July 1983

یکم جولائی1983

Success is never final and failure never fatal. It's courage that counts.

اس دنیا میں کامیابی پرمگن ہونا بھی اتنا ہی بے معنی ہے جتنا ناکامی پر بے حوصلہ ہونا کیونکہ یہاں کامیابی بھی وقتی ہے اور ناکامی بھی وقتی ۔ آدمی اپنی نادانی سے کامیابی کو ناکامی میں تبدیل کر سکتا ہے اور اسی طرح اپنی بے ہمتی سے ایک ناکامی کو آخری ناکامی بنا سکتا ہے۔ حالاں کہ اگر وہ ہمت سے کام لیتا تو اس کے بعد بھی اس کے لئے ایک نئی عظیم تر کامیابی کا دروازہ کھلا ہوا تھا۔

2جولائی1983

قدیم صحرائی دور میں عرب میں جونسل تیار ہوئی تھی ، اس کے اندر اعتراف کا مادہ بہت زیادہ تھا۔ وہ کسی حقیقت کو جان لینے کے بعد اس کا اعتراف کیے بغیر نہیں رہ سکتے تھے۔ ان کی یہی خصوصیت تھی جس نے ان کے اندر مومنین کاملین کا وہ گروہ پیدا کیا جو ہمیشہ کے لئے اسلام کانمونہ قرار پائے ۔

3 جولائی 1983

یہ بات بذات خود غلط نہیں۔ مگرمیں سمجھتا ہوں کہ یہ سائنٹفک انداز نہیں ہے بلکہ جذباتی اور خطابی انداز ہے ۔ خطابی انداز کچھ لوگوں میں وقتی جوش تو پیدا کر سکتا ہے ، مگر وہ گہری شعوری تبدیلی لانے کے لئے کارآمد نہیں۔

4 جولائی 1983

A failure is a man who has blundered but is not able to cash in one the experience.

غلطی سے اگر آدمی سبق لے سکے تو وہ غلطی غلطی نہیں ۔ غلطی دراصل وہ ہے جو آدمی کوسبق تک نہ پہنچائے ، جو اس کے شعور میں اضافہ کا ذریعہ ثابت نہ ہو۔

5 جولائی 1983

6 جولائی 1983

اسی طرح امام ابو یوسف خون نکلنے کی صورت میں وضو کے جاتے رہنے کے قائل تھے۔ ان کی موجودگی میں ہارون رشید نے نماز پڑھائی جب کہ اس نے وضو کے بعد پچھنا لگوایا تھا۔ مگر امام ابویوسف نے اعتراض نہیں کیا۔ انھوں نے ہارون رشید کے پیچھے نماز ادا کر لی اور پھر اس کو نہیں دہرایا۔

7 جولائی 1983

ترجمہ صحیح تھا، اور ان صاحب کا انداز بیان توہین آمیز ہی نہیں اشتعال انگیز بھی تھا۔ لیکن شیخ الہند یہ کہتے ہوئے بیٹھ گئے کہ ـــــــ میں تو پہلے ہی کہتا تھا کہ مجھے وعظ کی لیاقت نہیں۔ مگر ان لوگوں نے نہیں مانا ۔ خیر اب میرے پاس عذر کی دلیل بھی ہو گئی یعنی آپ کی شہادت۔

8 جولائی 1983

مغل سرائے، شمالی ہند کا ایک بڑا ریلوے اسٹیشن ہے۔ یہاں دو انگریز پلیٹ فارم پر چل رہے تھے۔ پیچھے والے کے ہاتھ میں ایک ٹرنک تھا۔ اس نے تیز چلتے ہوئے آگے بڑھنا چاہا تو اس کا ٹرنک اگلے انگریز سے ٹکرا گیا اور وہ گر پڑا۔ اس کے بعد جو واقعہ ہوا وہ صرف یہ کہ کہ پیچھے والے مسافر نے کہا ساری (sorry) آگے والے مسافر نے کہا اوکے (.O.K) ، اور پھر دونوں بدستور اپنے سفر پر روانہ ہو گئے۔

غلطی کا اعتراف کر لینے سے معاملہ فورا ختم ہو جا تا ہے ، اور غلطی کا اعتراف نہ کرنے سے بڑھتا رہتا ہے، یہاں تک کہ فساد کا سبب بن جاتا ہے۔

