June 1983

یکم جون 1983

اس کا مطلب یہ ہے کہ اس آدمی کے اندر ایسے اخلاقی اوصاف ہوں کہ عہدہ کے بغیروہ لوگوں کے در میان عزت واحترام کا درجہ حاصل کرلے ۔ مگراسی کے ساتھ و واتنا بے نفس ہو کہ اگر اس کو عہدہ پر بیٹھا دیا جائے تو اس کے اندر بڑائی کا احساس پیدا نہ ہو، اس کے باوجود وہ لوگوں کے درمیان عام آدمی کی طرح رہے ۔۔۔۔۔۔۔ اچھے عہدیدار کی اس سے بہتر تعریف نہیں ہوسکتی۔

2 جون 1983

دانش خدا کی عام نعمت ہے۔ خدا ہر زمانہ میں بے شمار لوگوں کو دانش اور ہوشیاری عطا فرماتا ہے۔ مگر مومن اور غیر مومن میں یہ فرق ہے کہ مومن دانش کے استعمال کی حد جانتا ہے ، جب کہ غیر مومن دانش کے استعمال کی حد نہیں جانتا۔ یہ بلاشبہ دانش کا جائز استعمال ہے کہ آدمی دوسروں کی دغا بازی سے بچے ۔ مگر مومن کا خوف خدا اس بات کی ضمانت ہوتا ہے کہ وہ دوسروں کی دغا بازی سے اپنے آپ کو بچائے گا مگر خود کبھی دوسروں کو دھوکا نہیں دے گا

3 جون 1983

انسانی خصوصیات میں سے آخری چیز غیرت ہے ۔ ثقیف کے اندر اگر چہ گمراہی کے جذبات پیدا ہوئے ، تاہم غیرت کا احساس پھر بھی ان کے اندر زندہ تھا۔ یہی وجہ ہے کہ ایک جملہ ان کی اصلاح کے لئے کافی ہو گیا۔ اور جس آدمی کے اندر سے غیرت کا احساس رخصت ہو جائے ، لمبی تقریر بھی ان کو تڑپانے کے لئے کافی نہیں ہوسکتی

4 جون 1983

اس "عقل" کو حاصل کرنے کا سب سے بڑا ذریعہ مشورہ ہے۔ وہ انسان بہت خوش قسمت ہے جس کو صاحب فہم افراد مشورہ دینے کے لئے مل جائیں مشورہ کا یہ فائدہ ہوتا ہے کہ اس میں کئی آدمیوں کے تجربات اکھٹا ہو جاتے ہیں ۔ اس طرح ایک شخص کو موقع مل جاتا ہے کہ وہ وسیع تر معلومات کی روشنی میں کوئی فیصلہ لے سکے۔

5 جون 1983

علم حدیث میں ایک چیز وہ ہے جس کو" جرح و تعدیل" کہتے ہیں ، راوی کے اوصاف وخصائل کی تحقیق کے بعد اس کے ان عیوب کا اظہار کرنا جو اس کی روایت کے قبول کرنے میں خارج ہوں جرح کہلاتا ہے۔ اور راوی کے اخلاق و کردار کی تحقیق کے بعد یہ بتانا کہ راوی ثقہ ہے، تعدیل کہلاتا ہے۔

6 جون 1983

مسلمانوں نے ۱۸۵۷ میں مسلح بغاوت کے ذریعہ ہندستان کو آزاد کرنا چاہا۔ مگراسلحہ کی طاقت میں انگریز ان سے بہت زیادہ بڑھا ہوا تھا اس لئے یہ بغاوت صد فی صد ناکام رہی۔ اس کے بعد مسلم لیڈروں نے "ریشمی رومال“ جیسی تحریکیں چلائیں۔ ان کا مقصد بیرونی ممالک سے مدد لے کر ہندستان میں انگریزی اقتدار کوختم کرنا تھا۔ مگر یہ تحریک بھی صد فی صد ناکام رہی ۔ کیوں کہ باہر کے ملکوں نے ہمارے قائدین کی خوش فہمیوں کے برعکس ان کا ساتھ نہیں دیا۔ اس کے بعد ترکی کی خلافت کے نام پر جلسے جلوس کا ہنگامہ کھڑا کیا گیا ۔ اندازہ یہ تھا کہ ترکی کی مردہ خلافت دو بارہ زندہ ہو جائے گی۔ اور ہندستان کی آزادی میں مددگار ثابت ہو گی ۔ مگر ۱۹۲۴ میں مصطفی کمال پاشا نے خلافت کے ختم شدہ ادارہ کے آخری خاتمہ کا اعلان کر دیا اور ہمارے رہنماؤں کی خلافت تحریک اچانک کٹی ہوئی شاخ کی طرح زمین پر گر پڑی۔

