September 1983

حدیث کی کتابوں میں بہت سی روایتیں بدعت کے خلاف آئی ہیں۔ ان کے مطابق ، رسول اللہ صلی اللہ علیہ وسلم نے دین میں نئی بات نکالنے کو شر اور ضلالت قرار دیا ہے اور اس سے اپنی برات کا اظہار فرمایا ہے۔ ایک روایت کے الفاظ یہ ہیں :من عمل عملا ليس عليه أمرنا فھو رد( جو شخص ایسا عمل کرے جو ہمارے عمل کے مطابق نہ ہو تو وہ قابل رد (rejected) ہے۔

تالمود میں ہے کہ سب سے بڑا ہیرو وہ ہے جو اپنے دشمن کو اپنا دوست بنا لے:

یہ وہی بات ہے جو قرآن میں ان لفظوں میں کہی گئی ہے کہ اور بھلائی اور برائی دونوں برابر نہیں ، تم جواب میں وہ کہو جو اس سے بہتر ہو ، پھر تم دیکھو گے کہ تم میں اور جس میں دشمنی تھی وہ ایسا ہوگیا جیسے کوئی قریبی دوست (حم السجده 34)

قاضی محمد عدیل عباسی اپنی کتاب تحریک خلافت (مطبوعہ 1978) میں لکھتے ہیں کہ (1912 میں ترکوں نے صلیب احمر کے جواب میں ہلال احمرکمیٹی بنائی تھی۔ اس کی تقلید میں ہندستان کے ہرشہر میں بلال احمر کمیٹیاں قائم ہوگئیں۔ مولانا محمد علی جوہر نے کامریڈ میں جب وفد انصاری کے لئے چندہ کی اپیل کی تو مسلمانوں نے کس طرح لبیک کہا ، اسے میر محفوظ علی کی زبان میں سنیے جو مولانا محمد علی کے ساتھی اور کا مریڈ کے منیجرتھے ، وہ فرماتے ہیں : ” اپیل نے کامریڈ کے دفتر میں روپیوں کی بارش شروع کر دی ۔ کامریڈ کے فائل گواہ ہیں کہ ایک ایک دن میں دس دس ، پندرہ پندرہ ہزار روپے موصول ہوئے ہیں ۔ اور میں گواہ ہوں کہ منی آرڈر اور پارسلوں پر دستخط کرتے کرتے میرا ہاتھ شل ہوگیا ہے۔" صفحہ 34

مولانا عبید اللہ سندھی ، مولانا محمود حسن صاحب کے شاگرد خاص تھے ۔ وہ کل قرآن کو جہاد کی تشریح میں تبدیل کئے ہوئے تھے (صفحہ 45 ) قاضی محمد عدیل عباسی نے لکھا ہے کہ ” مورخ نجیب آبادی نے مجھ سے کہا کہ مولانا سندھی نے ان سے پوچھا کہ ایک لفظ میں بتاؤ کہ قرآن کی تعلیم کا منشا کیا ہے ۔ پھر خود ہی کہا کہ حکومت "تحریک خلافت (مطبوعہ 1978 ) صفحه 46

یہی اس زمانہ میں علماء دیوبند کا عام ذہن تھا۔ وہ سارے دین کو حکومت اور سیاسی جہاد کے ہم معنی سمجھے ہوئے تھے۔ مگر اس نظریہ کا ماخذ یقینی طور پر قرآن نہ تھا ، بلکہ وہ مخصوص سیاسی حالات تھے جن کے درمیان یہ علماء اپنے آپ کو پارہے تھے ۔ یہ واقعہ بتاتا ہے کہ عربی زبان جاننا ، مدرسہ دینی کا سند یافتہ ہونا ، حتی کہ مخلص ہونا بھی قرآن فہمی کے لئے کافی نہیں ۔ قرآن فہمی کے لئے شرط لازم یہ ہے کہ آدمی حالات سے اوپرا ٹھ کر سوچ سکے ۔ اس کو خدا کی توفیق سے ارنا الاشیاء كما هی والی نگاه حاصل ہوگئی ہو ۔

