September 1989

یکم ستمبر 1989

حیدر آباد کے حبیب محمد صاحب (حبیب بھائی) ملاقات کے لئے آئے ۔گفتگو کے دوران انھوں نے بتایا کہ 1979 میں وہ کپڑے کی ایک نمائش دیکھنے کے لئے ویسٹ جرمنی گئے تھے۔ وہاں وہ جرمنی کے شہر ہینوور (Hanover میں تھے۔ کار کے ڈرائیور سے انھوں نے ایک بار کہا کہ دوسری عالمی جنگ میں جرمنی کو بہت نقصان ہوا۔ سارابر باد ہوگیا۔ ڈرائیور نے کہا کہ بر بادی تو ضرور ہوئی مگر اس میں بھی تعمیرکا ایک پہلو تھا۔ کیوں کہ اس کے بعد ہم کو موقع ملاکہ ہم جرمنی کو ازسرنو زیادہ بہتر طور پر بناسکیں۔ اگر یہ بربادی نہ ہوتی تو نیا زیادہ بہتر جرمنی ہم نہ بنا پاتے۔

میں نے کہا کہ یہی معاملہ قوموں کا بھی ہے ۔ قومیں جب بربادی سے دوچار ہوتی ہیں تو ان کے لئے تعمیر حیات کا نیا امکان پیدا ہوتا ہے ۔ مثلا ہندستان کے مسلمان 1947 کے بعد بر بادی سے دوچار ہوۓ ۔ اس میں ان کے لئے نئی تعمیر کا امکان نکل آیا۔ اس بر بادی نے ان کی خوش فہیوں کے خیالی محل کو توڑ دیا اور انھیں اس قابل بنایا کہ وہ حقیقت کی زمین پر کھڑے ہو سکیں۔

2 ستمبر 1989

In prosperity, caution; in adversity, patience.

یہ بڑی حکمت کی بات ہے ۔ اگر آدمی اس حکیمانہ نصیحت کو اختیار کرلے تو دولت مندی اور مفلسی دونوں حالت میں وہ مطمئن اور کامیاب رہے گا۔ جب کہ اس کے برعکس روش آدمی کو دونوں حالتوں میں ناکام و نامرادبنادیتی ہے۔

3 ستمبر 1989

میں سمجھتا ہوں کہ مقبوضہ مسجدوں کو واگزار کرانے کی سب سے زیادہ آسان تدبیر یہ ہے کہ مسلمان اپنے قبضہ کے مندروں کو ازخود ہندووں کے حوالے کر دیں۔ اسی طرح مغل دور میں جن مندروں کو مسجدمیں تبدیل کیا گیا ہے، انھیں بھی از خود ہندوؤں کے حوالے کر دیا جائے ۔

4 ستمبر 1989

مولانا ابوالحسن علی ندوی کا اپنے بارہ میں یہ بیان ادھورا ہے۔ انہیں کہنا چاہئے کہ جن لوگوں سے مجھے شکایت نہ پیدا ہوئی ہے ، ان کے لئے میں اخلاقی ہوں ۔ مگر جن سے میری شکایت پیدا ہو جائے ان کے لئے میں سیاسی لیڈروں کی طرح ہو جاتا ہوں۔

5 ستمبر 1989

پاکستان کے روزنامہ نوائے وقت (28 اگست 1989) میں ایک عبرت ناک واقعہ شائع ہوا ہے۔ پاکستان کی دستور ساز اسمبلی نے 1949 میں قرار داد مقاصد پاس کی۔ اس کا اصل متن انگریزی میں تھا۔ مولانا شبیراحمدعثمانی نے اس کا اردو ترجمہ دیکھا تو وہ 'بے پناہ برہم'' ہوگئے۔

دوسرے دن صبح ہی صیح نماز کے بعد مولانا شبیراحمدعثمانی ،مولانا احتشام الحق تھانوی اور غالبامو لا نا ظفراحمد انصاری میرے پاس پہنچے۔ مولاناعثمانی کہنے لگے کہ اس قرار داد مقاصد میں ہمارے ساتھ بڑا دھوکا ہوا۔ آپ نے کیا کہا تھا اور کیا لکھا ہے۔ میں نے دیکھاتو ترجمہ غلط تھا۔ میں نے وہیں بیٹھ کر ترجمہ کیا تو مولاناعثمانی مطمئن ہو گئے۔"