7 جون 1983

چڑیا کو اڑتی ہوئی دیکھ کر خیال آیا کہ خداا شاروں کی زبان میں ان کی رہنمائی کرتا ہے ۔ دنیا کی تمام چیزیں اس ڈھنگ پر بنائی گئی ہیں کہ ان سے انسان کو ہر قسم کا مفید سبق ملتا رہے۔

گھوڑے کو خدانے زمین پر دوڑا دیا۔ اس کو دیکھ کر انسان کا ذہن اس طرف منتقل ہوا کہ وہ گاڑی بنائے۔ گاڑی بنیادی طور پر گھوڑے کی نقل ہے ، اس فرق کے ساتھ کہ گھوڑے کے پاؤں کو گاڑی کے پیر کی صورت میں تبدیل کر دیا گیا ہے۔ اس طرح خدا نے مچھلی کو پانی میں تیرایا تاکہ انسان کشتی اور جہاز بنانے کی بات سوچ سکے ۔ خدانے چڑیوں کو ہوا میں اڑایا تاکہ اس کو دیکھ کر انسان کا ذہن ہوائی جہاز بنانے کی طرف منتقل ہو۔

اسی طرح دنیا میں جو چیزیں ہیں ، ان میں ہرقسم کے سبق رکھ دئے گئے ہیں، دنیا کے فائدے کے بھی اور آخرت کے فائدے کے بھی۔

8 جون 1983

ایک چیز ہے اختلاف رائے اور دوسری چیز ہے طعن۔ دلیل کے ساتھ اختلاف رائے کرنا عین جائز بلکہ مفید ہے۔ مگر بے دلیل الزام لگانا اور شخصی عیب جوئی کرنا ہرگز جائز نہیں۔ اس کا نام طعنہ زنی ہے۔ اور وہ بلاشبہ ایمان کے منافی ہے۔

ہر زمانہ کے امام (بڑی شخصیتوں) کے ساتھ طعنہ زنی کیوں کی گئی۔ اس کا وا حد سبب حسد ہے۔ انسان اپنے سوا کسی اور کو بڑا ماننا نہیں چاہتا ، اس لئے جب وہ کسی کو بڑا ہوتے ہوئے دیکھتا ہے تو اس کی عیب جوئی کر کے اپنے دل کی بھڑاس نکالتا ہے ۔ وہ واقعہ میں جب اپنے محسود کو چھوٹا نہیں کر پاتا تو لفظوں میں اسے چھوٹا کرنے کی کوشش کرتا ہے۔ منفی نفسیات کے زیراثر وہ بھول جاتا ہے کہ اس طرح وہ خود اپنے آپ کو چھوٹا کر رہا ہے نہ کہ کسی دوسرے کو۔

9 جون 1983

بے خطر کود پڑا آتش نمرود میں عشق عقل ہے محوتماشائے لب بام ابھی

میں نے کہا کہ موجودہ زمانہ کے مسلمانوں کی سب سے بڑی ٹریجڈی یہ ہے کہ ان کے درمیان خیالی قسم کے رھنما اٹھے۔ کوئی اقبال کی طرح شاعر تھا ، کوئی خطیب اور کوئی انشا پرداز۔ ان لوگوں نے حقائق پر دھیان نہیں دیا۔ بس الفاظ کے ذریعہ خیالی تصوریں بناتے رہے۔

مثلا اقبال کا یہ شعر جسے آپ لوگ بڑی دھوم کے ساتھ پڑھتے ہیں ، سراسر لغو ہے۔ اس کا حقیقت سے کوئی تعلق نہیں۔ اس میں حضرت ابراہیم علیہ السلام کی تصویریہ بتائی گئی ہے کہ وہ عشق سے سرشار ہوکر بطور خود بھڑکتی ہوئی آگ میں کود پڑے ۔ حالانکہ یہ بات واقعہ کے بالکل خلاف ہے۔

