March 1984

27 مارچ 1984

زندگی کی محرومیاں غیرمومن کے لئے صرف اس کی مایوسی میں اضافہ کرتی ہیں۔ لیکن اگر آدمی کے اندر مومنانہ شعور زندہ ہو تو اس کی محرومیاں اس کو اپنی عاجزانہ حیثیت کی یاد دلانے والی بن جاتی ہیں۔ وہ اس کی عبدیت کے احساس کو تازہ کر کے اس کو مزید شدت کے ساتھ خدا کی طرف متوجہ کر دیتی ہیں ۔ اسی کے ساتھ محرومیوں کے ذریعہ آدمی کے دل میں درد وسوزکی کیفیت پیدا ہوتی ہے وہ اس قابل ہو جاتا ہے کہ الحاح و اخبات کے ساتھ اپنے رب سے دعا کرسکے۔

محرومیاں آدمی کے اندر بے حسی کے برف کو توڑتی ہیں۔ وہ اس کی آنکھوں سے آنسووں کا سیلاب بہاتی ہیں جوخدا کی رحمت کو سب سے زیادہ کھینچنے والا ہے۔

اس اعتبار سے دیکھئے تو دنیا کی محرومی آخرت کی یافت ہے کیوں کہ وہ آدمی کو جنت کی طرف لے جانے والی ہے۔ یہ بلاشبہ جنت کی بہت ارزاں قیمت ہے کہ آدمی دنیا کی کچھ معمولی چیزوں کو کھو کر آخرت کی اگلی چیزوں کو پالے ۔