یہی معاملہ ان دوسرے علماء کا تھاجوانڈین نیشنل کانگریس میں شریک تھے۔ کانگرس کی تمام کارروائیاں انگریزی زبان میں ہوتی تھیں، اور یہ علماء انگریزی جانتے نہ تھے ۔۔ اس لیے عجیب عجیب لطیفے پیش آتے تھے۔

وہ علماء جو انگریزی سے ناواقف تھے ، وہ ایسی تحریکوں میں کیوں شریک ہوئے جن کا سارا کام انگریزی زبان میں ہوتا تھا۔ یہ بات مجھے اتنی احمقانہ معلوم ہوتی ہے کہ میری سمجھ میں نہیں آتا کہ میں اس کی کیا توجیہ کروں۔ وہ اسلام بھی کیا عجیب ہوگا جو انگریزی سیاسی تحریکوں میں شرکت کو ضروری ٹھہرائے مگرانگریزی سیکھنا اس کے نزدیک ضروری نہ ہو۔

6 ستمبر 1989

7 ستمبر 1989

سلمان رشدی کے خلاف جھوٹا طوفان اٹھانے والے مسلمان اب تقریباً خاموش ہوگئے ہیں ۔ حالاں کہ اس طوفان میں یک طرفہ طور پر صرف مسلمانوں کا نقصان ہوا ہے۔ ان مظاہروں میں بہت سے مسلمان مارے گئے۔ بہت سی جائدادیں جلائی گئیں۔ مگر سلمان رشدی بدستور زنده موجود ہے۔ اب تک اس کی کتاب کی گیارہ لاکھ کاپیاں فروخت ہوچکی ہیں۔ اٹلی کے کتب فروشوں کی انجمن نے رشدی کی کتاب کو اس سال(89 - 1988 ) کی سب سے زیادہ بیچنے والی کتاب قرار دیا ہے۔

موجودہ زمانہ میں مسلمانوں کا عجیب حال ہے ۔ ان کا ہراقدام یک طرفہ طور پر ان کی اپنی بر بادی اور ہلاکت پر ختم ہو رہا ہے خواہ وہ سیداحمد شہید بریلوی کا اقدام ہو یاموجودہ زمانہ میں بابری مارچ اور سلمان رشدی کے خلاف احتجاج۔ ایسا تو نہیں کہ موجودہ مسلمان اللہ کی رحمت سے دور کر دے گئے ہوں۔

8 ستمبر 1989

یہی ذہن ہندستان کے تمام فرقہ وارانہ مسائل کی جڑ ہے۔ مسلمان ماضی کے حاکمانہ احساس کی بنا پر ہندوئوں کو حقیر سمجھتے ہیں اور غیر ضروری طور پر ان سے لڑنے کے لئے کھڑے ہوجاتے ہیں۔ اس کے برعکس ہندو ماضی کے احساس محکومی کی بنا پرمسلمانوں سے نفرت کرنے لگا ہے۔ معمولی اشتعال پر اس کا انتقامی جذبہ بھڑک اٹھتا ہے اور بے دردی کے ساتھ مسلمانوں کو مارنا پیٹنا شروع کر دیتا ہے۔

اس مسئلہ کوختم کرنے کے لئے مسلمانوں کو پہل کر نا چاہئے۔ انھیں مذکورہ قسم کی بول بولنا بالکل بند کر دینا چاہئے۔ ہندووں سے اپنے تعلقات کو محبت کے جذبہ کے تحت استوار کرنا چاہئے نہ کہ فخر کے جذبہ کے تحت۔

9 ستمبر 1989

میسور کے ٹیپوسلطان (1749ــ 1799) کا مقابلہ انگریزوں کے ساتھ پیش آیا۔ انھوں نے فرانس سے انگریزوں کے خلاف معاہدہ کرناچا ہامگر وہ فرانس کو اس پر راضی نہ کر سکے۔ اس کے بعد انھوں نے عرب، کا بل، قسطنطنیہ، ماریشس اپنے وفود بھیجے تاکہ ان سے فوجی تعاون حاصل کریں۔ مگر اس میں انھیں کامیابی نہیں ہوئی۔ اسی طرح ہندستان کی ریاستوں کو انھوں نے انگریزوں کے خلاف جنگ میں ملانے کی کوشش کی۔ مگر کوئی ریاست تیار نہیں ہوئی۔ آخر کار وہ تنہا انگریزوں سے لڑ گئے۔4 مئی 1799 کو سرنگاپٹنم میں انگریز کی گولی نے ان کا خاتمہ کر دیا۔ ٹیپو کا یہ قول بہت مشہور ہے : شیر کی ایک دن کی زندگی گیدڑ کی سوسال کی زندگی سے بہتر ہے۔"