” اونٹوں نے راگ چھیڑا ، گدھوں نے رقص کیا " یہ ایک مثل ہے جو پرانے زمانے کے ایک قصہ پرمبنی ہے ۔ یہ مثل موجودہ زمانہ کے مسلمانوں پر پورے طور پر صادق آتی ہے ۔ یہ ایک حقیقت ہے کہ موجودہ زمانہ کے مسلم قائدین اونٹوں کی طرح بے معنی راگ چھیٹرتے رہے اور مسلم عوام اس کے اوپر گدھوں کی طرح بے معنی رقص کرتے رہے ۔ یہی وجہ ہے کہ جان و مال کی بے حساب قربانیوں کے باوجود مسلمانوں کے حصہ میں کچھ نہ آیا۔ یہ الفاظ بلاشبہ بے حد سخت ہیں ۔ مگر میں کیا کروں کہ میرا مطالعہ مجھے جس نتیجہ پر پہنچاتا ہے وہ ہی ہے۔

ایک عربی مقولہ ہے: الاستقامة فوق الكرامة (استقامت کرامت سےبھی اوپر ہے) یعنی آدمی اگر استقلال کے ساتھ کام کرے تو وہ اس سے بھی زیادہ بڑی کامیابی حاصل کرے گا جو کوئی صاحب کرامت آدمی کرامت کے ذریہ حاصل کرسکتا ہے۔

اموی خلیفہ حضرت عمر بن عبدالعزیز نے ایک بار حج ادا کیا۔ انھوں نے دیکھا کہ کچھ لوگ اپنی سواری تیز دوڑانے کی کوشش کر رہے ہیں اور ایک دوسرے سے آگے نکل جانا چاہتے ہیں۔ انھوں نے عرفہ کے خطبہ میں فرمایا :

ليس السابق من سبق بعيرہ وفرسہ و لٰکن السابق من غفر لہ( جامع الاصول،الجزءالثالث،صفر249 )

رسول اللہ صلی اللہ علیہ وسلم ہجرت کر کے مدینہ پہنچے تو آپ نے اپنے اصحاب سے فرمایا کہ گنتی کرکے مجھے بتاؤ کہ کلمہ اسلام کا اقرار کرنے والے لوگ یہاں کتنے ہیں ۔ چنانچہ گنتی کی گئی تو کل ایک ہزار پانچ سو افراد تھے (قال صلى الله عليه وسلم بعد الهجرة : أحصوالى عدد من يلفظ بالاسلام فاحصواله. فكانواالفأ وخمس ماة،رواه البخاری ومسلم)

حدیث میں لایعنی (بے فائدہ) کلام سے روکا گیا ہے۔ بے فائدہ کلام کیا ہے، مختلف لوگوں نے اپنے اپنے الفاظ میں اس کی تشریح کی ہے ۔ امام غزالی کا قول ہے کہ بے فائدہ کلام وہ ہے کہ اگر تم چپ رہو تو تمہیں اس کی وجہ سے کوئی گناہ نہ ہو (وحد الكلام فيما لا يعنيك ان تتكلم بكلام لوسكت عنه لم تاثم)

ایک اہل حدیث عالم کا مضمون پڑھا۔ انھوں نے لکھا ہے کہ " احا دیث صحیحہ سے ثابت ہے کہ نماز خواہ سری ہو یا جہری ۔ امام ہو یا مقتدی ، ہر ایک کے لئے رکوع سے قبل قیام میں سورہ فاتحہ پڑھنا فرض ہے ۔ اس کے بغیر نماز نہیں ہوگی۔ انھوں نے اختلاف کو مخاطب کرتے ہوئے لکھا ہے کہ انہیں چاہئے کہ اپنی نمازیں صحیح کر لیں۔ ایسا نہ ہو کہ حشر کے دن ان کے نامہ اعمال نماز سے خالی ہوں ۔ جو زندگی بھر حق ظاہر ہو جانے کے بعد جہری نمازوں میں امام کے پیچھے سورہ فاتحہ کی فرضیت سے انکار کرکے اس کو ترک کرتے رہے۔"

