October 1983

یکم اکتوبر 1983

دہلی کے ایک انگریزی اخبار میں ہر ہفتہ ایک کالم ہوتا ہے جس کا عنوان ہوتا ہے ۔۔ آخری ہفتہ پاکستان میں(Last weck in Pakistan) اس کالم میں اس کے کالم نگار نے لکھا ہے کہ پاکستان کی حکومت نے اسلام کے نام پر کئی احکام جاری کئے مگر عملا وہ چل نہ سکے ۔ اس سلسلہ میں وہ لکھتے ہیں کہ پاکستان کے حکمراں یہ سوچ رہے ہیں کہ دفتروں میں سگرٹ نوشی کو بند کر دیا جائے۔ اس کے بعد یہ الفاظ ہیں :

This scheme will also probably end in smoke.

یہ اسکیم بھی غالباً دھوئیں میں اڑ جائے گی (ہندستان ٹائمس 11 فروری1983 )

موجودہ زمانہ کے مسلم لیڈروں نے اسلام کی کوئی واقعی خدمت تو نہیں کی البتہ اس کو دنیا والوں کے لئے مذاق کا موضوع بنادیا۔

2 اکتوبر 1983

یہ واقعہ جولائی 1983 کا ہے۔ پھاٹک حبش خاں ( دہلی) کی ایک مسجد کے ذمہ داروں کو خیال آیا کہ مسجد کی توسیع کریں۔ انھوں نے مسجد سے متصل زمین کو ملا کر تین منزلہ تعمیرکا نقشہ بنایا۔ سابقہ تعمیر کے اوپر دیواریں کھڑی کر کے اس کے اوپر بیم بنائی گئی اور ابتدائی مسجد کے اوپر پہلی اور دوسری منزل تعمیر کر دی گئی ۔ یہ سب کچھ اتنی تیزی سے کیا گیا کہ ایک مہینے کے اندر پوری عمارت کھڑی ہوئی تھی۔

مگر اس کے بعد ایک حادثہ ہوا۔ جس بیم پہ اوپر کی منزل کھڑی ہوئی تھی وہ ٹوٹ گئی اور اس کے بعد ساری عمارت دھڑام سے گر پڑی اس کے گرنے سے قدیم مسجد بھی ڈھ پڑی. یہ مزید تعمیرتقریبا ڈیڑھ لاکھ روپیہ میں تعمیر کرائی گئی تھی۔ اب اندازہ ہے کہ اس کو بنانے کے لئے دوبارہ تین لاکھ کی رقم درکارہوگی۔ شکستہ عمارت کا صرف ملبہ اٹھانے میں ہزاروں روپے خرچ ہو جائیں گے۔

اس حادثہ کی وجہ کیا تھی۔ اس کی وجہ “ عجلت " تھی۔ بیم کا یہ قاعدہ ہے کہ اس کو بنانے کے بعد سوکھنے کے لئے معقول مدت تک چھوڑ دیا جاتا ہے۔ مثلا 23 انچ کی بیم ہے تو 22 دن اس کو سوکھنے کے لئے چاہئے۔ مگر یہاں یہ ہوا کہ بیم بناتے ہی فورا اس کے اوپر اگلی منزلیں تعمیرکر دی گئیں۔ اس کو سوکھنے اور پختہ ہونے کا وقت نہیں دیا گیا ۔۔۔ اس مثال کے آئینہ میں موجودہ زمانہ کے مسلمانوں کی کی تعمیر کے معاملہ کو دیکھا جاسکتا ہے۔

3 اکتوبر 1983

مولانا فراہی نے سرسید کی متجددانہ تفسیر کا ترجمہ کرنے کو معصیت سمجھا تھا۔ مگر عجیب بات ہے کہ خود مولانا حمید الدین فراہی نے سورۃ الفیل کی جوتفسیر لکھی ہے وہ عین اسی قسم کی متجددانہ تفسیر ہے جس کے لئے سرسید بد نام ہیں اور جس کی وجہ سے مو لا نا فراہی نے ان کی تفسیرکا ترجمہ کرنے کومعصیت سمجھا تھا۔