جنوبی ہند میں حیدرہ آباد کے نظام نے ٹیپو سلطان کے برعکس طریقہ اختیارکیا ن۔ تیجہ یہ ہوا کہ وقتی مصالحت کی بنا پر انھیں یہ موقع ملا کہ وہ قیام ریاست 1768سے لے کر 1956 تک ہندستان کے اندر اور ہندستان کے باہرمسلمانوں اور اسلامی اداروں کی غیرمعمولی خدمت کرسکیں۔

ٹیپوسلطان کے مذکورہ قول کے مقابل میں مجھے زیادہ صحیح بات یہ معلوم ہوتی ہے کہ۔۔۔ ایک دن کے لئے " گیدڑ" بن جانا آدمی کو اس قابل بناتا ہے کہ وہ سو سال تک "شیر" بن کر رہ سکے۔

10 ستمبر 1989

ومشای لى سائلهم واسعى في حوائجـمفمنفعـلمثـ)

کسی قوم میں سچی سرداری یا سچی قیادت حاصل کرنے کا راستہ بلاشبہ یہی صحیح ترین طریقہ ہے ۔مگرموجودہ زمانہ میں پریس اور کمیونی کیشن کی ایجا دنے لوگوں کو موقع دے دیا ہے کہ وہ جھوٹے الفاظ بول کر لوگوں کے اوپرقائد بن جائیں۔ موجودہ زمانہ کےمسلمانوں میں کوئی سچالیڈر پیدا نہیں ہوا۔ البتہ ان کے درمیان جھوٹے لیڈروں کی اتنی کثرت ہے کہ ان کا شمار نہیں کیا جاسکتا۔

11 ستمبر 1989

1989 نہرو ایوارڈ

(Jawaharlal Nehru award for International understanding)

فلسطینی لیڈر یاسرعرفات کو دیا گیا ہے۔ اس پر ہندوستان کے ایک یہودی - جوا ہر حزقیل (Jawahar Ezekiel) کامراسلہ ٹائمس آف انڈیا(11 ستمبر1989) میں شائع ہوا ہے ۔ مراسلہ نگار نے غصہ کا اظہار کرتے ہوئے لکھا ہے :

To give this prestigious award to a man who has masterminded the birth

of international terrorism and has dedicated his life to the destruction

of the state of Israel is to devalue the award.

یہ اس قابل قدر انعام کو بے قدر کرنا ہے کہ اس کو ایک ایسے شخص کو دیا جائے جو بین اقوامی دہشت گردی کا موجد ہے اور جس نے اپنی زندگی کو ریاست اسرائیل کی تخریب کے لئے وقف کر رکھا ہے۔

یاسرعرفات کو نہرو انعام دینا مسلمانوں کے لئے خوشی کا باعث ہے اور یہود کے لئےغصہ کا باعث ۔ اس کی وجہ یہ ہے کہ دونوں فریق واقعات کو الگ الگ زاویہ سے دیکھتے ہیں۔ اس مثال سے "زاویۂ نظر "کے فرق کو سمجھا جاسکتا ہے۔

12 ستمبر 1989

اس سوال کا اس سے بہتر جواب نہیں ہوسکتا۔ حقیقت یہ ہے کہ ایسا کھانا بہتر کھا نا ہے۔ جوشخص اس طرح کھائے وہ نہایت سکون میں رہے گا ۔ مزید یہ کہ وہ بیماریوں سے محفوظ ہو جائے گا۔ اس کو ضرورت نہ ہوگی کہ وہ ڈاکٹروں اور حکیموں کے یہاں حاضری دے۔