انھوں نے اپنی دلیل میں وہ احادیث پیش کی ہے جو امام بخاری نے عبادہ بن صامت سے نقل کیا ہے : لا صلوة لمن لم يقرأ بفاتحة الكتاب. مگرقرین قیاس یہ ہے کہ اس طرح کی روایتوں کا تعلق عموم سے ہے نہ کہ استثناء سے۔ قرآن میں ہے کہ جب قرآن پڑھا جائے تو سنو اور چپ رہو۔ حدیث میں ارشاد ہوا ہے کہ من کان لہ امام فقرة الامام قراۃ لہ( جس شخص نے امام کے پیچھے نماز پڑھی تو امام کی قرات اس کے لئے کافی ہے) اس سے ظاہر ہوتا ہے کہ جہری نماز یا سری نماز میں فاتحہ پڑھنا ضروری ہے ، مگر جب امام آواز سے قرات کر رہا ہو تو اس کی قرات مقتدی کے لئے کافی ہو جائے گی۔ البتہ عشاء کی نماز میں ابتدائی دو رکعتوں میں امام کی قرات مقتدی کے لئے کافی ہے۔ اور بعد کی دو رکعتوں میں مقتدی کو فاتحہ پڑھنا چاہئے ۔

امام مسلم نے ابو ہریرہ سے روایت کیا ہے کہ نبی صلی اللہ علیہ وسلم نے فرمایا کہ جس شخص نے نماز ادا کی اور اس میں سورہ فاتحہ کی قرات کی تو اس کی نماز ناقص ہے ، پوری نہیں۔ آپ نے تین بار فرمایا۔ ابو ہریرہ سے پوچھا گیا کہ جب ہم امام کے پیچھےہوں۔ ابو ہریرہ نے کہا : اقرا بھا فی نفسك ۔ مذکورہ اہل حدیث عالم نے اس کا ترجمہ کیا ہے کہ آہستہ آواز سے پڑھ لیا کرو۔

اسلامی فقہ میں پانی کی طہارت کے بارہ میں جومسائل ہیں ، ان میں سے ایک مسئلہ یہ ہے کہ آدمی کا جھوٹا پاک ہے( سور الآدمی طاھر)

علامہ سخاوی نے علامہ سیوطی کی بابت لکھا ہے کہ ان کی مؤلفات کی تعداد اتنی زیادہ اس لیے ہے کہ وہ دوسروں کی کتابوں کو اپنے نام کے ساتھ منسوب کر لیتے تھے۔ان کی مؤلفات میں بہت سی کتابیں ان کے شیوخ (اساتذہ) کی ہیں جن پر انہوں نے بحیثیت مولٔف اپنا نام لکھ دیا۔ اسی طرح انہوں نے کتب خانوں سے کتابیں لیں۔ ان میں معمولی تبدیلی کی۔ مثلاً آگے کی بحث کو پیچھے اور پیچھے کی بحث کو آگے کر دیا اور اس کو اپنے نام کے ساتھ منسوب کر لیا (السخاوی، الضوء اللامع)۔

حضرت علی رضی اللہ عنہ نے فرمایا کہ تین عمل آدمی کے اوپر بہت سخت ہے۔ ہر حال میں اللہ کا ذکر کرنا، بھائیوں کی اپنے مال سے مدد کرنا، اور اپنے معاملے میں لوگوں کے ساتھ انصاف کرنا (قال علی کرم اللہ وجھہ اشد الاعمال ثلاثۃ:ذکر اللہ علی کل حال، و مواساۃ الاخوان بالمال، و انصاف الناس من نفسک)۔

جان کی حفاظت کے لیے شریعت نے قصاص کا حکم دیا ہے۔ اسی طرح مال کی حفاظت کے لیے سرقہ کی حد مقرر کی ہے۔ یہ مصالح معتبرہ کی مثالیں ہیں۔ حضرت عمر نے تقسیم وظائف کے لیے رجسٹر بنانے کا حکم دیا جو پہلے نہ تھا۔ یہ استنباطی طور پر مصالح معتبرہ میں شمار کیا جائے گا۔