9 جولائی 1983

میں گھر کے اندر داخل ہوا تو میں نے دیکھا کہ چار پائی بچھی ہوئی ہے۔ بیٹی اس پہ لیٹی ہے ، اور ماں ایک طرف بیٹھی ہوئی ہے۔ یہ منظر دیکھ کر میں نے کہا کہ ہندستان میں ہندووں اور مسلمانوں کا جومسئلہ ہے اس کی حقیقت بس اتنی ہی ہے جو اس واقعہ میں نظر آتی ہے۔

چار پائی پر بیٹی لیٹی ہوئی ہے اور ماں بیٹھی ہے تو اس سے کوئی بگاڑ پیدا نہیں ہوا۔ لیکن اگر لیٹنے والی بہو ہو اور بیٹھنے والی ساس ہو تو گھر میں طوفان برپا ہو جائے گا۔ ہندستان کے مسلمانوں نے اپنے اور ہندوؤں کے درمیان ساس اور بہو والا رشتہ قائم کیا۔ اسی بنا پر سارے جھگڑ ے ہیں۔ مسلمان اگر اپنے اور ہندوؤں کے درمیان ماں اور بیٹی والا رشتہ قائم کرتے توکوئی جھگڑا نہ ہوتا اور سارا معاملہ بالکل درست رہتا۔

10 جولائی 1983

غالبا 1965 کی بات ہے میں لکھنؤ میں حضرت گنج کے قریب ایک سڑک پر چل رہا تھا۔ میں ایک موڑ پر پہنچا تو دیکھا کہ ایک نوجوان تیزی سے سائیکل دوڑاتا ہوا آیا اور عین موڑ پر ایک راہگیرسے ٹکرا گیا۔ سائیکل رک گئی اور راہگیر بھی سڑک پر گر پڑا ۔ اس کے بعد دونوں میں جو گفتگو ہوئی وہ یہ تھی :

گھنٹی کیوں نہیں بجائی ۔ راہگیر نے کہا۔

گھنٹی نہ ہو تو " نوجوان نے جواب دیا۔

" بر یک کیوں نہیں لگایا “

" بریک نہ ہو تو ”

جب تمہارے پاس گھنٹی نہیں ، تمہارے پاس بریک نہیں تو پھر تیز کیوں دوڑاتے ہو ؟ کیا تم سے پوچھ کر دوڑاؤں؟

آدمی اگرماننا نہ چاہے تو کوئی دلیل اس کو چپ نہیں کر سکتی ، خواه وه دلیل بذات خود کتنی ہی معقول اور مدلل کیوں نہ ہو۔

11 جولائی 1983

1956 میں رامپور جانے سے پہلے تک میں اپنے بڑے بھائی عبدالعزیز خان کے ساتھ رہتا تھا ۔ میں بیوی بچوں والا ہوچکا تھا مگر اب تک میں نے کوئی معاشی کام نہیں کیا تھا۔ چنانچہ میرے بارہ میں عجیب عجیب تبصرے کئے جاتے تھے۔

غالبا 1953 کی بات ہے ۔ اس وقت میں اعظم گڈھ (باقی منزل) میں اپنے بڑے بھائی عبدالعزیز خان کے ساتھ رہتا تھا۔ شاہ فیضان احمد وکیل کی بہن رضیہ خاتون ( ) میری بیوی سے ملنے کے لئے کبھی کبھی آتی تھیں ۔ ایک روز انھوں نے بیوی سے میرے بارہ میں کہا کہ وہ کچھ کام نہیں کرتے پھر آپ کا اور بچوں کا کیا ہوگا۔ میری بیوی نے مجھ سے ذکر کیا تو میں نے کہا کہ رضیہ خاتون کو میری طرف سے یہ جواب دے دو کہ --- یہ کشتی اپنے تمام سواروں سمیت بس اللہ کے حوالے ہے۔

12جولائی 1983

انگریزی کا ایک مقولہ ہے کہ سیاست ممکن کا فن ہے:

Politics is the art of possible.

