November 1984

یکم نومبر 1984

جدید تحقیقات سے معلوم ہوا ہے کہ چڑیاں اور مچھلی وغیرہ موسمی حالات کا پیشگی اندازہ کر لیتی ہیں۔ ان کے اندر پیدائشی طور پر ایک نظام ہوتا ہے جس کوموجودہ زمانہ کے سائنسداں حیاتیاتی گھڑی (Biological Clock) کہتے ہیں۔ جب بھی کوئی موسمی تبدیلی ہونے والی ہوتی ہے تو چڑیوں اور مچھلیوں کو ان کا پیشگی اندازہ ہو جاتا ہے اور وہ اس سے بچاؤ کا انتظام کرلیتی ہیں۔

نپولین کی فوجیں 1812ء میں روس کی سرحد پر برف باری سے تباہ ہوگئیں ۔ یہی حال ہٹلر کی فوجوں کا ہوا جب کہ وہ 1941 میں اسٹالن گراڈ تک پہنچ گئی تھیں مگرشدید برف باری کے نتیجہ میں ہلاک ہوکر رہ گئیں ۔

کیسی عجیب بات ہے کہ نپولین اور ہٹلر کی فوجوں کو روس کی برفباری کا پیشگی اندازہ نہ ہوسکا۔ اور اسی روس میں سائبریا کی چڑیوں کا یہ حال ہے کہ وہ برف کے موسم کا پیشگی اندازہ کر کے وقت سے پہلے سائبریا سے روانہ ہو جاتی ہیں اور لمبی اڑان کے بعد گرم علاقوں (ہندستان ، افریقہ وغیرہ ) چلی جاتی ہیں۔

کیا یہ اس بات کا ثبوت نہیں کہ یہاں " نپولین“ اور” ہٹلر" سے بھی زیادہ بڑا ایک جاننے والا ہے جو اپنے علم محیط کے تحت چڑیوں کو وہ باتیں بتا دیتا ہے جو چڑیاں خود سے نہیں جان سکیں۔

2 نومبر 1984

کمپیوٹر ایک برقی مشین (Electric Device) ہے ۔ کمپیوٹر اپنے دائرہ میں اس کام کو مشینی انداز میں کرتا ہے جس کو انسانی دماغ ذاتی قسم کے تحت کرتا ہے۔ فرق یہ ہے کہ کمپیوٹر کی رفتار بہت زیادہ تیز ہوتی ہے۔ کمپیوٹر کے اندر مختلف معلومات "مشینی زبان" کی صورت میں ذخیرہ کر دی جاتی ہیں ۔ ان کو پرو گریمنگ لینگویج یا مشین لینگویج کہا جاسکتا ہے۔

کمپیوٹر ان کا تجزیہ کر کے نیتجہ سنا دیتا ہے ۔ اس عمل کو پروگرامنگ کہا جاتا ہے۔ جیسے کسی چوکیدارکو بتایا جائے کہ کوئی آدمی آۓ ، وہ اجنبی ہو اور بے وقت آیا ہو، اس کے پاس ہتھیار ہو، وہ دروازہ کا تالا توڑ لگے تو سمجھنا کہ وہ ڈاکو ہے اور فورا الارم بجا دینا۔ اس قسم کی باتوں کو کمپیوٹر کے اندر اعداد یا کوڈ کی صورت میں بھر دیا جاتا ہے۔ کمپیوٹر کے اندر اس قسم کی باتیں کروروں کی تعداد میں بھری جا سکتی ہیں ۔ اور وہ سکنڈوں میں ان کا تجزیہ کر کے اس کے نیتجے کو اسکرین پر ظاہر کر دیتا ہے ۔

کمپیوٹر کے مشینی دماغ کو وجود میں لانے کے لئے ایک انسانی دماغ کی ضرورت ہوتی ہے۔ پھر وہ کون ہے جو انسانی دماغ جیسی پیچیدہ ترمشین کو وجود میں لایا ہے۔

3 نومبر 1984

فلعنة ربنا اعداد رمل على من رد قول ابى حنيفة

یعنی اس شخص پر ریت کے ذروں کے برابر خدا کی لعنت ہو جو ابوحنیفہ کے قول کا انکار کرے ۔

4 نومبر 1984

اس آیت کو وقت نزول کی عملی صورت حال میں رکھ کر دیکھئے ۔ اس وقت ایک طرف حضرت مسیح اور حضرت موسی جیسے پیغمبر تھے جن کو عیسائی اور یہودی مان رہے تھے اور مسلمان بھی ان پر ایمان لائے ہوئے تھے ۔ دوسری طرف پیغمبر اسلام (محمد بن عبداللہ) تھے جن کومسلمانوں نے مانا تھا۔ مگر یہودیوں اور عیسائیوں نے ان کا انکار کر دیا تھا۔