13 ستمبر 1989

محمد داؤدخان ، افغانستان کے وزیر اعظم تھے۔ ،17جولائی 1973 کو انقلاب بر پا کر کے انھوں نے حکومت پر قبضہ کر لیا۔ ظاہر شاہ معزول ہوکر روم چلے گئے۔ اس وقت سے وہ وہیں جلا وطنی کی زندگی گزار رہے ہیں۔ 27 اپریل 1978 کر دوسرا انقلاب ہوا۔ داؤد خاں اوران کے بیشتر اہل خاندان قتل کر دے گئے ۔ اور حفیظ اللہ امین ملک کے حکمراں بن گئے۔ جوشخص روایت شکنی کرے ، وہ خود بھی بالآخر روایت شکنی کا شکار ہوتا ہے۔

افغانستان میں دوبارہ 1979 میں روس کی مدد سے مقامی کمیونسٹ پارٹی نے حکومت پر قبضہ کرلیا۔ اس کے بعد ایک لاکھ سے زیادہ روسی فوجی اس ملک میں داخل کر دئے گئے۔1988 میں اگرچہ روسی فوجیں واپس جاچکی ہیں ۔ مگرسوویت یونین اب بھی کابل حکومت کو 20 سے 30 کروڑ ڈالر مالیت کے ہتھیار فراہم کر رہا ہے۔ دوسری طرف امریکہ ۸۹-۱۹۸۸ میں دو ارب ڈالر کی مالیت کے ہتھیار حکومت کے مخالف گروپ ( مجاہدین) کو دے چکا ہے ۔

ان حالات میں بہترین قابل عمل بات یہ ہے کہ دونوں فریت ظاہر شاہ کی واپسی پر راضی ہو جائیں۔ ظاہر شاہ کو علامتی صدر ریاست بناکر منصفانہ الکشن کرایا جائے اور جو گروہ جیتے اس کو چار یا پانچ سال کے لئے حکومت کرنے کا موقع دے دیا جائے۔

14 ستمبر 1989

15 ستمبر 1989

ٹھیک یہی معاملہ اس ملک کے مسلم لیڈروں کا بھی ہے۔ وہ ''اسلام خطرہ میں'' اور ''مسلمان خطرہ میں'' کی گھنٹی بجا کر اپنی لیڈری قائم کئے ہوئے ہیں، موجودہ زمانہ میں مسلمانوں کی بربادی کی سب سے بڑی وجہ ان کے لیڈروں کا یہی استحصالی مزاج ہے۔

16 ستمبر 1989

" ہمارے اکثر ادیب انقلاب کا خوش آئند خواب اس طرح دیکھتے ہیں میں طرح کوئی عاشق اپنی محبوبہ کا تصور کر تا ہے ۔ ان کے لئے مزدور،کسان، سرمایه دار ، طبقاتی کش مکش، اور انقلاب کی وہی حیثیت ہے جو غزل گو شعراء کے لئے گل وبلبل ، ہجر و وصال ،ساقی و باده ، رقیب و محتسب وغیرہ کی" ( اردو ادب کے رجحانات پر ایک نظر )

موجودہ زمانہ کے وہ مسلمان جو اسلامی انقلاب کی باتیں کرتے ہیں ، وہ بھی اسی نوعیت کی ایک قسم ہیں۔ شاعروں اورادیبوں کے بعد یہ اس قسم کا تیسرا گروہ ہے ۔ تینوں یکساں طور پر رومانی تخیلات کی پیداوار ہیں۔ وہ اگر چہ الگ الگ الفاظ بولتے ہیں مگر بنیادی طور پران سب کی نوعیت ایک ہے ۔

17 ستمبر 1989

افغانستان سے روسی فو جیں واپس جا چکی ہیں۔ اس کے بعد افغان مجاہدین نے زبردست کوشش کی کہ وہ جلال آباد پرقبضہ کر لیں ۔ مگرمسلسل حملوں کے باوجودوہ مکمل طور پر ناکام رہے جب کہ ان حملوں پر ایک سال کی مدت گزر چکی ہے۔