میراث میں قرآن نے یہ قاعدہ مقرر کیا ہے کہ مرد کو عورت سے دگنا حصہ دیا جائے (النساء 11)۔ اب اگر کوئی شخص بطور خود کوئی وجہ بتا کر یہ کہے کہ مرد اور عورت دونوں کو برابر کا حصہ ملنا چاہیے تو یہ ایک لغو مصلحت ہوگی، جس کا اعتبار کرنے کی ضرورت نہیں۔ یہ مصالح ملغاۃ کی مثال ہے۔ اسی طرح ہر معاملہ میں کوئی مصلحت قابل اعتبار ہوتی ہے اور کوئی مصلحت ناقابل اعتبار۔

علماء اور بزرگوں کے بارہ میں بہت سے ایسے قصے کتابوں میں لکھے ہوئے ہیں جو مجھے فرضی اور بناوٹی معلوم ہوتے ہیں ، کیوں کہ وہ فطرت کے خلاف ہیں مثلا کہا جاتا ہے کہ سلطان غوری نے ایک بار علامہ سیوطی کے پاس ایک ہزار دینار کی تھیلی بھیجی۔ انھوں نے اس کو لوٹا دیا اور بادشاہ کے فرستادہ سے کہا کہ ہمارے پاس پھر کبھی کوئی ہدیہ مت لانا ۔ کیوں کہ اللہ نے ہم کو اس قسم کی چیزوں سے بے نیاز کر دیاہے (فرد الدنانير وقال لرسول السلطان لاتعد تأثينا قط بهدية فان الله أغنانا عن مثل ذالك)

یہ واقعہ علامہ سیوطی کے زہد و تقوی کے ثبوت میں پیش کیا جاتا ہے ۔ مگر زہد تقویٰ آدمی کے اندر تواضع پیدا کرتا ہے ، جب کہ اس واقعہ میں مجھے کبر کا شائبہ دکھائی دیتا ہے۔ رسول اللہ صلی اللہ علیہ وسلم کے پاس ہدایا آتے تھے، مگر کبھی آپ نے کسی صاحب ہدیہ سے مذکورہ قسم کا معاملہ نہیں فرمایا۔ زہد و تقویٰ وہی ہے جس کا نمونہ سنت رسول میں موجود ہو ، جو نمونہ سنت رسول میں موجود نہ ہو ، وہ کچھ اور تو ہوسکتا ہے مگر وہ زہد و تقوی نہیں ہو سکتا۔

خوارج کے فرقہ ضالہ ہونے پر تمام علماء کا اتفاق ہے، مگر عجیب بات ہے کہ وہ اپنی تمام تر گمراہی کے با وجود نہایت صاحب کردار لوگ تھے۔ امام ابن تیمیہ نے ان کے بارہ میں لکھا ہے کہ خوارج دین سے نکل جانے کے باوجود لوگوں میں سب سے زیادہ سچے ہیں ، یہاں تک کہ کہا گیا ہے کہ ان کی حدیثیں سب سے زیادہ صحیح حدیثیں ہیں (الخوارج مع مروقهم من الدين فهم اصدق الناس حتى قيل ان حـديثهم أصح الحديث، منهاج الاعتدال )

قدیم زمانہ میں تمام گمراہ افراد اور گمراہ فرقوں نے اپنی اپنی تائید میں حدیثیں گھڑیں۔ مگر خوارج سے غالبا کوئی بھی موضوع حدیث ثابت نہیں ۔ علماء میں سے کسی نے ان پر وضع حدیث کا الزام نہیں لگایا ہے۔ البتہ بعض افراد مثلا ابن ا ہہیعہ نے ان کو حدیث وضع کرنے والوں میں شمار کیا ہے۔اس سلسلہ میں ان کی دلیل یہ ہے کہ وہ کہتے ہیں کہ میں نے ایک خارجی عالم کو یہ کہتے ہوئے سنا کہ یہ حدیثیں دین ہیں۔ پس تم خوب دیکھ لیا کرو کہ تم کس سے اپنا دین لے رہے ہو ۔ کیوں کہ ہم جب کسی چیز کے خواہشمند ہوتے ہیں تو اس کو حدیث کی صورت دے دیتے ہیں ( ان هذه الاحاديث دين فانظروا عمن تأخذون دينكم فانا كنا اذا هوينا امرا صبرناہ حديثاً )