مولانا فراہی بلاشبہ مخلص تھے۔ مگر روایات کو نظر انداز کر کے تفسیر کرنے کا مزاج ان پر اتنا زیادہ چھایا ہوا تھا کہ وہ سورۃ فیل کی اس انوکھی تفسیر تک پہنچ گئے جو تمام علماء اور مفسرین کے خلاف ہے۔ اس سے اندازہ ہوتا ہے کہ مخلص ہوکر بھی آدمی بڑی بڑی غلطیاں کرسکتا ہے۔

4 اکتوبر 1983

جرمن فلسفی کانٹ (1724-1804ء) یورپ کا مشہور ترین مفکر ہے۔ وہ ایک غریب گھر میں پیدا ہوا۔ اس کے سرپرست اس کا تعلیمی خرچ اٹھانے کی استطاعت نہیں رکھتے تھے۔ چنانچہ 1746ء سے 1755ء تک اس کو فیملی ٹیوٹر کے طور پر کام کرنا پڑا۔ اس طرح ذاتی محنت سے اس نے اپنی تعلیم جاری رکھی۔ تعلیم کی تکمیل کے بعد بھی اس کو صرف ایک معمولی ٹیچر کی جگہ ملی۔

1760ء کے بعد کے زمانہ میں اس کی تحریریں لوگوں کی توجہ کا مرکز بنیں۔ اس وقت جرمن یونیورسٹیوں میں لینبنر (G.W. Leinbniz) کے افکار چھائے ہوئے تھے۔ کانٹ نے لیبنز پر سخت تنقیدیں کیں۔ یہ تنقیدیں چونکہ دلائل کے اعتبار سے بہت طاقت ور تھیں، کانٹ بہت جلد لوگوں کی توجہ کا مرکز بن گیا۔ اور پھر اس کے لیے اعلیٰ ترقیات کے دروازے کھل گئے۔

5 اکتوبر 1983

چین کے ایک ارب باشندے چینی زبان بولتے ہیں۔ جب کہ انگریزی زبان بولنے والوں کی تعداد ساری دنیا میں 70 کرور ہے۔ اس لحاظ سے بظاہر چینی زبان بولنے والے زیادہ ہیں اور انگریزی بولنے والے کم۔ مگر دو زبانوں کی اہمیت سمجھنے کے لیے یہ تقابل صحیح نہیں۔ کیوں کہ چینی زبان صرف چین میں بولی جاتی ہے۔جب کہ انگریزی زبان کے بولنے اور جاننے والے ساری دنیا میں پھیلے ہوئے ہیں۔ انگریزی زبان حقیقی معنوں میں ایک بین الاقوامی زبان ہے اور چینی صرف ایک ملکی زبان۔

6 اکتوبر 1983

امام بخاری نے اس باب کے تحت کئی روایتیں پیش کی ہیں۔ حافظ ابن حجر نے اس میں مزید اضافہ کیا ہے۔ ان احادیث کا خلاصہ یہ ہے کہ شہید کا لفظ آدمی کے اخروی انجام کو بتاتا ہے جس کا علم صرف اللہ تعالی کو ہے ، پھر کسی انسان کے لئے کیسے درست ہو سکتا ہے کہ کسی شخص کو یہ کہنا شروع کر دے کر فلاں آدمی شہید ہے۔ یہی وجہ ہے کہ ماضی میں کسی کے نام کے ساتھ لفظ شہید نہیں لگایا گیا۔ یہ صرف موجودہ زمانہ کی بدعت ہے کہ لوگ حسن البنا شہید اورسیدقطب جیسے الفاظ بولتے ہیں۔

7 اکتوبر 1983

Judge a man by his questions rather than his answers.

یہ بہت با معنی قول ہے۔ حقیقت یہ ہے کہ جواب دینے کے مقابلہ میں سوال کرنا زیادہ مشکل کام ہے۔ آدمی کا سوال اس کی پوری شخصیت کو بتا دیتا ہے۔ کم از کم میرا تجربہ ہی ہے کہ بہت کم لوگ ہیں جو واقعی کوئی گہرا سوال کریں۔ بیشتر لوگ محض سطحی قسم کے سوال کرنا جانتے ہیں۔

8 اکتوبر 1983

ایک شخص نے کامیابی کا راز سادہ طور پر ان چند لفظوں میں بیان کیا اگر تم کامیاب ہونا چاہتے ہو تو تم زیادہ کام کرو :

If you want to succeed, work harder.