افغانستان سے روسی فوجوں کی واپسی کو تمام مسلمان افغان مجاہدین کا کارنامہ بناتے رہے۔ اور اب جب کہ روسیوں کی واپسی کے باوجود یہ افغان مجاہدین ڈاکٹر نجیب اللہ کی کابل حکومت کے مقابلہ اس عاجز ثابت ہورہے ہیں تو اس کا الزام فور انھوں نے امریکہ کے سررکھ دیا۔ حالانکہ یہ الزام اگر صحیح ہو تو اس کے بعد یہ بھی ماننا ہو گا کہ اس سے پہلے افغان مجاہدین کی کامیابی تمام تر امریکی فوجی امداد کا کرشمہ تھی۔

18 ستمبر 1989

سردار سرجیت سنگھ لانبا(55 سال) سے ملاقات ہوئی۔ وہ علامہ اقبال کے عاشق ہیں۔ اقبال کے اکثر اشعار ان کو زبانی یاد ہیں ۔ اقبال کے بارہ میں بہت زیادہ معلومات رکھتے ہیں۔ وہ 1947میں پاکستانی پنجاب سے ہندستان آۓ۔

علم الدین پرقتل کا مقدمہ چلا اور اس کو پھانسی ہوگئی۔ اقبال کو معلوم ہو کہ علم الدین کو پھانسی ہوئی ہے تو انھوں نے اپنی مادری زبان پنجابی میں کہا:

اسیں گلاں کر دے رہ گئے ، تر کھانا دا منڈا بازی لے گیا

یعنی ہم سب باتیں ہی کرتے رہے ، بڑھئی کالڑ کا بازی لے گیا۔

19 ستمبر 1989

20 ستمبر 1989

فقہ اورفتاوی کی کتابوں میں اس قسم کے بے شمار مسائل ہیں۔ مگروہ سب کے سب لغویت کی حد تک غلط ہیں ۔ جن چیزوں کو خدا اور رسول نے حرام نہ کہا ہو، ان کو حرام کہنا ایسی جسارت ہے جس کے لئے دین میں کوئی گنجائش نہیں۔ صحابہ وتابعین کے زمانہ میں اس طرح حرام وحلال کی میں نہیں کی جاتی تھیں۔ بعد کے علما ہر معاملہ میں حرام وحلال کی بحثیں کرنے لگے۔ یہ عین وہی غلطی ہے جس میں یہود مبتلا ہوئے۔

21 ستمبر 1989

چودھری دیوی لال ہریانہ کے چیف منسٹر ہیں۔ وہ 25 ستمبر 1914کو پیدا ہوۓ ۔ اس مناسبت سے 25ستمبر کو ان کے بارہ میں ایک کتاب چھاپی جارہی ہے۔ ان کے ایک ساتھی مسٹروسیم احمد (3011055) میرے پاس آئے اور بار بارٹیلی فون پر تقاضا کیا کہ میں اس کتاب کے لئے ایک پیغام لکھ کردے دوں۔ پہلے میں نے معذرت کی ،آخران کے اصرار پر حسب ذیل تحریر لکھ کر دے دی۔

چو دھری دیوی لال 1914 میں پیدا ہوئے۔ ان کی اصل زبان اردو ہے۔ وہ اردو ہی میں اپنا تمام لکھنے پڑھنے کا کام کرتے ہیں۔ اس طرح چودھری دیوی لال کا یوم پیدائش ہندستان کی تاریخ کے ایک اہم باب کو بتاتا ہے ۔ وہ اس قیمتی زمانہ کی یاد دلاتا ہے جب کہ اس ملک کی عام زبان اردو تھی۔ سب لوگ اردو میں لکھتے اور بولتے تھے، خواہ وہ ایک فرقہ کے ہوں یا دوسرے فرقہ کے۔

دیوی لال جیسے لوگوں کی موجودگی بتاتی ہے کہ اس ماضی کا تسلسل ابھی ملک میں باقی ہے ۔ میری تمنا ہے کہ یہ تسلسل مزید باقی رہے ۔ یہاں تک کہ تاریخ اپنے آپ کو دہرائے۔ ماضی اور حال کے سرے دوبارہ مل کر نیا مستقبل پیدا کرنے کا ذریعہ بن جائیں۔