ان دونوں پیغمبروں میں کیا فرق تھا جس کی وجہ سے یہ فرق واقع ہوا۔ وہ یہ تھا کہ مسیح اور موسی ماضی کے پیغمبر تھے اور محمد حال کے پیغمبر ۔ مسیح اور موسیٰ کی پیغمبرانہ حیثیت بھی تاریخ کے ذریعہ مسلم ہو چکی تھی ۔ اس کے برعکس محمد بن عبد اللہ اپنی تاریخ کے ابتدائی دور میں تھے۔ اور ان کے ساتھ وہ اسباب و واقعات جمع نہیں ہوئے تھے جوکسی شخصیت کو مسلم شخصیت بنا دیتے ہیں۔

5 نومبر 1984

ساتویں صدی عیسوی کے آغاز میں جب اسلام مکہ سے نکالا جارہا تھا ، عین اسی وقت وہ یثرب (مدینہ) میں اپنی جگہ بنا رہا تھا۔ 13 ویں صدی عیسوی (1258ء) میں مغل قبائل نے بغداد کو تباہ کر کے عباسی سلطنت کو خون میں غرق کر دیا مگر اسی زمانہ میں اسلام جزیره سماترا اور جزائر ملایا میں اپنا فاتحانہ سفر (بذریعہ دعوت) شروع کر رہا تھا۔

اسلام کی دعوتی قوت کا یہ حیرت انگیز کرشمہ ہے۔ تاریخ نے بار بار ثابت کیا ہے کہ اسلام کے پاس جب مادی قوت باقی نہ ہو اس وقت بھی دعوت کی ناقابل تسخیرقوت اس کے پاس موجود ہوتی ہے ۔ وہ تلوار کو کھو کر دعوت وتبلیغ کے ذریعہ اپنا سفر شروع کر دیتا ہے۔ یثرب سے لے کر ملیشیا تک کی تاریخ یہی سبق دے رہی ہے ۔

6 نومبر 1984

اس حقیقت کی روشنی میں دیکھئے تو وہ تمام تحریکیں غیر قرآنی قرار پاتی ہیں جنھوں نے کسی غیر خدا کو مسلم مسلئہ کا سبب قرار دے کر اس کے خلاف ہنگامہ آرائی کی ۔ تکمیل دین کی مذکورہ آیت سے مسلمانوں نے فخر کی غذا تو لی مگر انھوں نے اس سے سبق کی غذا نہیں لی۔ ایک طرف مسلمان اس آیت کی بنیادپر یہ کہتے ہیں کہ ہمارا دین دین کامل ہے ۔ اور عین اسی وقت وہ دوسری قوموں کو اپنی بربادی کا سبب قرار دے کر ان کے خلاف چیخ پکار کی مہم چلاتے ہیں ۔ حالانکہ یہ دونوں چیزیں ایک دوسرے کی ضد ہیں۔

8 نومبر 1984

انھوں نے کہا :

ہمارے ساتھ وہ آئے جو گھرکو آگ لگائے ...."

اسی حقیقت کو کبیر داس نے ان الفاظ میں کہا ہے :

کبرا کھڑا بجار میں لئے لو اٹھا ہاتھ

جو گھر جارے اپنا چلے ہمارے ساتھ

یہ ایک حقیقت ہے کہ اپنی ذات کی قربانی ہی پر قوم کی تعمیر ہوتی ہے۔ دنیا کے مفاد کو خطرہ میں ڈالنے کے بعد ہی ممکن ہوتا ہے کہ آدمی کے لئے آخرت کے مفادات محفوظ ہو جائیں۔

9 نومبر 1984

غلطی کرنا غلطی نہیں ، غلطی کو نہ ماننا غلطی ہے ۔ اچھا کام کرنا اچھا نہیں۔ اچھا یہ ہے کہ آپ اچھا کام کریں اور پھر بھی یہ سمجھیں کہ آپ نے کچھ نہیں کیا ۔

10 نومبر 1984

آج یہ حال ہے کہ لوگ ایک دوسرے کے بارہ میں غیر جانبدار بنے رہتے ہیں۔ کوئی شخص خالص حق و انصاف کی خاطر کسی کا ساتھ دینے کے لئے تیار نہیں ہوتا ۔