میرا خیال ہے کہ کامیابی کا اس سے مختصر نسخہ اور کوئی نہیں ہوسکتا۔ موجودہ دنیا مقابلہ کی دنیا ہے۔ یہاں پرکامیابی دوسروں کے مقابلہ میں کامیابی کا نام ہے۔ اس لئے ایک شخص اسی وقت کوئی قابل ذکر کامیابی حاصل کر سکتا ہے جب کہ وہ زیادہ محنت کر کے مقابلتہ اس کا استحقاق پیدا کرے۔

9 اکتوبر 1983

مکھن گویا چھاچ اور گھی کا مجموعہ ہے۔ لیکن مکھن سے براہ راست گھی نکالنا چاہیں تو وہ چھاچ سے الگ ہو کر آپ کو نہیں مل سکتا۔ البتہ جب مکھن کو آگ پر پکائیں تو پکتے پکتے ایک وقت آتا ہے جب کہ چھاچ الگ ہو جاتا ہے اور مکھن الگ۔

یہ ایک قدرتی تمثیل ہے جو انسان کے معاملہ کو بتا رہی ہے ۔ انسان کی شخصیت میں دو چیزیں ملی جلی ہیں ۔ روح اور مادہ ۔ عام حالت میں وہ مکھن کی طرح ایک دوسرے میں شامل رہتی ہیں۔ خداکی طرف سے انسان پر مصیبتیں اور آزمائشیں اس لئے ڈالی جاتی ہیں کہ اس کی شخصیت کا روحانی عنصر جو بمنزلہ گھی کے ہے ، اس کی شخصیت کے مادی عنصر سے الگ ہو جائے جو بمنزلہ چھاچ کے ہے۔ اسی کا نام قرآن کی زبان میں تزکیہ ہے۔

انسان کا موجودہ مادی وجود جنت میں بسائے جانے کے قابل نہیں۔ جو شخص اپنے مادی وجود کو لے کر آخرت میں پہنچے وہ خدا کی جنت میں داخلہ کے لئے نااہل ٹھہرے گا ۔ البتہ جو شخص اپنے موجودہ مادی وجود سے اس دنیا میں اپنے آپ کو الگ کر لے اور اپنے روحانی وجود کے ساتھ آخرت میں پہنچے ، اس کو نیا زیادہ بہترجسم دے کرجنت میں داخل کر دیا جائے گا۔

10 اکتوبر 1983

The pessimist sees the difficulty in every opportunity, and the optimist sees the opportunity in every difficulty.

ہر صورت حال میں کچھ روشن پہلو ہوتے ہیں اور کچھ تاریک پہلو کوئی بھی صورت حال اس سے خالی نہیں۔ کامیابی صرف اس انسان کے لئے مقدر ہے جو تاریک پہلو کو نظرانداز کر دے، اور روشن پہلو کی طرف اپنا قدم بڑھادے۔ اس دنیا میں کامیابی حاصل کرنے کا دوسرا کوئی طریقہ نہیں

11 اکتوبر 1983

قدیم زمانہ میں حدیثیں وضع کرنے کا ایک محرک یہ بھی رہا ہے کہ عوام ہمیشہ عجیب وغریب قسم کی مبالغہ آمیز باتوں کو بہت دھیان سے سنتے ہیں اور بہت جلد ایسے لوگوں کے گرد جمع ہو جاتے ہیں۔ قدیم زمانہ میں اس قسم کے لوگ سنسنی خیز حدیثیں گھڑ کر سنایا کرتے تھے۔ موجودہ زمانہ میں بھی اس قسم کے لوگ موجود ہیں۔ اور یہ وہی ہیں جن کو زرد صحافی (Yellow journalists) کہا جاتاہے۔

12 اکتوبر 1983

تنقید کرنا غلط نہیں ، تنقید کو برا ماننا غلط ہے ۔ واحد پابندی جو تنقید کے اوپر لگائی جاسکتی ہے وہ یہ کہ تنقید کو تنقید ہونا چاہیئے کہ تعییب یعنی عیب جوئی اور الزام تراشی کرنے کے بجائے واضح دلائل کی بنیاد پراظہارخیال کیا جائے جس کوموجودہ زمانہ میں تجزیہ کہاجاتا ہے۔

13 اکتوبر 1983

1 am interested in this world, in this life, not some other world or future life.