یعنی سیاست ناممکن چیزوں کے پیچھے دوڑنے کا نام نہیں ۔ حقیقی سیاست یہ ہے کہ جو چیز فی الواقع ممکن اور قابل حصول ہو ، اس کو نشانہ بنا کر اس کے لئے جدوجہد کی جائے۔ یہ بات بظاہر بہت سادہ ہے مگر وہ نہایت اہم ہے۔ اس دنیا میں اکثر اقدامات کی ناکامی کا سبب یہی ہوتا ہے کہ جوش اور اولوالعزمی کے تحت لوگ ایک نعرہ کے پیچھے دوڑ پڑے مگر جب ان کی دور اپنے آخری انجام پر پہنچی تومعلوم ہوا کہ جس چیز کونشانہ بنا کر وہ دوڑ رے تھے، وہ اسباب کی اس دنیا میں ان کے لئے قابل حصول ہی نہ تھی۔

13 جولائی 1983

1956 میں جماعت اسلامی ضلع اعظم گڑھ وجونپور کے متفقہ فیصلہ کے تحت مجھ کو اعظم گڑھ اورجونپور کا ناظم منتخب کیا گیا تھا۔ میں نے دونوں ضلعوں میں کام کو ازسرنومنظم کرنے کا ایک منصوبہ بنایا۔ اس میں دوسری چیزوں کے ساتھ یہ بھی شامل تھا کہ نظامت کے لئے ایک جیپ خریدی جائے اور اس کے ذریعہ دونوں ضلعوں میں کام کو آگے بڑھایا جائے۔ جب میں نے اجتماع میں یہ تجویز پیش کی تو وہی لوگ اس تجویز کے مخالف ہو گئے جنہوں نے متفقہ رائے سے مجھے ناظم بنایا تھا ۔ میں نے کہا کہ آپ صرف تجویز کو منظور کر دیں۔ میں آپ لوگوں سے اس کے لئے کوئی رقم نہیں مانگوں گا۔ آپ لوگوں پر کسی قسم کا مالیاتی بوجھ ڈالے بغیر انشاء اللہ میں اس کو حاصل کر لوں گا۔ اور اس تجویز کو زیر عمل لاؤں گا۔ مگر لوگ بدستور اس تجویز کے مخالف بنے رہے۔

یہ میری زندگی کا پہلا واقعہ تھا جب مجھے احساس ہوا کہ میرے جیسے آدمی کے لئے جمہوری ڈھانچے میں کام کرنا سخت مشکل ہے۔ اس کے بعد مزید کئی تجربے ہوئے۔ شعبہ تصنیف جماعت اسلامی ہند، رام پور . مجلس تحقیقات ونشریات اسلام لکھنؤ ، الجمیعۃ ویکلی دہلی سے تعلق کے دوران یہ رائے مزید پختہ ہوگئی اور مجھ پر آخری طور پر یہ بات واضح ہوگئی کہ کوئی زندہ آدمی جمہوری ڈھانچہ میں رہ کر دیانت دارانہ طور پر کام نہیں کرسکتا۔

14 جولائی 1983

The strength of the chain is tested through its weakest link.

کسی زنجیر کی تمام کڑیاں مضبوط ہوں اس کی صرف ایک کڑی کمزور ہو تو زنجیر وہیں سے ٹوٹ جائے گی۔ اور پھر اس کا وہی انجام ہوگا جو تمام کڑیوں کی کمزوری کی صورت میں ہوتا۔ اس مثال پر اجتماعی اقدام کے معاملہ کو سمجھا جاسکتا ہے۔ اجتماعی اقدام میں جماعت کے تمام افراد کو دیکھنا ضروری ہے۔ کیونکہ ایک شخص بھی اگر کمزوری دکھائے تو اس کے نتیجہ میں پوری جماعت برباد ہوکر رہ جاتی ہے۔

15 جولائی 1983

جمعہ کی نماز پڑھ کر میں واپس ہورہا تھا۔ مسجد کے صحن میں پہنچا تھا کہ ایک لڑکے نے روک کر پوچھا : جمعہ کی نماز چودہ رکعت ہوتی ہے"۔ میں نے سوچا کہ موجودہ زمانہ میں " مسائل “ والی شریعت کا اتنا غلبہ ہوا ہے کہ لوگ رکعتوں کی تعداد پوری کرنے کو نماز سمجھتے ہیں۔ حالاں کہ نماز میں اصل چیزیاد خداوندی ہے نہ کہ رکعتوں کی تعداد ۔