کوئی آدمی کسی کا ساتھ دینے کے لئے اگر کھڑا ہوتا ہے تو صرف وہاں کھڑا ہوتا ہے جہاں ایسا کرنے سے اس کی قیادت چمکتی ہو ۔ جہاں دوسرے کا ساتھ دینے میں خود اپنا کوئی مفاد وابستہ ہو۔ جہاں آدمی کی قومی حمیت بھڑک اٹھی ہو اور قومی جذبہ کے تحت وہ کسی معاملہ میں کود پڑے۔ کسی شخص کی حقیقی مدد کے لئے کوئی متحرک نہیں ہوتا۔

لوگ احتساب عالم کے نعرے لگاتے ہیں۔ مگر احتساب فرد ان کی فہرست سے خارج ہے۔اس قسم کا احتساب صرف لفظوں سے کھیلنا ہے نہ کہ حقیقی معنوں میں خدائی حکم پر عمل کرنا۔

11 نومبر 1984

یہ دنیا مسائل و مشکلات کی دنیا ہے ۔ یہاں نیک لوگوں کو بھی مسائل پیش آتے ہیں، وہ بھی مشکلات میں پھنستے ہیں۔ اس طرح اس دنیا میں برے لوگوں کو بھی مسائل پیش آتے ہیں اور وہ بھی مشکلات سے دوچار ہوتے ہیں ۔ مگر دونوں فریقوں میں ایک بہت بڑا فرق ہے۔ فریق اول کے مسائل جن اسباب سے پیدا ہوتے ہیں وہ اس سے بالکل مختلف ہوتے ہیں جو فریق ثانی کے لئے مسائل پیدا کرنے کا باعث بنتے ہیں۔

فریق اول کے مسائل اس کی اصول پسندی ، اظہار حق اور غیرمصالحانہ رویہ کی بنا پر ہوتے ہیں ۔ اس کے برعکس فریق ثانی کے مسائل پیدا کرنے کا سبب ہوتا ہے ۔ حسد،کبر،خود غرضی ، سرکشی، عدم اعتراف ۔ اول الذکر کا سرچشمہ خدا کا خوف ہوتا ہے اور ثانی الذکر کا سرچشمہ خدا سے بے خوفی ۔

12 نومبر 1984

اگر اعلی ایمان یہ ہوتا کہ جب دشمن سے مقابلہ پیش آئے تو ہر حال میں لوگ مقابلہ پر جمے رہیں تو ہجرت حبشہ اور ہجرت مدینہ دونوں فرار بن کر رہ جاتے ہیں نہ کہ کوئی اعلی دینی عمل۔

13 نومبر 1984

خوش نامی اور بدنامی کی حقیقت ایک لفظ میں یہ ہے ۔ بے اصول آدمی سے ہر ایک خوش رہتا ہے ، اور با اصول آدمی سے ہر ایک ناخوش ۔

علی گڑھ مسلم یونیورسٹی میں جو شخص بھی وائس چانسلر ہو کر جاتا ہے وہ تھوڑے دنوں کے بعد بدنام ہو جاتا ہے ۔ اس کی وجہ یہ ہے کہ وہ جب بھی کوئی اصلاح کرنا چاہتا ہے تو وہ تمام لوگ چیخ پڑتے ہیں جن پراس کی زد پڑ رہی ہوتی ہے ۔ وہ فوراً "اسلام خطرہ میں" کا جھنڈا لے کر کھڑے ہو جاتے ہیں۔ وہ اپنی ذاتی شکایت کو ملی مسئلہ بنا کر وائس چانسلر کو بد نام کرنے اور اس کو اکھاڑنے کی مہم جاری کر دیتے ہیں ۔

اس میں غالبا صرف ایک استثناء ہے اور وہ پروفیسر خسرو کا ہے ۔ ان کا اصول غالبا یہ تھا کہ ادارہ کو اس کے حال پر چھوڑ دو اور اپنا ٹرم پورا کرو ۔ ان کے طریق کار کے بارہ میں ایک لطیفہ مشہور ہے۔ طلبہ کا ایک وفد ان سے ملاقات کے لئے آیا اور اپنے کچھ مطالبے پیش کئے۔ پروفیسر خسرو نے طلبہ سے اتفاق کیا ۔ اور کہا کہ آپ لوگ بالکل ٹھیک کہہ رہے ہیں۔ وہ لوگ خوش ہوکر چلے گئے ۔ اس کے بعد ان کا مخالف گروپ آیا اور اس نے بالکل متضاد مطالبہ پیش کیا۔ پروفیسر خسرو نے ان سے بھی اتفاق کیا اور کہا کہ آپ لوگ بالکل ٹھیک کہہ رہے ہیں ۔

