج) کے جو افراد شریک ہوئے تھے ، سیرت کی کتابوں میں ان کی مکمل فہرست نام بنام دی گئی ہے۔

Considering how misty are the outlines of European history in the seventh century, it is remarkable how detailed are records of events in Prophet's life. Islam and the Destiny of Man, p. 113.

29 نومبر 1990

صدام حسین کے کویت پر قبضہ کے بعد امریکہ کی فوجیں دو لاکھ کی تعداد میں سعودی عرب کی سرزمین پر اتر گئی ہیں۔ ان میں مرد بھی ہیں اور عورتیں تھیں۔ امریکہ کے مسلمان عام طور پر اس کے مخالف تھے کہ امریکہ اپنی فوجیں عرب کی مقدس سرزمین پر اتارے ۔ 29 نومبرکو سیکورٹی کونسل نے ایک رزولوشن کے ذریعہ امریکہ کویہ حق دے دیا کہ ۱۵ جنوری۱۹۹۱ تک اگرعراق اپنی فوجیں کویت سے نہ نکالے تو امریکہ عراق کے اوپر حملہ کرسکتا ہے۔ اس کے بعد امریکہ کے مسلمانوں کا غصہ اور بھی زیادہ بڑھ گیا۔

ان تجربات کے بعد میرا قیاس ہے کہ امریکہ کے6 ملین مسلمان جو امریکہ کو دنیوی جنت سمجھ کر یہاں مقیم ہو گئے تھے۔ اور شہریت کا حلف دے کر یہاں کے شہری بن گئے تھے اب یہاں ان کے لئے سنگین مسائل پیدا ہو سکتے ہیں۔ جنگ کی صورت میں اگر وہ امریکی فوج میں شامل ہوکرلڑیں تو وہ شریعت کی خلاف ورزی کریں گے اور اگر وہ اس سے انکار کریں تو وہ امریکی حلف کی خلاف ورزی کے مرتکب قرار پائیں گے۔

مسلمان اب تک یہاں عزت کے ساتھ رہ رہے تھے۔ مگر مجھے اندیشہ ہے کہ اب وہ یہاں بے عزت ہوجائیں گے۔ برطانیہ کے مسلمان سلمان رشدی کے معاملہ میں تخریب کا انداز اختیار کر کے برطانیہ میں حقیر ہو چکے ہیں۔ اب امریکہ کے مسلمانوں کے لئے بھی غالباً یہی مستقبل ان کا انتظار کر رہا ہے۔ لاقدراللہ۔

30 نومبر 1990

30 نومبر کو میں کیلی فورنیا امریکہ میں تھا۔ وہاں صغیر اسلم صاحب کی رہائش گاہ پرایک اجتماع ہوا۔ یہاں کی اصطلاح کے مطابق یہ اجتماعی کھانا (Potlunch) کی تقریب کے تحت تھا۔ کھانے کے بعد مجھ سے تقریر کی فرمائش کی گئی۔ میں نے کہا کہ موجودہ زمانہ میں مسلمانوں کا مسئلہ دشمنان اسلام کا مسئلہ نہیں۔ اس کی وجہ تمام ترمسلمانوں کی اپنی بے شعوری ہے ۔ اس سلسلہ میں مختلف تقابلی مثالیں دیں ۔ ان میں سے ایک مثال یہ تھی کہ رسول اللہ صلی اللہ علیہ وسلم نے بدر کے قیدیوں کے ذریعہ اسلام کا پہلا اسکول قائم کیا۔ حالانکہ یہ قیدی سب کے سب مشرک اور دشمن تھے ۔موجودہ زمانہ میں یہ حال ہے کہ نوبیل انعام یافتہ ڈاکٹر عبد السلام نے حکومت پاکستان کو یہ پیش کش کی کہ پاکستان میں اعلی سائنسی تعلیم کے لئے ادارہ قائم کیا جائے۔ اور وہ کم معاوضہ پر اس میں اپنی خدمت انجام دیں گے۔ مگر حکومت پاکستان نے اس پیش کش کو اس بنا پر ر دکر دیا کہ ڈاکٹر عبدالسلام قادیانی ہیں۔