16 جولائی 1983

یہ ایک مثال ہے جس سے اندازہ ہوتا ہے کہ اسلام نے دنیا اور آخرت دونوں کو ایک دوسرے سے جوڑ دیا ہے ۔ آدمی جب مسواک کرتا ہے تو اس سے اس کے منھ اور دانت کی صفائی ہوتی ہے۔ وہ دانت کی بیماریوں سے بچ جاتا ہے۔ اس کے ساتھ اس کی مومنانہ نفسیات کی بنا پر ایسا ہوتا ہے کہ جب وہ مسواک سے اپنا دانت صاف کر رہا ہوتا ہے تو طرح طرح سے اس کو اللہ کے انعامات اور اس کی حکمتوں کی یاد آتی رہتی ہے۔ یہ چیز اس کے مسواک کے عمل کو رضاء الٰہی کا ذریعہ بنا دیتی ہے۔

17 جولائی 1983

موجودہ مسلمانوں کے بارہ میں میرا تجربہ یہ ہے کہ وہ ایک زوال یافتہ قوم ہیں۔ ان سےایک شخص کو "موت" کا تجربہ ہوتا ہے ، مگر ان سے "زندگی" کا تجربہ نہیں ہوتا۔

موجودہ مسلمانوں کا حال یہ ہے کہ اگر انھیں کسی کے خلاف جھوٹا الزام لگانا ہو تو ان کو اتنے زیادہ الفاظ مل جائیں گے جیسے وہ لفظوں کے بادشاہ ہیں۔ مگر جب ان کی بات کو دلیل سے غلط ثابت کر دیا جائے اور وہ وقت آجائے جب کہ انھیں کھلے طور پر اپنی غلطی کا اعتراف کر لینا چاہئے تو وہ ایسے ہو جائیں گے جیسے کہ ان کے پاس الفاظ ہی نہیں ، جیسے کہ وہ اچانک گونگے ہوگئے ہیں اور اس کے ساتھ بہرے بھی ۔

18 جولائی 1983

عربی کا ایک مثل ہے کہ الغنم بالغرم (غنیمت تاوان پر ہے) یعنی اس دنیا میں پہلے نقصان اٹھانا پڑتا ہے، پھر فائدہ ملتا ہے۔ حتی کہ اس میں بالکل برابری کا اصول ہے ۔ کوئی شخص جتنا نقصان اٹھائے گا ، اسی کے بقدر اس کے لئے فائدہ کا استحقاق پیدا ہو گا ۔

قدیم انسان کو دو ہزار سال پہلے زندگی کے تجربات نے زندگی کی یہ حقیقت بتا دی تھی۔ مگر موجودہ زمانہ کے مسلمانوں کا حال یہ ہے کہ نہ دوسروں کی تاریخ انھیں یہ بات بتانے والی ثابت ہوئی اور نہ خود اپنے حالات سے وہ اس کو جان سکے ۔

19 جولائی1983

اس حدیث کو اگر کوئی شخص بالکل لفظی مفہوم میں لے لے تو حدیث اس کے لئے بے معنی ہو جائے گی۔ کیونکہ وہ اس کو قیامت سے تعلق سمجھے گا۔ اور قیامت کا معاملہ یہ ہے کہ جب وہ آئے گی تو کسی کو یہ ہوش ہی نہیں رہے گا کہ وہ زمین میں گڑھا کھو دے اور وہاں ایک پودا لگاۓ۔

20 جولائی 1983

فتح مکہ کے بعد عرب کے قبیلے کیوں اتنی کثرت سے اسلام میں داخل ہو گئے ، اس کی وجہ عمرو بن سلمہ کی ایک روایت میں ان الفاظ میں ملتی ہے:

كانت العرب تقوم باسـلامهمالم۔۔۔۔۔۔۔( عربی عبارت)

(بخاری ، کتاب المغازی)