پروفیسر خسرو کی بیگم یہ دونوں باتیں سن رہی تھیں جب دوسرا گروپ بھی چلا گیا تو انھوں نے پروفیسر خسرو سے کہا کہ آپ نے پہلے وفد کو بھی ٹھیک کہا اور دوسرے وفد کو بھی ، حالانکہ دونوں کے مطالبات بالکل ایک دوسرے سے مختلف تھے۔ پروفیسرخسرو نے سنجیدگی کے ساتھ جواب دیا :

بیگم ، آپ بھی ٹھیک کہہ رہی ہیں۔

پروفیسر کا یہ لطیفہ علی گڑھ کے ایک صاحب نے مجھے بتایا۔

14 نومبر 1984

علامہ اقبال (1877 -1938 ) نے جب اپنی زندگی شروع کی تو وہ مسلمانوں کے بارہ میں بہت اعلی امیدیں رکھتے تھے ۔ وہ سمجھتے تھے کہ ان کی " بانگ درا " اس سوئے ہوئے شیر کو جگا دے گی۔ اور وہ اٹھ کر سارے زمین و آسمان کو بدل ڈالے گا۔ اپنے ابتدائی زمانہ میں انھوں نے کہا :

نہیں ہے ناامید اقبال اپنی کشت ویراں سے ذرا نم ہو تو یہ مٹی بہت زرخیز ہے ساقی

حالات نے اقبال کا ساتھ دیا اور اپنی زندگی ہی میں اقبال کو غیرمعمولی شہرت و مقبولیت حاصل ہوئی۔ اقبال کے اشعار پوری امت کی زبان پر نغمہ ملت بن کر گونجنے لگے۔ مگرعملی اعتبار سے نتیجہ بالکل صفر رہا ۔ مثلا اقبال نے لاہور میں "تبلیغی کالج" قائم کیا۔ اس میں طلبہ کو ایسا نصاب پڑھایا جاتا تھا کہ اس سے فارغ ہو کر وہ داعی اور مبلغ بن سکیں۔ اقبال نے خیال کیا تھا کہ تبلیغی کالج کے فارغ شدہ طلبہ کو مسلم ادارے اپنے یہاں معقول مشاہرہ پر رکھ لیں گے اور وہ مسلم اداروں کی کفالت پر ملک میں تبلیغ و دعوت کا کام انجام دیں گے۔ مگر جب تبلیغی کالج سے فارغ شدہ لوگ نکلے تو کوئی ادارہ ان کو قبول کرنے کے لئے تیار نہیں ہوا۔ چنانچہ پہلے بیچ کے بعد اس میں داخلے بند ہوگئے اور کالج ٹوٹ گیا۔

اس طرح کے بہت سے ناکام تجربے ہوئے جس کے نتیجہ میں اقبال کی امیدیں مایوسی میں تبدیل ہوگئیں ۔ جس اقبال نے ابتداء مذکورہ بالا شعر کہا تھا، اس نے اپنی آخری عمر میں یہ اعتراف کیا:

تیرے محیط میں کہیں گوہر زندگی نہیں

ڈھونڈ چکا میں موج موج دیکھ چکا صدف صدف

یہی واقعہ موجودہ زمانہ کے اکثر مصلحین اور رہنماؤں کے ساتھ پیش آیا ہے۔ اس سے ثابت ہوتا ہے کہ مسلمان اب ایک زوال یافتہ قوم ہو چکے ہیں ۔ ان کے اندر وہ اعلیٰ صفات مر چکی ہیں جو جوہرانسانیت ہیں۔ اس لئے اب اسلام کے احیاء کی واحد صورت یہ ہے کہ غیرمسلموں میں بڑے پیمانہ پر دعوتی کام کیا جائے ۔ اب غیر قوموں ہی سے یہ امید کی جاسکتی ہے کہ ان کے اندرسے ایسے جاندار لوگ نکلیں جو موجودہ زمانہ میں اسلام کے حامل بن سکیں۔

15 نومبر 1984

The only thing wrong with architecture is architects.