ایک حدیث ہے کہ الايمان قول وعمل يزيد وينقص ومن قال غيرذالك فھو مبتدع (ایمان قول اور عمل ہے۔ وہ بڑھتا ہے اور گھٹتا ہے اور جو شخص اس کے علاوہ کہے تو وہ بدعتی ہے) ، دوسری حدیث ہے کہ من زعم الایمان يزيد وينقص فزيادته نفاق ونقصانه کفرفان قالوا فاضربوا أعناقهم بالسيف (جس شخص نے یہ خیال کیا کہ ایمان بڑھتا ہے اور گھٹتاہے تو اس کا زیادہ ہونا نفاق ہے اور اس کا کم ہونا کفر ہے ۔ ایسا شخص توبہ کرے تو ٹھیک ہے ورنہ تلوار سے اس کی گردن ماردو )

شعور کی مختلف سطحیں ہیں۔ اگر ایک شخص شعور کے اعتبار سے مادی سطح پر ہو تو وہ غیر مادی (روحانی) حقیقتوں کا ادراک نہیں کرسکتا۔ مثلا ایک مستشرق نے پیغمبر اسلام کے بارہ میں ایک کتاب لکھی ہے۔ غار حرا کا تذکرہ کرتے ہوئے اس نے لکھا ہے کہ محمد جو دعوئے نبوت سے پہلے غار حرا میں جاتے تھے، اس کا مقصد تحنث (عبادت) نہیں ہوتا تھا، جیسا کہ مسلمان عام طور پر سمجھتے ہیں۔ اس کا مقصد گرمیاں گزارنا ہوتا تھا۔ مکہ کے دولت مند مکہ کی گرمی سے بچنے کے لیے موسم گرما میں طائف جایا کرتے تھے۔ محمد اپنے افلاس کی وجہ سے ایسا نہیں کر سکتے تھے، اس لیے وہ حرا کے غار میں چلے جاتے تھے، تاکہ وہاں گرمیاں گزار سکیں (ان اغنیاء مکۃ کانوا یذھبون الی الطائف حربا من حرھا اما ھو فلم یکن فی وسعۃ مجاراتھم لفقرہ۔ ولذالک کان یذھب الی غار حراء لیصطاف)۔ میں نے اصل کتاب نہیں دیکھی ہے۔ البتہ عربی ترجمہ میں اس کے الفاظ یہی ہیں۔

حج کے ارکان حنابلہ کے نزدیک چار ہیں: الاحرام، والوقوف بعرفۃ، وطواف الافاضۃ، و السعی بین الصفا و المروۃ۔ شافعیہ کے نزدیک حج کے ارکان پانچ ہیں۔ چار مندرجہ بالا اور پانچواں : الحلق التقصیر۔ احناف کے نزدیک حج کے ارکان صرف دو ہیں: الوقوف بعرفۃ، و معظم طواف الافاضۃ۔

یہ تو صرف بڑے اختلاف کی مثال ہے۔ ورنہ حج کی تفصیلات ( اور اسی طرح دوسری عبادتوں کی تفصیلات) میں بے شمار اختلافات ہیں جن کی گنتی کرنا بھی مشکل ہے۔ میرے نزدیک یہ سب غیر ضروری ہے۔ مثلاً مذکورہ فرق کو لیجیے۔ فقہاء کے درمیان اگرچہ ارکان حج کی تعداد مقرر کرنے میں اختلاف ہے۔ تاہم اس میں سب متفق ہیں مذکورہ ارکان میں سے کسی ایک رکن کا ترک بھی مذکورہ باطل کر دیتاہے ( کلھم متفقون علی ان ترک رکن من ارکان الحج یبطل الحج)۔ جب حج کی صحیح ادائیگی کے لیے مذکورہ تمام ارکان پر عمل ضروری ہو تو پھر غیر ضروری فنی بحثیں نکال کر ان کی تعداد میں فرق کرنے کی کیا ضرورت۔