یہ عرب کے مشرک قبائل کا حال تھا۔ مگر اسی ملک میں یہودی قبائل تھے، وہ رسول اللہ صلی اللہ علیہ وسلم کی فتح کو دیکھنے کے باوجود آپ کی رسالت پر ایمان لانے کے لئے تیار نہیں ہوۓ ۔ ایک طرف عرب قبائل فتح کو دیکھ کر آپ پر ایمان لانے کے لئے دوڑ رہے تھے ، دوسری طرف اسی ملک کے یہود اور منافقین یہ سازش کر رہے تھے کہ آپ کی فتح کو بے قیمت کر کے دوبارہ آپ کو شکست اور ناکامی سے دوچار کر دیں۔ یہ جاندار اور بے جان انسان کافرق ہے۔ جاندار انسان بھی حق کی مخالفت کرتا ہے اور بے جان انسان بھی۔ مگر دونوں میں فرق یہ ہے کہ جاندار انسان کی مخالفت کی حد آجاتی ہے مگر بے جان انسان کی کبھی نہیں آتی۔ بے جان انسان اپنی مخالفت پر بدستور قائم رہتا ہے۔ اس کی مخالفت اور اس کے عناد کو موت کے فرشتہ کے سوا کوئی او ختم کرنے پر قادر نہیں۔

21 جولائی 1983

They seemed to hope that the death of Gandhi might be the first step toward the violent reunification of India. They wished, by removing him, to make the Moslems defenseless, little realizing that his assassination would have the opposite effect by showing the country how dangerous and undisciplined extreme anti-Moslems could be.

انتہا پسندانہ اقدام ہمیشہ الٹا نتیجہ پیدا کرتا ہے ، اور اس الٹے نتیجہ کے شکارسب سے زیادہ وہی لوگ ہوتے ہیں جنہوں نے جھوٹی خوش فہمیوں کے تحت اپنا انتہا پسندانہ اقدام کیا تھا ۔

22 جولائی 1983

اقبال کا ایک مشہور شعر ہے جس کو اکثر مسلمان اصاغر واکا بر دہراتے ہیں۔ اس میں مرد مومن کی پہچان یہ بتائی گئی ہے کہ جب اس کی موت کا وقت آتا ہے تو اس کے چہرے پرمسکراہٹ کھیلنے لگتی ہے:

نشان مرد مومن با تو گویم چوں مرگ آید تبسم برلب اوست

یہ بلاشبہ ایک شاعرانہ تخیل ہے ، اس کا ایمان و اسلام سے کوئی تعلق نہیں۔ مرد مومن کا حقیقی نمونہ پیغمبر اور اصحاب پیغمبرتھے۔ رسول صلی اللہ صل االہ علیہ وسلم اورکسی پیغمبر کے بارہ میں یہ ثابت نہیں کہ ان کی موت کا لمحہ آیا تو وہ ہنسنے لگے ۔ اسی طرح اصحاب کرام میں سے کسی کے بارہ میں اس قسم کی روایت مستند کتابوں میں موجود نہیں۔ حقیقت یہ ہے کہ موت کا لمحہ مومن کے لئے فکرمندی کا لمحہ ہے نہ کہ ہنسی مسکراہٹ کا لمحہ۔

موجودہ مسلمانوں کا ذہن بگاڑنے میں سب سے زیادہ جن لوگوں کا دخل ہے وہ شاعر اور خطیب اور انشاء پرداز قسم کے " مفکرین" ہیں جو موجودہ زمانہ میں کثرت سے پیدا ہوئے ۔ ان لوگوں کے کرنے کا اصل کام یہ تھا کہ وہ قرآن وسنت کے مطابق مسلمانوں کی ذہنی تعمیر کریں ، مگر انھوں نے نہایت "مخلصانہ" طور پر صرف مسلمانوں کی ذہنی تخریب کا کام انجام دیا ہے۔

24 جولائی 1983

دوسرا گروہ جس کا ذکر ابن تیمیہ نے کیا ہے ، وہ پہلے گروہ سے بھی زیادہ وسیع ہے۔ کم از کم موجودہ زمانہ میں تو یہ حال ہے کہ 99 فی صد سے بھی زیادہ لوگ اس گروہ میں شامل ہیں۔ اور اس کی پہچان یہ ہے کہ ان میں سے کسی کے خلاف اگر تنقید کر دی جائے تو تنقید خواہ کتنی ہی زیادہ علمی کیوں نہ ہو ، زیر تنقید بزرگ اور ان کے معتقدین کا پورا حلقہ ناقد کا ازلی دشمن بن جائے گا۔