Frank Lloyd Wright

یہ ایک حقیقت ہے کہ کسی تعمیرکا اچھا یا برا ہونا اس کے معماروں پرمنحصر ہے معمار اگر اچھے ہیں تو تعمیر اچھی ہوگی، معمار اگر برے ہیں تو تعمیر بھی اسی نسبت سے بری ہو جائے گی۔

یہی حال قوم کا بھی ہے ۔ قوم اگر عمارت ہے تو اس کے لیڈر اس کے معمار ہیں ۔ وہ قوم خوش قسمت ہے جس کو سنجیدہ اور دانش مند لیڈر مل جائیں۔ ایسے لوگ قوم کو آگے کی طرف لے جائیں گے۔ اور جس قوم کے لیڈر سطحی، نادان اور غیر سنجیدہ ہوں وہ قوم کو بربادی کے گڑھے میں گرانے کے سوا کچھ اور نہیں کرسکتے۔

16 نومبر 1984

حالی اب آؤ پیروی مغربی کریں

یہی بات مشہور عرب شاعرحافظ بک ابراہیم نے ان لفظوں میں کہی :

ليتنا نقتدى بكم او نجاريكم عسى نسترد ما كان ضاعا

(اے اہل مغرب) کاش ہم تمہاری پیروی کرتے یا تم سے قریب ہوتے تو ممکن تھا کہ ہر وہ چیز دوبارہ حاصل کر لیں جس کو ہم نے کھو دیا ہے ۔

دوسرا ذہن ردعمل کا ذہن تھا۔ مغربی قوموں نے چونکہ مسلمانوں سے ان کی عظمت چھینی تھی اس لئے یہ لوگ مغرب کے خلاف بگڑ کر ان سے لڑنے کے لئے کھڑے ہوگئے۔

یہ دونوں ہی ذہن غلط تھا ۔ کرنے کا اصل کام تھا کہ مسلمانوں کو دوبارہ زندہ اورمستحکم بنایا جائے ۔ مگر دور جدید میں اس قسم کے مصالحین اتنے کم ہیں کہ وہ کسی شمار میں نہیں آتے۔

17 نومبر 1984

18 نومبر 1984

یہودیوں ( بنو قریظہ ) نے بھی حئی بن اخطب کی بات نہ مانی مگر اس سے بھی زیادہ عجیب بات یہ ہے کہ خود حی بن اخطب بھی اس کے باوجود یہودیوں سے الگ نہیں ہوا ۔ وہ ان کے ساتھ شامل رہا۔ یہاں تک کہ دوسرے یہودیوں کے ساتھ وہ بھی قتل کر دیا گیا۔

19 نومبر 1984

Things are good or evil only in relation to pleasure or pain.

میں رب المشرقین والمغربین کی درس گاہ کا تعلیم یافتہ ہوں۔

اسی طرح مختلف لوگوں نے اپنے علم اور اپنی تعلیم کے بارہ میں مختلف حوالے دئے ہیں مگر میرے نزدیک یہ تمام جوابات ناکافی ہیں۔ میں سمجھتا ہوں کہ کچھ علوم وہ ہیں جو درد کی درس گاہ میں پڑھائے جاتے ہیں۔ اور جب تک آدمی درد کی درسگاہ کا تعلیم یافتہ نہ ہو، بقیہ علوم بھی اس کے لئے زیادہ مفید نہیں بن سکتے۔

20 نومبر 1984

Envy never makes holiday.

مطلب یہ ہے کہ حسد ایک ایسی چیز ہے کہ جو شخص اس میں گرفتار ہو جائے وہ برابر اسی میں پڑا رہتا ہے۔ وہ ہر وقت حسد کی آگ میں جلتا رہتا ہے۔ کسی لمحہ اس کو قرار نہیں آتا ۔ کتنی بری چیز ہے حسد ، مگر کتنے زیادہ لوگ اس میں مبتلا رہتے ہیں۔ شاید دنیا میں سب سے زیادہ جو بیماری پائی جاتی ہے وہ حسد ہی ہے۔

21 نومبر 1984

حضرت عثمان بن عفان اسلام کے تیسرے خلیفہ ہیں جب وہ خلیفہ ہوئے تو مدینہ کی مسجد میں لوگوں کے سامنے تقریر کرنے کے لئے کھڑے ہوئے۔ مگر غالبا انھیں تقریر وخطابت کی زیا دہ مشق نہ تھی یا کسی اور وجہ سے وہ چند ابتدائی کلمات بولنے کے بعد وہ لمبی تقریر نہ کرسکے ۔ چنانچہ انھوں نے حسب ذیل کلمات کہے اور بیٹھ گئے:

تم کو بولنے والے خلیفہ سے زیادہ کرنے والے خلیفہ کی ضرورت ہے

یہی بات عام انسان کے لئے بھی صحیح ہے۔ ہر انسان ، خواہ وہ حکمراں ہو یا غیر حکمراں ، اس کی قیمت عمل کے اعتبار سے متعین ہوتی ہے نہ کہ قول کے اعتبار سے۔ آدمی کو چاہئے کہ وہ کوئی حقیقی کام کرے۔ الفاظ تو بے دماغ ریکارڈ بھی دہرا سکتے ہیں۔

22 نومبر 1984

استانبول (ترکی) کا قدیم نام قسطنطنیہ (Constantinople) ہے۔ اس کا یہ نام قدیم رومی حکمراں (قسطنطین) کے نام پر تھا۔ مسلمانوں نے اپنے دور میں اس کا نام بدل کر استانبول رکھ دیا۔

استانبول میں 450 مسجدیں ہیں۔ ان میں سے ایک مسجد ایا صوفیا (Hagia Sofia) ہے۔ ایا صوفیا کے معنی ہیں حکمت خداوندی ۔ یہ عظیم عمارت 326ء میں عیسائیوں نے چرچ کے طور پر بنائی تھی ۔ سلطان محمد فاتح نے 1453ء میں استانبول کو فتح کیا توسلطان نے اس کے اندر جمعہ کی نماز پڑھی اور حکم دیا کہ اس کو بدل کر مسجد کی صورت دے دی جائے ۔ اس وقت سے یہ عمارت مسجد کے طور پر استعمال ہونے لگی۔

اتا ترک نے اگرچہ ترکی میں اقتدار پانے کے بعد بے شمار حماقتیں کیں ۔ مگر ایا صوفیا کے بارہ میں اس کا حکم میرے نزدیک درست تھا۔ دوسروں کے عبادت خانہ کو مسجد میں تبدیل کرنا صرف اس وقت درست ہے جب کہ اس کو خرید لیا جائے یا ان سے اس کی اجازت لی جائے۔ اس کے بعد دوسری صورت یہ ہے کہ اس کی عمارت کو کسی پبلک مقصد کے لئے استعمال کیا جائے ، جیسا کہ اتا ترک نے کیا۔

23 نومبر 1984

ہنری پرین (Henri Pireane) مشہور مغربی مورخ ہے۔ وہ 1862 میں بلجیم میں پیدا ہوا اور 1935 میں وفات پائی۔ جرمنی نے بلجیم پرقبضہ کیا تو وہاں وہ تاریخ کا پروفیسر تھا۔ اس نے جرمن نقطہ نظر سے تاریخ پڑھانے سے انکار کر دیا۔ چنانچہ جرمنوں نے اس کو جیل میں ڈال دیا۔ وہ 1916 سے 1918 تک جیل میں رہا۔ جیل خانہ میں اس کو مطالعہ کے لئے کتابیں حاصل نہ تھیں۔ اس نے محض یادداشت سے ایک کتاب تاریخ یورپ(History of Europe) لکھی ۔ یہ کتاب اصلا جرمن زبان میں تھی ، پھر اس کا انگریزی میں ترجمہ ہوا۔ اب وہ یورپ میں داخل نصاب ہے۔

کتاب کے دیباچہ میں مصنف نے معذرت خواہانہ انداز میں لکھا ہے کہ حوالہ کی کتابیں نہ ہونے کی وجہ سے میں اپنی یہ کتاب محض یادداشت سے لکھ رہا ہوں ۔ تاریخ کے موضوع پر یادداشت سے لکھنے کا طریقہ صحیح نہیں۔ مگرجیل خانہ کی زندگی میں میرے لئے اس کے سوا کوئی دوسری صورت بھی نہیںـــــــاصل چیز وقت کو مارنا ہے اور وقت کو یہ موقع نہیں دینا ہے کہ وہ خود آدمی کو مار ڈالے :

The essential thing is to kill time and not allow oneself to be killed by it (p. 21).

25 نومبر 1984

ہر بدعت اسی قسم کے ناقص استدلال پر قائم ہوتی ہے۔ چنانچہ موجودہ زمانہ کے سیاسی مبتدعین (سید ابوالاعلی مودودی) وغیرہ کا نظریہ بھی اسی قسم کے ناقص استدلال پر قائم ہے۔ دونوں ہی کے اوپر یہ مثل صادق آتی ہے :