جواہرلال نہراور ان کے جیسے دوسرے لوگوں کو یہ کہنے کی تو آزادی ہے کہ انھیں صرف حال کی زندگی سے دل چسپی ہے۔ مگر ان کی مشکل یہ ہے کہ انھیں یہ آزادی نہیں کہ وہ اپنی مستقبل کی زندگی کا خاتمہ کر سکیں۔ حقیقت یہ ہے کہ جب تک یہ ثابت نہ ہو جائے کہ موت کے بعد کوئی زندگی نہیں، اس وقت تک کسی عقلمند آدمی کا یہ کام نہیں ہو سکتا کہ وہ موت سے پہلے والی زندگی سے تو دلچسپی رکھے اور موت کے بعد والی زندگی کو بھلا دے۔

14 اکتوبر 1983

میں نے کہا کہ ہندستان میں آزادی کے بعد سے کئی بار ایسی سازشیں پکڑی گئی ہیں جن میں لوگ ہندستان کا فوجی راز پاکستان کے ہاتھ بیچنے میں ملوث تھے۔ مگر یہ سب کے سب ہندو یا سکھ تھے۔ ان میں سے کوئی ایک بھی مسلمان نہ تھا۔ کیا اس سے مسلمانوں کے بارے میں آپ کا الزام غلط ثابت نہیں ہوتا۔

I love my country better than my family.but I love humanity better than my country.

میں نے کہا کہ ایک ایسی دنیا جہاں لوگ عالمی سفر کے لیے انٹرنیشنل سواری کے طالب ہوں، وہاں آپ لوگوں ک ایک ایسی سواری پر بیٹھنے کے لیے راضی نہیں کر سکتے جو صرف مقامی سفروں کے لیے کارآمد ہو۔

15 اکتوبر 1983

مسائل ہر ملک میں ہیں اور ہندستان میں بھی ہیں۔ ہمیں حق ہے کہ ان مسائل کو حل کرنے کی کوشش کریں۔ مگر مسائل کو حل کرنے کے لیے ہمیں لازمی طور پر خاموش اور پرامن انداز اختیار رکرنا چاہیے، نہ کہ احتجاجی انداز(agitational approach) ۔ احتجاجی انداز مسلمانوں کی داعیانہ حیثیت کے مطابق نہیں۔ نیز یہ کہ موجودہ حالت میں احتجاجی انداز ملک کی شدت کو مزید بڑھاتا ہے وہ کسی درجہ میں بھی اس کو کم نہیں کرتا ۔

16 اکتوبر 1983

تبلیغی جماعت کے ایک صاحب سے ملاقات ہوئی۔ میں نے کہا کہ کام کرنے کے دو انداز ہیں۔ ایک خارجی انداز (outward approach) اور دوسرا داخلی انداز (inward approach) اس وقت مسلمانوں میں بے شمار تحریکیں چل رہی ہیں ، مگرسب کم یا زیادہ ، خارجی انداز کارپر چل رہی ہیں۔ میرے نزدیک صرف دو قابل ذکر تحریکیں ہیں جو داخلی انداز کار پر چل رہی ہیں ، ایک تبلیغی جماعت اور دوسرے الرسالہ کامشن ۔

میں نے کہا کہ مجھے تبلیغی جماعت سے کئی معاملوں میں اختلاف ہے ۔ مثلا وہ لوگ پوری تحریک فضائل کی بنیاد پر چلا رہے ہیں جو میرے نزدیک صحیح نہیں۔ تاہم میں تبلیغی جماعت کی اس لئے قدر کرتا ہوں کہ وہ امت میں داخلی طرز فکر پیدا کر رہے ہیں جو صحیح طرزفکر ہے۔ دوسرے لوگ پوری ملت کو خارجی طرز فکر پر ڈال رہے ہیں جو ان کو کہیں پہنچانے والا نہیں۔

17 اکتوبر 1983

Had I been on the other side, history would have been different today.