میرا پنا تجربہ ان لوگوں کے بارہ میں یہی ہے ۔ میں نے جب بھی ان بزرگوں میں سے کسی بزرگ پر تنقید کی توکبھی ایسا نہیں ہوا کہ میری تنقید کو خالص دلائل کے اعتبار سے دیکھا جائے۔ ہمیشہ اس کو اس نظر سے دیکھا گیا ہے کہ اس میں ہمارے بڑوں پر تنقید ہے ۔ موجودہ زمانہ میں کسی شخص کا سب سے بڑا جرم مسلمانوں کی نظر میں یہ ہے کہ وہ ان کے بڑوں پر تنقید کر دے ۔ یہ لوگ زبان سے اپنے بڑوں کو محفوظ یا معصوم نہیں کہتے ۔ مگر ان کا عمل یہی بتاتا ہے کہ وہ ان کو محفوظ اور معصوم قرار دیئے ہوئے ہیں۔

25 جولائی 1983

محمد بن سعید بوصیری ( 697۔ 608 ) مصر کے ایک صوفی بزرگ تھے۔ ان کے عربی اشعار کا دیوان چھپا ہے جو پورا کا پورا نعتیہ کلام پر مشتمل ہے ۔ ان کی ایک نعتیہ نظم " قصیدہ بردہ “ کو اتنی شہرت حاصل ہوئی کے مختلف زبانوں میں اس کے ترجمے کئے گئے اور 20 سے زیادہ اس کی شرحیں لکھی گئیں۔ قصیدہ بردہ کے بارہ میں بہت سی طلسماتی کہانیاں مشہور ہیں جنھوں نے اس کی مقبولیت میں مدد دی ہے۔ بہت سے لوگ اس کو ورد کے طور پر پڑھتے ہیں اور برکت کے لئے اپنے ساتھ رکھتے ہیں۔

اس کی مقبولیت کے باعث بہت سے لوگوں نے قصیدہ بردہ کے انداز میں قصیدے لکھے اور بہت سے لوگوں نے اس کی تضمین کی۔ محمد مصری نے "تسبیع" کے انداز میں ایک نظم لکھی ہے (تسبیع کا مطلب ہے پانچ مصرعے بڑھا کہ ہر بند کوسات مصرعے کا بند بنانا) اس کا ایک شعر یہ ہے :

محمد جاء بالآت والحكم مبشراً ونذيرا لجملة الامم

محمد نشانیاں اور حکمتیں لے کر آئے ، خوش خبری دینے والے اور تمام قوموں کو ڈرانے والے ۔

اس شعر میں جو بات کہی گئی ہے وہ نہایت صحیح ہے ۔ اس کے باوجو موجودہ زمانہ کے مسلمان انذار و تبشیر کے دعوتی عمل سے اتنا دور ہیں کہ ان کے اکابر تک اس کی اہمیت سے واقف نہیں۔ اس کی وجہ یہ ہے کہ مذکورہ قسم کی بات کو مسلمان محض بطور فخر کہتے ہیں۔ اور جو بات بطور فخر کہی جائے ، اس سے لوگوں کو فخر کی غذا تو مل سکتی ہے ، مگر اس سے ان کے اندر عمل کی تحریک نہیں ہوسکتی۔

26 جولائی 1983

To be without some of the things you want is an indispensable part of happiness.

یہ وہی بات ہے جس کو مذہب میں قناعت کہا گیا ہے۔ یہ حقیقت ہے کہ اس دنیا میں خوشی اور ذہنی سکون کو پانے کا واحد راز یہ ہے کہ آدمی پائی ہوئی چیز پر راضی ہو جائے اور جو چیز اس کو نہیں ملی ، اس کو فراموشی کے خانہ میں ڈال دے۔

27 جولائی 1983

یہ کون لوگ ہیں۔ یہ وہ لوگ ہیں جو قرآن کو کتاب تلاوت تو بناتے ہیں مگر وہ اس کو اپنے لئے کتاب ہدایت نہیں بناتے۔ جو دوسروں کو زیر کرنے کے لئے تو قرآنی آیتوں کے حوالے دیتے ہیں مگر خود اپنے آپ کو قرآنی احکام کے آگے نہیں جھکاتے۔ جو قرآن کے نام پر اعزاز حاصل کرنے کے لئے تو دوڑتے ہیں مگر قرآن کی خاطر چھوٹا بننے کے لئے تیار نہیں ہوتے جو قرآن کو دوسروں کے اوپر لیڈری حاصل کرنے کا ذریعہ تور بناتے ہیں مگر خود اپنے آپ کو قرآن کا پیرو بنانے کے لئے آمادہ نہیں ہوتے۔ جو انسانوں کے سامنے تو قرآن والا بننے کا کریڈٹ لیتے ہیں مگر فرشتوں کے سامنے قرآن والا بننے کی توفیق انھیں حاصل نہیں ہوتی ۔ یہ وہ لوگ ہیں جنھوں نے قرآن کو پڑھا ، مگر انھوں نے قرآن کو نہیں پایا۔