کہیں کی اینٹ کہیں کا روڑ ا ، بھان متی نے کنبہ جوڑا۔

اس سیاسی بدعت کو میں نے تفصیل کے ساتھ" تعبیرکی غلطی" میں بیان کیا ہے۔

26 نومبر 1984

میں نے کہا کہ گائے کی خوراک گھاس ہے اور شیر کی خوراک گوشت آپ شیر کو گھاس نہیں کھلا سکتے ۔ اور اگر آپ گائے کے منہ میں گوشت ڈالیں تو وہ اگل دے گی۔ یہی معاملہ انسانوں کا ہے۔ انسانوں میں بھی مختلف قسم کے لوگ ہیں اور الرسالہ بہرحال ہر ایک کی غذا نہیں بن سکتا۔

وہ لوگ جو ذاتی فخر میں جیتے ہوں، جن کی روح کو اس سے تسکین ملتی ہو کہ وہ ہمیشہ دوسروں کو ملزم ٹھہراتے رہیں ، جو اپنی غلطی کی قیمت دوسروں سے وصول کرنا چاہتے ہوں، جوخیالی الفاظ میں جیتے ہوں اور جن کو حقائق سے کوئی دلچسپی نہ ہو ، ایسے لوگ الرسالہ کی باتوں میں اپنی غذا نہیں پا سکتے۔

الرسالہ صرف سنجیدہ اور حقیقت پسند لوگوں کی غذا ہے ۔ اور ہمیں اس پر کوئی شرمندگی نہیں اگر غیر سنجیدہ اور غیر حقیقت پسند لوگ الرسالہ میں اپنی غذا نہ پائیں۔

27 نومبر 1984

ٹامس فلر ( thomas fuller کا قول ہے :

Courage should have eyes as well as arms.

ہمت کے لئے ضروری ہے کہ اس کے پاس آنکھیں ہوں اور اسی کے ساتھ بازو بھی۔

ہمت یہ نہیں ہے کہ آدمی پر جوش طور پر خطرات میں کود پڑے اور خواہ مخواہ اپنے آپ کو ہلاک کر لے ۔ اس قسم کی ہمت اور حوصلہ نادانی کے سوا اور کچھ نہیں۔ ہمت اور حملہ کے ساتھ آدمی کے اندر بصیرت کا ہونا بھی ضروری ہے ۔ وہ حالات کو گہرائی کے ساتھ دیکھے ۔ وہ آغاز و انجام کا پوری طرح جائزہ لے، اس کے بعد منصوبہ بند طور پراقدام کرے۔ حوصلہ مندانہ عمل با ہوش عمل کا نام ہے نہ کہ بے ہوشی کے ساتھ اپنے آپ کوخندق میں گرا لینے کا۔

سوچے بغیراقدام کرنا ایسا ہی ہے جیسے دیکھے بغیر چلنا۔

28 نومبر 1984

تفہیم القرآن، حصہ پنجم ، صفحہ 79-80 ۔ الحجرات ، تحت آیت 9

سید ابوالاعلی مودودی نے اس واضح اعتراف کے بعد کچھ غیر متعلق بحثیں چھیڑ کر غلط طور پر یہ ثابت کرنا چاہا ہے کہ مسلم حکمران کے خلاف بغاوت جائز ہے ۔ مگر اس کا خلاصہ صرف یہ ہے کہ اپنے آپ کو دین کے مطابق ڈھالنے کے بجائے خود دین کو اپنے مطابق ڈھالا جائے۔ سید ابوالاعلی مودودی پاکستان منتقل ہونے کے بعد اسی غیر اسلامی فعل میں مشغول تھے ۔ وہ لیاقت علی ، ایوب خاں ، بھٹو، کی قائم شدہ حکومتوں کو اکھاڑنے میں لگے رہے ۔ اپنی اس غیراسلامی روش کو جائز ثابت کرنے کے لئے انھوں نے دین میں وہ چیز ثابت کرنے کی کوشش کی جو حقیقتہ دین میں موجود نہ تھی۔

مذکورہ عبارت میں یہ بات بہت عجیب کہ جمہور کے اتفاق رائے کو تسلیم کرنے کے باوجود کہا گیا ہے کہ اس معاملہ میں علماء کے درمیان سخت اختلاف رائے ہے۔

29 نومبر 1984

An expert is one who knows more and more about less and less.

