May 1984

8 مئی 1984

ایک صاحب سے ملاقات ہوئی۔ گفتگو کے دوران انھوں نے ایک مشہور عالم کا نام لے کر کہا کہ آپ اکثر ان کے اوپرتنقید کرتے ہیں۔ کیا ان کی سب کتابیں غلط ہیں۔ کیا انھوں نے سب غلط باتیں ہی کہی ہیں۔ میں نے کہا کہ ایسا کوئی غلط کار دنیا میں پایا نہیں جاتا جس کی سب باتیں غلط ہوں ۔ حقیقت یہ ہے کہ غلط وہ ہے جو صحیح میں غلط کو ملائے نہ کہ وہ جوصد فی صد غلط بات کہے۔ کیوں کہ ایسے غلط کار کا تو کوئی وجود ہی نہیں۔

23 مئی 1984

It is the end that crowns us, not the fight.

موجودہ زمانہ کے مسلمانوں کا معاملہ اس مقولہ کے بالکل برعکس ہے۔ وہ مسلسل بے نتیجہ لڑائی لڑ رہے ہیں اور یک طرفہ طور پر بربادی اور ہلاکت سے دوچار ہوتے ہیں ۔ مگر ان میں کوئی نہیں جو ان لڑائیوں کو انجام کے اعتبار سے جانچے۔ وہ صرف ایک بات جانتے ہیں۔ اپنی جھوٹی لڑائیوں کو قربانی کے خانہ میں ڈال کر فخر کرتے رہنا۔