10 جون 1983

شیعہ مذہب کا سارا انحصار اہل بیت کے تقدس پر ہے ۔ مگر اہل بیت سے مراد ان کے نزدیک صرف حضرت فاطمہ اور ان کی اولاد ہے حالانکہ رسول اللہ صلی اللہ علیہ وسلم کی تین اور صاحبزادیاں تھیں ـــــــ زینب، رقیہ، ام کلثوم ۔ اور ظاہر ہے کہ اولاد رسول ہونے کے اعتبارسے سب یکساں ہیں ، اس لئے تقدس کے معاملہ کو صرف فاطمہ سے وابستہ کرنے کی کوئی شرعی یاعقلی وجہ نہیں۔

11 جون 1983

میرے نزدیک آنسووں کی ایک تیسری قسم بھی ہے جس کو " ربانی آنسو" کہا جاسکتا ہے۔ یہ آنسو مذکورہ دونوں قسموں سے بالکل الگ ہوتے ہیں۔ وہ خدا کے ساتھ انسانی روح کے ارتباط سے ظاہر ہوتے ہیں۔ یہ وہ لمحہ ہوتا ہے جب کہ بندہ بندہ رہتے ہوئے اپنے رب سے مل جاتا ہے ، جب وہ موجودہ دنیا میں رہتے ہوئے حسیاتی طور پر دوسری دنیا میں پہنچ جاتا ہے، اس وقت انسان حقیقت اعلی کا براہ راست تجربہ کرتا ہے ۔ تجربہ کے دوران اس کی روح پر جو ناقابل بیان احوال گزرتے ہیں ، وہ خارجی طور پر آنسوؤں کی صورت میں بہہ نکلتے ہیں۔

12 جون 1983

Speak of the moderns without contempt and of the ancients without idolatry.

- Philip Dormer Stanhope

انسان کا حال یہ ہے کہ وہ اپنی ہم زمانہ شخصیتوں کو حقیر سمجھتا ہے۔ وہ ان کے بارہ میں منصفانہ رائے قائم نہیں کر پاتا۔ اس کے برعکس ماضی کی شخصیتوں کو وہ بت بنا لیتا ہے ، وہ ان کے بارہ میں مبالغہ آمیزقصیدہ خوانی کرتا ہے ۔ یہ دونوں باتیں غلط ہیں۔ آدمی کو حقیقت پسندی اور انصاف پر قائم رہنا چاہئے ۔

خواہ وہ ماضی کی شخصیتوں پر کلام کر رہا ہو یا حال کی شخصیتوں پر ۔

13 جون 1983

14 جون 1983

بادشاہوں کا فرض ہے کہ وہ مغلوب بادشاہوں کی درخواست پر ان کی مدد کریں۔ میں تمہاری مدد کے لئے ایسا لشکر بھیج سکتا ہوں جس کا اگلا سرا مرو میں ہو اور دوسرا سرا چین میں مگر دشمن کے جو اوصاف مجھے بتائے گئے ہیں وہ بہت قابل توجہ ہیں۔ یہ لوگ جب تک ان اوصاف کے حامل ہیں، وہ پہاڑ کو بھی اپنی جگہ سے ہٹا دیں گے حتی کہ میری حکومت کو ختم کرنا بھی ان کے لئے مشکل نہ ہوگا ۔ اس لئے میری رائے ہے کہ تم ان سے صلح کر لو ۔ ان کی برتری پر راضی ہو جانا اس سے بہتر ہے کہ ان سے ٹکراؤ کیا جاۓ۔

شاہ چین کا یہ تبصرہ اس بات کا اعتراف ہے کہ اس دنیا میں کسی قوم کی اصل طاقت اس کا کردار ہے نہ کہ تعداد اور فوجی ہتھیار ۔