22 ستمبر 1989

پاکستان کے مشہور اخبار نوائے وقت کے زیراہتمام شعبہ ایوان وقت (کراچی) میں ایک مجلس مذاکرہ منعقد ہوئی۔ اس کا موضوع تھا ،:نظریہ پاکستان اور آج کاپاکستان ـــــ ہم سے کیا غلطیاں سرزد ہوئیں۔" اس موقع پر جو تقریر یں ہوئیں وہ نوائے وقت کی خصوصی اشاعت (15 ستمبر1989) میں شائع ہوئی ہیں۔ ایک تقریر کا جلی عنوان یہ ہے : نظریۂ پاکستان اب صرف نعرہ بن کر رہ گیا ہے۔

اس عنوان میں میں صرف ایک معمولی لفظی ترمیم کروں گا ''نظریہ پاکستان صرف ایک نعرہ تھا۔'' مجھے تعجب ہے کہ پاکستان کے تمام اسلام پسند اور اسلامی مفکریننصف صدی سے ایک جھوٹے لفظ میں جی رہے ہیں ، اور وہ "نظریہ پاکستان کالفظ ہے ۔مگرحقیقت یہ ہے کہ نظریہ پاکستان کا کہیں کوئی وجود نہیں۔ جس چیز کا وجود تھا یاہے وہ صرف 'نعرہ پاکستان 'ہے۔

سیاسی لیڈر ہمیشہ یہی کرتے ہیں کہ وہ نعرہ کو نظریہ کے روپ میں پیش کرتے ہیں ۔چنانچہ نام نہاد نظریہ پاکستان کی طرح ہر تحریک کا ایک نظریہ رہا ہے۔ مثلا گاندھی کا ایک نظریہ ہند تھا، شیخ مجیب کا ایک نظریہ بنگلہ دیش تھا، وغیرہ ۔ مگر اس طرح کے نظریات سے صرف سیاسی تبدیلیاں ہوا کرتی ہیں۔ ان کے ذریعہ کبھی کوئی سماجی نظام نہیں بنتا ۔یہی وجہ ہے کہ نظریہ ہند اور نظریہ بنگلہ دیش کی طرح نظریۂ پاکستان بھی سراسرنا کام ثابت ہوا۔

23 ستمبر 1989

کچھ اہل حدیث حضرات ملاقات کے لئے آئے ۔انھوں نے کہا کہ ہم الرسالہ کے قاری ہیں ۔ مگر آپ اپنے رسالہ میں فقہی مسائل پر کچھ نہیں لکھتے۔ ان کا مطلب یہ تھا کہ رفع یدین اور آمین بالجہر اور آمین بالسر جیسے مسائل پر الرسالہ میں کچھ نہیں ہوتا۔

24 ستمبر 1989

25 ستمبر 1989

26 ستمبر 1989

کچھ مسلمان ملاقات کے لئے آئے۔ ان سے گفتگو کرتے ہوئے میں نے کہا کہ موجو دہ زمانہ کے مسلمان لیڈر ،خواہ وہ داڑھی والے ہوں یا ہے داڑھی والے ۔ سب کے سب اپوزیشن کی بولی بولتے ہیں ۔ ان میں سے کوئی بھی نہیں جو خدا و رسول کی بولی بولنا جانتا ہو۔

27 ستمبر 1989

28 ستمبر 1989

کافرکی یہ تعریف کہ آفاق میں گم ہے مومن کی یہ تعریف کہ گم اس میں ہے آفاق

اقبال نے جب اپنا یہ شعر مسلمانوں کے سامنے پیش کیا تو ہرطرف واہ واہ کی دھوم مچ گئی۔ فوراً ہی اقبال مسلمانوں کے مقبول ترین شاعر بن گئے ۔ اس کے برعکس اگر آپ مسلمانوں کے سامنے یہ کہیں کہ کا فراللہ سے نہیں ڈرتا ، مومن وہ ہے جو اللہ سے ڈرے تو کسی طرف سے بھی واہ وا کاشور بلند نہیں ہوگا۔ اس کی وجہ یہ ہے کہ مذکورہ شعر فخر پر مبنی ہے اور دوسرا جملہ تواضع پر۔ پر فخر کلمات پر واہ وا بلند کی جاسکتی ہے مگر تواضع کے الفاظ پر واہ وا کا شور بلند ہونے کے کوئی معنی نہیں ۔