اگر میں دوسری طرف ہوتا تو آج تاریخ بالکل مختلف ہوتی۔ یعنی مشرقی پاکستان کو بنگلہ دیش بنانے کے بجاۓ انڈیا پاکستان بن جاتا ۔ اسی کو" برخود غلط " کہتے ہیں ، اور برخود غلط ہونا بلاشبہ سب سے بڑا ذہنی مرض ہے۔

18 اکتوبر 1983

19 اکتوبر 1983

As you sow, you will reap

اسی کو عربی زبان میں اس طرح کہا جائے گا : کما تزرع تحصد۔ اردو مقولہ چارلفظوں میں ہے۔ انگریزی مقولہ چھ لفظوں میں ۔ اس کے مقابلہ میں عربی زبان میں یہی مفہوم صرف تین لفظ میں پوری طرح ادا ہو جاتا ہے۔

20 اکتوبر 1983

21 اکتوبر 1983

میں کبھی سوچتا ہوں کہ انسان کس قدر سرکش مخلوق ہے ۔ اور شاید اس کی سب سے بڑی سرکشی یہ ہے کہ وہ خدا کے کلام میں اپنا کلام ملاتا ہے اور کہتا ہے کہ یہ خدا کا کلام ہے۔ پہلی امتوں نے اس سرکشی کی بنا پر اپنی آسمانی کتابوں کو محرف اور غیرمعتبربنا دیا ۔

ادخلوا الحبيب الى الحبيب روست کو دوست کے پاس لے آؤ

اس قسم کی روایتیں گھڑنا بلاشبہ سطحیت بھی ہے اور سرکشی بھی۔

22 اکتوبر 1983

مرزاغلام احمد قادیانی کے ایک شعر کا ایک مصرعہ یہ ہے :

دیں کے لئے حرام ہے اے دوستو قتال

غلام احمد قادیانی کے اس شعر پر مسلمانوں نے بہت شور وغل کیا ۔ مگر حقیقت یہ ہے کہ اس شعر میں ایک صحیح بات کو غلط لفظ میں بیان کیا گیا ہے۔ اس شعر میں دین کے لفظ کو اگر "دعوت دین" کے معاملہ میں لیا جائے تو بات بالکل بدل جائے گی۔ یعنی لفظ بدل کر اس کو یوں کہا جائے کہ ۔ ۔ دعوت کا کام مدعو کے ساتھ جنگ چھیڑ کر نہیں کیا جا سکتا ۔

قتال دفاع کے مقصد کے لئے دین میں عین جائز بلکہ ضروری ہے۔ اس کے حرام ہونے کا کوئی سوال نہیں ۔ مگر دعوت کا عمل ایک نصیحت کا عمل ہے۔ اور نصیحت کے لئے ضروری ہے کہ سننے والے اور سنانے والے کے درمیان خوشگوار فضا ہو۔ اس فضا کو باقی رکھنے کے لئے داعی کو یکطرفہ طور پر ٹکراؤ سے احتراز کرنا پڑتا ہے۔

23 اکتوبر 1983

ایک مقولہ ہے کہ" کمال کا خاصہ ظہور ہوتا ہے " ۔ پھول جب تکمیل کے مرحلہ کو پہنچتا ہے تو خوشبو دینے لگتا ہے۔ بخارات اٹھنے کا عمل تکمیل کو پہنچتا ہے تو بارش ہونے لگتی ہے۔چاند جب مکمل ہو جاتا ہے تو پوری طرح روشنی دینے لگتا ہے۔ وغیرہ ۔

24 اکتوبر 1983

Before you attempt consider what you can perform.

اس کا مطلب یہ ہے کہ آدمی کو قابل عمل دائرہ میں اقدام کرنا چاہئے ۔ نا قابل عمل دائرہ میں اقدام کرنا ناکامی کے خندق میں چھلانگ لگانا ہے۔ جو لوگ نا قابل عمل دائرہ میں اقدام کریں ، اور جب ناکام ہوں تو حالات کی شکایت لیکر بیٹھ جائیں۔ وہ در حقیقت دوسروں کی شکایت نہیں کرتے۔ بلکہ خود اپنی نادانی کا اعلان کر رہے ہیں۔