15 جون 1983

16 جون 1983

میں نے کہا کہ امت بننے کا جو نظریہ آپ پیشں کر رہے ہیں وہ بجائے خود قابل بحث ہے۔ تاہم اس سے قطع نظر، یہ بتائیے کہ قرآن میں یہ کہاں لکھا ہوا ہے کہ اعراض اور صبر جیسے احکام امت بننے سے پہلے کے لئے ہیں۔ امت بننے کے بعد کے لئے نہیں۔ امت بننے کے بعد جہاد و قتال کے حکم پرعمل کرنا ہے ۔ وہ اپنے نقطہ نظر کی تائید میں قرآن کی کوئی آیت پیش نہ کر سکے۔

17 جون 1983

ہندستان ٹائمس (23 مئی1983) کے صفحہ 21 پر ایک مضمون چھپا ہے جس کا عنوان یہ ہے ۔ـــــ ارد شر پہلی بار گیس کی روشنی بمبئی میں لائے۔

Ardshir brought gas lighting into Bombay.

ارد شر ایک پارسی تھا۔ وہ مشہور واڈ یا خاندان میں پیدا ہوا جو انیسویں صدی میں پانی کا جہازبناتا تھا جس کی ایک گاہک ایسٹ انڈیا کمپنی بھی تھی ۔ ارد شر نے انجنیرنگ کی تعلیم حاصل کی۔ اس کو ٹکنکل چیزوں سے خاص دلچسپی تھی۔ اس نے انگلینڈ کا دورہ کیا تاکہ جدید ٹکنیک سے واقفیت حاصل کرے۔ واپس آ کر اس نے ہندستان میں بہت سے صنعتی منصوبے چلائے۔ اس نے بمبئی میں پہلی بار چراغ کے بجائے گیس کی روشنی کو رائج کیا۔

مسلمانوں نے قدیم روایتی دور میں دنیا کو بہت سی نفع بخش چیزیں دی تھیں ۔ مثلا کھیتوں کی سینچائی کے لئے چرخی کے بجائے رہٹ وغیرہ ، مگر دور جدید میں ان کا نام صرف لینے والوں کی فہرست میں درج ہے، دینے والوں کی فہرست میں ان کا نام میں درج نہیں ۔ یہی سب سے بڑی وجہ ہے جس نے انہیں دور جدید میں بے قیمت کر دیا۔

18 جون 1983

A statesman is a man who knows the question. A politician is a man who knows the answers.

مدبر ایک سنجیدہ انسان ہوتا ہے۔ حقیقی معنوں میں کچھ کرنا چا ہتا ہے ، اس لئے وہ سوالات (مسائل) کو جاننا چاہتا ہے تاکہ ان کو جان کر انھیں حل کرے ۔ سیاسی لیڈروں کا معاملہ اس کے بر عکس ہے ۔ ان کا مقصد صورت حال کا استحصال کرنا ہوتا ہے ۔ وہ اپنی ذہانت صرف اس میں دکھاتے ہیں کہ جب کوئی شخص ان کے خلاف کوئی بات کہے تو فی الفور اس کا ایک مسکت جواب لفظوں میں ڈھال کر پیش کر دیں۔

19 جون 1983

مصیبتوں کے ذریعہ خطاوں کی معافی کا مطلب یہ نہیں ہے کہ مصیبت پڑنا آٹو میٹک طور پر خطاؤں کی معافی کا سبب بن جاتا ہے۔ یہ بات در اصل اس انسان کے اعتبار سے کہی گئی ہے جو مصیبتوں کا استقبال" مومن “ کی حیثیت سے کرے۔

ایک شخص جس کے اندر ایمانی شعور زندہ ہو ، اس کے لئے ہر مصیبت اس کو خدا سے مزید جوڑنے کا سبب بن جاتی ہے۔ اس کے ذریعہ سے اس کے اندر خدا کی یاد ابھرتی ہے۔ وہ اعلی ایمانی کیفیات کا تجربہ کرتا ہے ۔ وہ دنیا کے مقابلہ میں آخرت کا چا ہنے والا بن جاتا ہے۔ ہر مصیبت اس کو قدرت خدا وندی اور عجز انسانی کا سبق دیتی ہے۔ اس طرح وہ مصیبتوں کے ذریعہ معرفت کے مراحل طے کرتا رہتا ہے، اور پھر وہ اس حال میں خدا سے ملتا ہے کہ اس کی روح ربانی تجربات کے سمندرمیں نہا کر مصفی و مزکی روح بن چکی ہوتی ہے۔