اس مثال سے اندازہ ہوتا ہے کہ تعمیرذ ہن کیا ہے، اور موجودہ زمانہ میں مسلم رہنماؤں نے جو کچھ کیا وہ کیوں تعمیرذ ہن کی کوشش نہ تھی ۔ یہ رہنما اپنے اشعار اور تقریروں اور انشا پردازانہ مضامین میں مذکورہ شعر جیسی باتیں کرتے رہے ہیں۔ یہ باتیں مسلمانوں کے اندر فخر کی نفسیات ابھارتي رہیں۔ مگرفخر کی نفسیات ابھارنے کا نام ذہنی تربیت نہیں۔ ذہنی تربیت یہ ہے کہ آدمی کے اندر تواضع سنجیدگی اور حقیقت پسندی کا مزاج پیدا کیا جائے ، اور وہ موجودہ رہنماؤں نے کیا ہی نہیں۔

29 ستمبر 1989

ہندستان میں فیملی پلاننگ پر اربوں روپے خرچ کئے جا رہے ہیں، پہلے حکومت کا نعرہ تھا:: دو یا تین بس۔ اس کے بعد نعدہ دیا گیا: ہم دو ہمارے دو۔ موجودہ نعرہ ہے: ایک میں انیک۔ آخری نعرہ غالبا یہ ہوگا کہ ایک یا کوئی نہیں:

One or None

اس طرح حکومت یہ تاثر دے رہی ہے کہ اس ملک کا اصل مسئلہ یہاں کی بڑھتی ہوئی آبادی ہے۔ مگر یہ مغالطہ ہے۔ اس ملک کا اصل مسئلہ خود حکومت کا کرپشن ہے ۔حکومت میں نیچے سے اوپر تک کرپشن بھرشٹاچار اپنی آخری حد تک پھیل چکا ہے۔ اس ملک کے مسائل صرف اس وقت ختم ہوں گے جب کہ اس ملک سے کرپشن کا خاتمہ کیا جائے۔ ورنہ آبادی گھٹتے گھٹتے اتنی کم ہو کہ یہاں صرف دو آدمی رہ جائیں تو وہ بھی اپنے بگڑے ہوئے مزاج کے تحت فساد کے سوا کوئی اور کارنامہ انجام نہیں دے ئیں گے۔

30 ستمبر 1989

20 ستمبرکو میں ٹرانزٹ پسنجر کے طور پر کراچی میں تھا۔ وہاں میری ملاقات ایک تاجر سے ہوئی ۔ انھوں نے کہا کہ ہندستان کے مقابلہ میں پاکستان بہت چھوٹا ملک ہے۔ اس کے نتیجہ میں ہمارے تجارتی مواقع بہت کم ہیں کیوں کہ ہمیں اپنی پیدا وار کو فروخت کرنے کے لئے مقابلتہ بہت چھوٹا مارکیٹ ملتا ہے ۔ اس کے بجائے ہندستان میں تجارتی مواقع بہت زیادہ ہیں ۔ کیوں کہ وہاں ایک صنعت کار کے لئے بہت بڑا مارکیٹ موجود ہے۔

مسلم رہنماؤں کے اندر اگر دعوتی ذہن ہوتا تو یہی بات وہ دعوتی اعتبارسے سوچتے ۔ ہندستان کی تقسیم نے ملک کو تین حصوں میں بانٹ دیا۔ اور اگر پورے برٹش انڈیا کو لیا جائے تو تو تقریبا دس ملکوں میں انڈیا ، پاکستان ، بنگلہ دیش، نیپال، بھوٹان، تبت ، سری لنکا وغیرہ ۔ اس کے نتیجہ میں دعوتی میدان محدود ہوگیا۔ اگر ملک تقسیم نہ کرایا جاتا ، تو پورا برصغیر ہند ایک ملک ہوتا اور پھر ہم کو ایک وسیع بر اعظم میں دعوتی کام کے مواقع بلا روک ٹوک حاصل رہتے۔ مسلم لیڈروں میں دعوت کا اتنابھی درد نہ تھا جتنا ایک تاجر کے اندر اپنی تجارت کے لئے ہو تا ہے ۔ وہ کوئی نیا دعوتی میدان تو پیدا نہ کر سکے ۔ البتہ جو دعوتی میدان ان کی کوششوں کے بغیر اپنے آپ موجو دتھا ، اس کو بھی انھوں نے بر با دکر ڈالا ۔