جمہور فقہاء کی رائے ہے کہ جو شخص مر جائے اور اس پر حج فرض رہا ہو تو اس کے وارث پر واجب ہے کہ میت کی طرف سے حج کرے،خواہ مرے ہوئے شخص نے حج کی وصیت کی ہو یا وصیت نہ کی ہو۔ امام مالک کا قول ہے کہ میت کی طرف سے حج اس وقت ضروری ہے جب کہ اس نے وصیت کی ہو، ورنہ نہیں ۔ کیوں کہ حج ان کے نزدیک بدنی عبادت ہے۔ اس میں نیابت نہیں۔ (جمهور الفقهاء يرى ان من مات وعليه حجة الاسلام وجب على وليه ان يحج عنه وينهزمن يحج عنه مـنمـاله،سواءاوصىالميتبالحجاملميوص. وقالالامـاممـالكبحبالحـجعنالميتانكانتداوضىبـذالك. امااذالميومبـالجنـلايجبالحـجعنه.لانالحـجعـنـدهعبادةبـدنـيـة لاتقبل النيابة)

اس مسئلہ کی بنیاد بخاری کی ایک روایت پر ہے جس میں ایک عورت نے رسول اللہ صلی اللہ علیہ وسلم سے دریافت کیا تھا کہ میری ماں نے حج کی نذر کی تھی ۔ مگر وہ حج کے بغیر مر گئی۔ کیا میں اس کی طرف سے حج کروں۔ آپ نے فرمایا ہاں ۔ اس حدیث میں اس آدمی کا ذکر ہے جس نے حج کی نیت کر رکھی تھی ، مگر ادائگی سے پہلے اس کی وفات ہوگئی ۔ دوسری ایسی کوئی روایت نہیں جس میں میت کی طرف سے عمومی طور پر حج کی ادائگی کی ہدایت کی گئی ہو۔

میرے نزدیک اس معاملہ میں امام مالک کا مسلک صحیح ہے ۔ میں سمجھتا ہوں کہ صرف مالی قرض ایک ایسی چیز ہے جس میں استثنائی طور پر یہ حکم ہے کہ میت کی طرف سے ہر حال میں اس کو ادا کیا جائے۔ عبادتی امور میں صرف نیت کا اعتبار کیا جائے گا ۔ ( بخاری کی مذکورہ روایت میں دین (قرض) کالفظ ہے مگر وہ مجازی معنی میں ہے نہ کہ حقیقی معنوں میں ۔ اس سے انسانی قرض پر قیاس نہیں کیا جاسکتا۔

عن ابي موسى الاشعری رضی الله عنه قال کنا مع رسول الله صلى الله عليه وسلم فكنااذاأشـرفـاعـلىواجهتنا وكبرنا وارتفعت أصواتنا. فقال النبي صلى الله عليه وسـلم : باآنهاالنّاس،البعواعلىانفسكمنالكملاتدعونأمماوغائبانسكرانهســمتـرب

حضرت ابو موسی اشعری کہتے ہیں کہ ہم رسول اللہ صلی اللہ علیہ وسلم کے ساتھ سفر میں تھے۔ جب ہم کسی وادی پر پہنچتے تو ہم لا الہ الا اللہ اور اللہ اکبر کہتے ، اور ہماری آوازیں بلند ہوگئیں، رسول اللہ صلی اللہ علیہ وسلم نے فرمایا : اے لوگو، اپنی جانوں کو آرام دو ۔ کیوں کہ تم کسی بہرے یا کسی غائب کو نہیں پکار رہے ہو ۔ وہ تو تمہارے ساتھ ہے ، وہ سننے والا ہے ، قریب ہے۔

قالوا: إذا اردت مصاحبة رجل فاغضبه فان ملك نفسه فصاحبه وإلا فلا تصاحبہ (کھاگیا ہے کہ اگر تم کسی کو اپنا ساتھی بنانا چا ہو تو اس کو غصہ دلاؤ ۔ اگر وہ اپنے آپ پر قابو رکھے تو اس کو ساتھی بناؤ ورنہ اس کو اپنا ساتھی نہ بناؤ)