20 جون 1983

اراکان ، برما کا ساحلی ضلع ہے جو بنگلہ دیش (سابق مشرقی پاکستان) سے ملتا ہے۔ 1947 میں برما کی سرحد پرمشرقی پاکستان وجود میں آیا تو اراکان کے مسلمانوں نے غیر ضروری طور پر مشرقی پاکستان سے اپنا تعلق جوڑنا شروع کیا۔ یہاں تک کہ اراکان کے مسلم علاقہ میں آزادی کی تحریکیں چل پڑیں۔ اس کے نتیجے میں اراکان کے مسلمان برما کی سوشلسٹ حکومت کی نظر میں معتوب ہو گئے۔ ان پرسختیاں کی جانے لگیں۔ 1978 میں تقریبا دو لاکھ آدمی اراکان کو چھوڑ کرمشرقی پاکستان(بنگلہ دیش ) کے علاقہ میں داخل ہونے پر مجبور ہوگئے۔

During the days of Mr Ayub Khan, they were physically pushed into what was once East Pakistan. The Late Military General's warning "I hope you don't want our forces to cross the border" stopped Muslim extermination, but only for a short period. (p. 1).

یہ مدت مختصر کیوں رہی۔ اس کی ذمہ داری برما پر نہیں بلکہ خود مسلمانوں پر عائد ہوتی ہے۔ پاکستان میں صدر ایوب کے خلاف پرشور تحریک اٹھائی گئی جس میں مسٹر بھٹو کے ساتھ اسلام پسند گروہ کے لیڈر سید ابوالاعلی مودودی بھی پوری طرح شریک تھے۔ اس کے نتیجہ میں صدر ایوب کو استعفا دینا پڑا۔ اس کے بعد ایسے حالات پیش آئے کہ پاکستان برابر کمزور ہوتا چلا گیا۔ یہاں تک کہ وہ اس قابل نہ رہا کہ اس کی ایک دھمکی پر برما کی حکومت متزلزل ہو جائے۔

21 جون 1983

Till perhaps the very end Pakistan was for Jinnah a

bargaining counter. (p. 183)

اصل یہ ہے کہ سودا بازی کی دوقسمیں ہیں۔ ایک یہ کہ دو آدمیوں کی گفت و شنید کے دوران اس کو اختیار کیا جائے ۔ دوسرے یہ کہ عوام کو بھی اس میں شامل کر لیا گیا ہو۔ مسٹرجناح کا معاملہ اول الذکر نوعیت کا معاملہ نہ تھا۔ اگر وہ تقسیم کی سودے بازی کو بھی ذاتی سطح کی گفت وشنید میں اختیار کئے ہوئے ہوتے توکسی مرحلہ میں وہ اس سے دست بردار بھی ہو سکتے تھے مگر جناح اور ان کے ساتھیوں نے تقسیم کے موضوع پر سارے مسلم عوام کو بھڑکا دیا تھا حتی کہ انھوں نے مبالغہ آمیزی کر کے اس کو آخری حدوں کے پار پہنچا دیا تھا۔ ایسی حالت میں خود مسلم لیگ کی قیادت کے لئے مطالبہ تقسیم سے پیچھے ہٹنا ممکن نہ تھا۔ عوامی ابال کو اس طرح پیچھےکی طرف لوٹانا کبھی ممکن نہیں ہوتا۔

22 جون 1983

بطلیموس (Ptolemy) دوسری صدی عیسوی کا مشہور یونانی عالم فلکیات ہے۔ اس نے نظام شمسی کا زمین مرکزی (Earth-centered) نظریہ پیش کیا۔ اس موضوع پر اس کی کتاب المجستی بہت مشہور ہے۔ بطلیموس کا نظریہ تقریباً ڈیڑھ ہزار سال تک عالمی ذہن پر چھایا رہا،یہاں تک کہ سولھویں صدی عیسوی میں کوپر نیکس اور گلیلیو اور کپلر کی تحقیقات نے اس کو غلط ثابت کر دیا، اور اب ساری دنیا میں کوئی اس کو ماننے والانہیں۔