Nicholas Murray Butler

زرائع علم کی وسعت اور انسانی استعداد کی محدودیت کے اس تضاد نے موجودہ زمانہ میں تخصیص (specialization) کا طریقہ پیدا کیا۔علوم شعبوں میں تقسیم کئے گئے اور پھر شعبے بھی مزید ذیلی شاخوں میں تقسیم ہوتے چلے گئے۔ یہاں تک کہ عملی طور پر اس کے سوا کچھ اور ممکن نہ رہا کہ ایک شخص اگر زیادہ معلومات چاہتا ہے تو وہ ایک بے حد جزئی دائرہ پر قناعت کرے ۔

" کم سے کم کے بارہ میں زیادہ سے زیادہ جاننا " بعض محدود ٹکنکل مقاصد کے لئے تو مفید ہے۔ مگر وہ زندگی کے وسیع تر مسئلے کو سمجھنے کے لئے سراسر ناکافی ہے۔ کیوں کو زندگی کے مسئلہ کو سمجھنے کے لئے کلی علم درکار ہے نہ کہ محض جزئی علم۔ مزید یہ کہ کلی علم ایک ذہن میں جمع ہونا چاہئے بہت سے ذہنوں کی جزئی مہارت اس " کلی عالم " کوتشکیل نہیں دے سکتی جو مسئلہ حیات کی وضاحت کے لئے درکار ہے۔

30 نومبر 1984

She would not be surprised if her 18-year old daughter Susan came to her and said she was having an affair.

Mc Call magazine, September 1975

بحوالہ انڈین ایکسپریس (بمبئی )23 اگست 1975

مجھے تعجب نہ ہوگا اگر میری 18 سالہ لڑکی سوزان میرے پاس آئے اور مجھ سے کہے کہ میرا کسی سے تعلق ہوگیا ہے۔

مسزفورڈ نے یہ بات صدرفورڈ کے علم اور مشورہ کے بغیر کہ دی تھی جب صدرفورڈ نے اخبار میں اس کو پڑھا تو انھوں نے کہا کہ میں نے 20 ملین (عورتوں) کے ووٹ کھو دئے ۔

I'd lost 20 million votes. It will cost me 20 million votes.

جمهوری دور کے لیڈر کو اس سے دل چسپی نہیں کہ حق کیا ہے ، وہ صرف یہ جانتا ہے کہ عوام کیا چاہتے ہیں۔

9 نومبر 1984

ہندو خدائے برتر کو مانتے ہیں جس کو وہ ایشور کہتے ہیں۔ مگر ہندوؤں کے یہاں ایشور کاکوئی مندر نہیں ہوتا۔ ان کے یہاں جتنے مندر ہیں سب دیوتاؤں کے ہیں گویا ہندو اس مذہب سے واقف نہیں ہیں جس میں "خدا" کی پرستش کی جائے ۔ وہ صرف اس مذہب کو جانتے ہیں جس میں دیوی دیوتاؤں کی پرستش کی جاتی ہے۔

یہی موجودہ زمانہ میں تمام مذاہب کا حال ہے۔ یہودی صرف اس دین کو جانتے ہیں جس میں ایک خاص نسل سے تعلق رکھنے والوں کے لئے نجات ہے ۔ عمل کی بنیاد پر نجات ملنے والے دین سے وہ واقف نہیں۔ عیسائی صرف اس دین سے واقف ہیں جس میں ” پادری “ کی معرفت کوئی شخص خدا تک پہنچتا ہے۔ وہ براہ راست خدا تک پہنچنے والے دین سے واقف نہیں ۔

مسلمان بھی اس معاملہ میں دوسروں سے مختلف نہیں ۔ اسلام اگرچہ ایک خالص اور بے آمیز دین ہے، مگر موجودہ زمانہ کے مسلمان آج جس دین پر ہیں وہ اس سے مختلف دین ہے جو محمد عربی پر اتارا گیا تھا۔

آج مسلمانوں کا حال یہ ہے کہ وہ "تقوی " والے دین سے واقف نہیں ۔ مسلمان آج جس دین سے واقف ہیں وہ ان کی تاریخی روایات ، ان کے بزرگوں کے قصے کہانیاں ، ان کے قومی جذبات ہیں ۔ انھیں چیزوں کے تحت ان کا ایک دین بن گیا ہے اور اسی خود ساختہ دین پر وہ قائم ہیں ۔

یہی وجہ ہے کہ موجودہ زمانہ کے مسلمانوں سے جب خدا کی بڑائی بیان کی جائے تو وہ انھیں زیادہ اپیل نہیں کرتی، کیوں کہ وہ اپنے قومی ہیرؤو ں کی بڑائی میں جی رہے ہیں ۔ ان سے آخرت کی پکڑ کی پکڑ کی بات کیجئے تو ان کی نفسیات میں کوئی ہلچل پیدا نہیں ہوتی ۔ کیوں کہ اس دین سے وہ آشنا ہی نہیں۔