25 اکتوبر 1983

اس سے اندازہ ہوتا ہے کہ اسلام میں قرآن کی حفاظت کا کتنا زیادہ اہتمام کیا گیا ہے۔

26 اکتوبر 1983

خلیفہ ہارون رشید ایک روز باہر نکلے۔ انہوں نے سعید بن سلم کو دیکھا۔خلیفہ نے پوچھا کہ کون۔ انہوں نے کہا کہ سعید، اللہ آپ کو سعادت بخشے۔ خلیفہ نے دوبارہ پوچھا کس کا لڑکا۔ انہوں نے سلم کا لڑکا، اللہ آپ کو سلامت رکھے۔خلیفہ نے پھر پوچھا کہ کس کا باپ۔ انہوں نے کہا کہ عمرو کا باپ، اللہ آپ کی عمر دراز کرے۔ ہارون رشید نے کہا، اللہ تمہیں برکت دے۔ اور پھر اس نے ان کا اکرام کیا (خرج ھارون الرشید یوماً فرایٔ سعید بن سلم فقال من۔ قال سعید، اسعد لک اللہ۔ قال ابن من۔ قال ابن سلم، سلمک اللہ۔ قال ابو من۔ قال ابو عمرو، عمرک اللہ۔ فقال الرشید بارک اللہ علیک و اکرمہ)

بڑوں سے بات کرنے کا یہ بھی ایک طریقہ ہے۔ مگر عجیب بات ہے کہ مجھے اس قسم کی بات کرنا بالکل نہیں آتا۔ حتیٰ کہ بناوٹی طور پر بھی نہیں۔

27 اکتوبر 1983

مگر مجھے اس قسم کے نام اور اس طرح کے ذہن کے تحت کتاب لکھنا بالکل پسند نہیں "بڑوں " سے مراد اگرصحابہ کرام اور صلحاء امت ہیں تو وہ ہمارے لئے نمونہ ہیں ۔ اگر انہیں "عظماء " کہا جائے تو اس سے ہیرو پرستی کا ذہن پیدا ہوتا ہے۔ اور اگر انھیں " قدوۃ " کہا جاۓ تو اس سے اتباع کا ذہن پیدا ہوگا۔ اول الذکر سے فخر کی نفسیات پیدا ہوتی ہے اور ثانی الذکر سے تواضع کی نفسیات۔

28 اکتوبر 1983

قدیم طرز کی توپ کو چلانے کا کام جو شخص کرتا تھا، اس کو " میر آتش" کہا جاتا تھا۔ اس زمانہ میں یہ کام زیادہ تر مسلمان کرتے تھے۔ مثلا چھترپتی شیواجی کے توپ خانہ کا میر آتش ابراہیم گردی تھا۔ رانی جھانسی لکشمی بائی کے میر آتش کا نام میرغوث تھا، وغیرہ ۔

روایتی دور میں مسلمان ہر میدان میں آگے تھے سائنسی دور میں وہ ہر میدان میں پیچھے ہو گئے۔

29 اکتوبر 1983

Silence is the unbreakable repartee.

اگر کوئی آدمی آپ کے خلاف لغو باتیں کرے اور آپ جواب دینے کے بجائے خاموش ہو جائیں تو آپ خود اس آدمی کے ضمیر کو اس کا جواب دینے والا بنا دیتے ہیں ۔ اس کا ضمیر جاگ کر اس کو بتاتا ہے کہ تم ایک کمینہ صفت انسان ہو۔ یہ اندرونی جواب بلاشبہ تمام جوابوں سے زیادہ طاقت ور ہے ۔ انسان ہر دوسرے حملہ کے مقابلہ میں ٹھہرسکتا ہے، مگر اپنے ضمیر کے حملہ کے مقابلہ میں ٹھہرنے کی طاقت کسی کے اندر نہیں۔

30 اکتوبر 1983

31 اکتوبر 1983

قدیم یونان کا ایک مشہور فلسفی ہے جس کا دیو جانس (Diogenes) ہے۔ اس کا زمانہ 333 – 412 ق م ہے۔ کہا جا تا ہے کہ سردی کے موسم میں وہ دھوپ میں زمین پر لیٹا ہوا تھا۔ شاہ الیگزینڈرخود اس کے پاس آیا۔ اس نے کہا کہ آپ کو جو مانگنا ہے مانگیں، اس کو پورا کیا جائے گا۔ دیو جانس نے شاہ کی طرف رحم بھری ہوئی نظروں سے دیکھا اور کہا: میں تم سے کیا مانگوں تمہارے پاس مجھے دینے کے لائق کوئی بھی چیز نہیں۔ جو کچھ تم دے سکتے ہو وہ مجھے چاہئے نہیں۔ بس تم میرے اتنی مہربانی کرو کے سامنے سے ہٹ جاؤ ، میری دھوپ نہ روکو۔