اس طرح کے کتنے نظریات ہیں جو محدود مدت کے لئے ذہنوں پر چھاتے ہیں اور پھر حرف غلط کی طرح مٹا دیے جاتے ہیں۔ مگر توحید " کا نظریہ زمانہ کے بے شمار نشیب و فراز کے باوجود اپنی اہمیت کم نہ کر سکا۔ بلکہ ہرنئی تحقیق اس کی اہمیت و واقعیت میں مزید اضافہ کر دیتی ہے۔ یہ واقعہ اس بات کا قطعی ثبوت ہے کہ توحید ایک واقعی حقیقت ہے نہ کہ محض ایک فرضی عقیدہ۔

( زمینی مرکز یت کے نظریہ کے لئے عیسائی نقطہ نظر: (4/522-EB

23 جون 1983

وجبير بن مطعم كان تقدم على النبي صلى اله عليه وسلم بعد وقعة بدر فی فداء الاماريٰ وكان إذ ذاك مشركاً فكان سماعه هذه الآية من هذه السورة من جملة ماحمله على الدخول في الاسلام بعد ذالك (صفحہ244)

اور جبیر بن مطعم بدر کے واقعہ کے بعد رسول اللہ صل اللہ علیہ وسلم کے پاس آئے تھے تاکہ فدیہ دے کر اپنے قیدیوں کو چھڑائیں۔ اور وہ اس وقت مشرک تھے۔ اس لئے سورہ نور کی ان آیتوں کا سننا من جملہ ان اسباب کے تھا جس نے اس کے بعد انھیں اسلام میں داخل ہونے پر آمادہ کیا۔

اس واقعہ سے اندازہ ہوتا ہے کہ دور اول کے لوگ شعوری انقلاب کے تحت ایمان لائے تھے۔ ان کا ایمان ان کے لئے حقیقت کی دریافت کے ہم معنیٰ تھا نہ کہ محض روایتی تقلید کے ہم معنی جیسا کہ موجودہ زمانہ کے مسلمانوں میں پایا جاتاہے۔

24 جون 1983

رسول اور اصحاب رسول اس ملت میں اصل معیار کی حیثیت رکھتے ہیں۔ وہ "الجماعت" ہیں ۔ ہر زمانہ سے مسلمانوں کو ہر معاملہ میں انھیں کی طرف دیکھنا ہے ۔ بعد کے مسلمان دور اول کی اس الجماعت پر پرکھے جائیں گے نہ کہ خود اپنے زمانہ کے سواد اعظم یا اکثریتی گروہ کی بنیاد پر۔ مثلا ملک ہندوستان میں مسلمان پہلی جنگ عظیم کے بعد خلافت کمیٹی میں بہت بڑی اکثریت کے ساتھ شامل ہوگئے ۔ تقسیم ہند سے پہلے مسلمانوں کی بیشتر تعداد مسلم لیگ کے تحت جمع ہوگئی۔ آجکل مسلمانوں کی اکثریت آل انڈیا مسلم پرسنل لا بورڈ کے ساتھ شریک ہے۔ مگر ان میں سے کوئی بھی الجماعت نہیں ۔ الجماعت کی حیثیت صرف رسول اور اصحاب رسول کو حاصل ہے ، اور ان کی یہ حیثیت ہمیشہ باقی رہے گی ۔ مثلا آج کسی مسلمان کا صحیح یا غلط ہونا اس پر نہیں جانچا جائے گا کہ وہ آل انڈیا مسلم پرسنل لا بورڈ کے ساتھ شریک ہے کہ نہیں ، بلکہ اس کو اس اعتبار سے جانچا جائے گا کہ اس کا رویہ رسول اور اصحاب رسول کے رویے کے مطابق ہے یا نہیں۔