قرآن میں ہے کہ جنات اور انسان کو میں نے صرف اس لئے پیدا کیا ہے کہ وہ میری عبادت کریں (الذاریات 56 )مجاہد کا قول ہے کہ میں نے ان کو صرف اس لئے پیدا کیا ہے کہ وہ میری معرفت حاصل کریں۔ ثعلبی نے کہا کہ یہ قول عمدہ ہے۔ کیوں کہ اگر وہ ان کو پیدا نہ کرتا تو اس کا وجود اور اس کی توحید پہچانی نہ جاتی (تـالمـعـاهـدومـاخـلقتهـمالاليعـرفـوني. قالالثعلبي : هذاقولحسن لانه لولم يخلقهم لمـاعـرفوجـودةوتـوحـيـده )

علامہ اقبال نے لکھا ہے کہ " مسلمانوں کے تنزل کا انتہائی نقطہ 1799 تھا جب ترکوں کا بیڑہ غرق اور سلطان ٹیپو کو شہید کر دیا گیا۔ "

ایک صاحب نے مشورہ دیا کہ آپ دوسروں پر تنقید کرنا چھوڑ دیں۔ اور صرف مثبت موضوعات پرلکھیں، مثلا مذہب اور جدید چیلینج وغیرہ ۔ اس کے بعد کسی کو آپ سے شکایت نہیں ہوگی۔ اور آپ کے قارئین اور ہمدردوں کا حلقہ بہت زیادہ بڑھ جائے گا۔

بعض علما نے لکھا ہے کہ اس شخص کی تلاوت قرآن جائز نہیں جو تجوید کے ساتھ قرآن کی تلاوت نہ کرے۔ اس لئے کہ تجوید کے ساتھ تلاوت کرنا فرض ہے ، جب کہ قرآن کی تلاوت مطلقا نفل ہے۔ اس بنا پر فرض کو ترک کرنا نفل کی وجہ سے جائز نہیں ۔ لہذا مسلمان پر فرض ہے کہ وہ علم تجوید سیکھے۔ اس لئے کہ اللہ تعالی قرآن پاک میں خود فرماتا ہے: ورتل القرآن ترتيلا

" سنت " ایک ایسی چیز ہے جس پر دین کی بنیاد قائم ہے۔ بظا ہراس میں اختلاف نہیں ہونا چاہئے تھا۔ مگرفنی موشگافیوں نے اس میں بھی اختلاف پیدا کر دیا۔ مثلاً ایک سوال یہ قائم کیا گیا کہ سنت کیا ہے۔ کچھ لوگوں نے کہا کہ سنت سے مراد صرف سنت رسول ہے۔ دوسرے لوگوں نے کہا کہ سنت میں سنت صحابہ بھی شامل ہے ۔ اس سے مراد دین میں چلا ہوا طریقہ ہے، خواہ رسول اللہ صلی اللہ علیہ وسلم اس پر چلے ہوں یا آپ کے اصحاب اس پر چلے ہوں۔ امام شافعی نے کہا کہ نہیں ، سنت صرف رسول اللہ صلی اللہ علیہ وسلم کا طریقہ ہے، چاہے وہ آپ کا قول ہو یا آپ کا فعل ہو ۔ یہ اس لئے کہ امام شافعی تقلید صحابی کے قائل نہیں ہیں:

السنة الطريقة المسـلـوكـةفيالدينالمسلوكةفيالدينسواءسـلهاالنبىصلىاللهعليهواصحـابه. وقالالشافعيالسنةهيطـريـةالنبيصلىاللهعليهوسلمعنقولهوفعلهفقطلانهلايرىتقليدالصحابي اوپرکی عبارت میں بریکٹ والا فقرہ علامہ حسام الدین ( م 644ھ) کی کتاب حسامی کا ہے۔ اور اس کے بعد کی تشریحی عبارت مولانا نظام الدین کیرانوی کی کتاب نظامی شرح حسامی سے ماخوذ ہے۔