28 جولائی 1983

قرآن دور پریس سے ہزار سال پہلے اترا۔ مگر آج تک اس میں کوئی ادنیٰ فرق بھی پیدا نہ ہوسکا۔ یہ ایسا نادر استثناء ہے جو قدیم کتابوں میں سے کسی بھی دوسری کتاب کو حاصل نہیں۔

29 جولائی 1983

دانش مند وہ ہے جو ایک چیز اور دوسری چیز میں فرق کو جانے۔ یہی کامیابی کا راز ہے۔ اس دنیا میں وہی شخص کامیاب ہوتا ہے جو حقیقی مسئلہ اور غیر حقیقی مسئلہ میں فرق کرے۔ وہ حقیقی مسئلہ پر پوری توجہ دیتے ہوئے غیر حقیقی مسئلہ کو نظر انداز کر دے۔

30 جولائی 1983

محمد بن اسحاق تابعی (85-150ھ) قدیم ترین سیرت نگار ہیں۔ ان کی اصل کتاب اگرچہ اب موجود نہیں، مگر ابن ہشام کی موجودہ سیرت میں ان کی پوری کتاب شامل ہے۔

امام مالک نے ابن اسحاق کی تردید میں جو الفاظ کہے، وہ تنقید سے بھی آگے کے ہیں۔ مگر اتنی سخت تنقید کے باوجود کسی نے اس کو برا نہیں سمجھا۔ دور اول میں جب مسلمان زندہ تھے تو اس قسم کا اختلاف رائے یا تنقیدیں عام تھیں۔ موجودہ زمانہ کے مسلمان تنقید کو برداشت نہیں کر پاتے۔ اس کی وجہ یہ ہے کہ ہ بالکل مردہ ہو چکے ہیں، ان کے اندر زندگی کی قسم کی کوئی چیز باقی نہیں۔

31 جولائی 1983

کچھ لوگ ملاقات کے لیے آئے تھے۔ میں اپنے کمرہ میں ان سے گفتگو کر رہا تھا۔ درمیان میں کسی ضرورت کے تحت کمرہ سے باہر آیا تو میں نے دیکھا کہ میری لڑکی فریدہ خانم دروازہ کے پیچھے زمین میں بیٹھی ہوئی گفتگو کو سن رہی ہے۔ معلوم ہوا کہ وہ اکثر ایسا ہی کرتی ہے۔جب لوگ مجھ سے ملنے کے لیے آتے ہیں اور میں ان سے گفتگو کرتا ہوں تو وہ دروازے کے پیچھے بیٹھ کر پوری گفتگو کو انہاک کے ساتھ سنتی ہے ۔

میری باتوں کو اتنا زیادہ شوق اور دلچسپی کے ساتھ سننے اور سمجھنے والا میں نے اپنے تمام جاننے والوں میں صرف فریدہ خانم کو پایا ہے ۔ اس کو میرے مشن سے انتہائی قلبی تعلق ہے۔ میری باتوں کو بے حد توجہ سے سنتی ہے اور لفظ لفظ کو پکڑنے کی کوشش کرتی ہے۔

یہی وجہ ہے کہ اس نے میرے مشن کو نہایت گہرائی کے ساتھ سمجھا ہے۔ اکثر ایسا ہوتا ہے کہ اس کو جانچنے کے لئے میں اس سے کوئی سوال کرتا ہوں۔ بیشتر حالات میں ایسا ہوتا ہے کہ وہ اس سوال کا عین وہی جواب دیتی ہے جو میرے ذہن میں ہوتا ہے۔ مشن سے گہرے تعلق کی بنا پر اس کے اندر یہ فکری ہم آہنگی پیدا ہوگئی ہے۔