25 جون 1983

اسکا مطلب غالبا یہ ہے کہ آدمی اپنی اولاد سے بے پناہ تعلق قائم کرتا ہے۔ حتی کہ اولاد ہرآ دمی کی سب سے زیادہ محبوب چیز ہوتی ہے، مگر اکثر حالات میں اولاد سے اس کی توقعات پوری نہیں ہوتیں۔ اگر بالفرض وہ کم عمری میں مرجائے تو باپ کو شدت محبت کی وجہ سے شدید صدمہ لاحق ہوتا ہے۔ اور اگر وہ زیادہ دنوں تک زندہ رہے تب بھی اکثر ایسا ہوتا ہے کہ بیٹے کی محبت باپ کوکسی نہ کسی آزمائش میں مبتلا کر دیتی ہے۔ مثلا اولاد کی وجہ سے انفاق فی سبیل اللہ میں کمی ۔ اولاد کا مستقبل بنانے کی خاطر غلط کاروائی کرنا ، اولاد کے اصرار کی وجہ سے دوسروں کی حق تلفی کرنا ، وغیرہ ۔ دنیا میں سچے بیٹے بھی کم ہیں اور سچے باپ بھی کم۔

26 جون 1983

محمد حسین آزاد اپنی کتاب ” آب حیات " کی وجہ سے کافی مشہور ہیں۔ ان کے والد کا نام مولانا محمد باقر تھا۔ انھوں نے 1837ء میں دہلی سے " اردو اخبار“ جاری کیا۔ 1854 میں محمد حسین آزاد بھی اس میں ایڈیٹر کی حیثیت سے شریک ہوگئے۔

1857 کے غدر (یا جنگ آزادی) کے زمانہ میں ’’اردو اخبار‘‘ نے انگریزوں کے خلاف دھواں دھار مضامین شائع کئے۔ مگر انگریزوں کے خلاف بغاوت مکمل طور پر ناکام ہو گئی ۔ اس کے بعد پکڑ دھکڑ شروع ہوئی۔ مولانا محمد باقر گرفتار کر لئے گئے اور انہیں گولی مار دی گئی ۔ محمد حسین آزاد بھاگ کر روپوش ہو گئے۔ آخر میں انھوں نے سیاست سے علیحدگی اختیار کرلی اور انگریزوں کے ایک تعلیمی ادارہ (گورنمنٹ کالج لاہور) میں ملازم ہو گئے۔ اس کے بعد حسین آزاد کی سیاسی مضمون نگاری ادبی مضمون نگاری میں تبدیل ہوگئی ۔ آب حیات اسی دوسرے دور کی تصنیف ہے۔

انیسویں صدی کے نصف آخر اور بیسویں صدی کے نصف اول میں مسلمانوں کے درمیان بڑی تعداد میں اعلی ذہن کے لوگ پیدا ہوئے مگر وہ اپنی صلاحیتوں کا صرف دو استعمال دریافت کرسکے ، مشغلہ سیاست یا مشغلہ ادب۔ ان کی صلاحیت کا اصلی اور دور رس استعمال صرف مشغلہ دعوت تھا ۔ مگر وہ ان کی دریافت سے باہر رہا، اس لئے وہ اپنے آپ کو اس میں مشغول بھی نہ کر سکے۔

27 جون 1983

انگریزی دور میں ہمارے علماء اور ہمارے رہنماؤں نے انگریزوں کے خلاف اس قدر نفرت پیدا کی کہ وہ حد کو پار کر گئی۔” نفرت انگریز" بجائے خود ایک نیکی بن گئی۔ انگریز جب ہندستان آئے تو مشینیں ایجاد ہو چکی تھیں اور اسٹیم پاور دریافت ہو چکی تھی ۔ مگر بڑھی ہوئی نفرت کی بنا پر لوگوں نے انگریزوں کی اچھی چیز کو بھی بری نظر سے دیکھا۔ اس کا ایک نمونہ اکبرالہ آبادی (1921- 1846) کا یہ قطعہ ہے:

پانی پینا پڑا ہے پائپ کا حرف پڑھنا پڑا ہے ٹائپ کا

پیٹ چلتا ہے آنکھ آئی ہے شاہ ایڈورڈ کی دہائی ہے

اس منفی بلکہ مجنونانہ نفرت کے ذہن کا یہ نتیجہ ہوا کہ مسلمان لمبے عرصے تک جدیدعلوم اور جدید تکنالوجی سے بیزار رہے، اور بالآخر جدید شعبوں میں دوسری قوموں سے کم از کم سوسال پیچھے ہو گئے۔

28 جون 1983

29 جون 1983

30 جون 1983