حدیث سے استدلال

پورے ذخیرۂ حدیث میں کوئی معتبر روایت ایسی موجود نہیں جس کے عبارت النص میںیہ حکم دیا گیا ہو کہ سب و شتم کرنے والے کو قتل کردو۔ مثلاً اس کے الفاظ یہ ہوں کہ ’’مَن سَبَّ رَسُولَكُمْ فَاقْتُلُوهُ.‘‘ (جو تمھارے رسول کی سب و شتم کرے اس کو تم سب قتل کردو)یا ’’ مَن شَتَمَ نَبِيًّا مِنَ الأَنْبِيَاءِ فَيُقْتَلُ حَدًّا‘‘(جو کسی بھی نبی کی سب و شتم کرے اس کو بطور حد قتل کیا جائے گا)۔ اس سلسلے میں حدیث سے قتل کا جو حکم نکالا گیا ہے، وہ حکم بطریقِ قیاس نکالا گیا ہے ، نہ کہ بطریقِ نص۔

اس معاملہ میں سب سے عام استدلال یہ ہے کہ حدیث میں یہ حکم آیا ہے کہ جو شخص اپنے دین کو بدل ڈالے اس کو قتل کردو مَنْ بَدَّلَ دِينَهُ فَاقْتُلُوهُ(صحیح البخاری، حدیث نمبر3017)۔ کہا جاتا ہے کہ چونکہ رسول کا سب و شتم ارتداد کے ہم معنی ہے، اس لیے ایسا فعل کرنے والا مرتد ہوگیا۔ اور جب وہ مرتد قرار پا گیا تو حدیث کے مطابق وہ اس کا مستحق ہو گیا کہ اس کو قتل کر دیا جائے۔ یہ استد لال کی وہی قسم ہے جس کے ذریعہ شاعر نے شہد کی مکھی کے ’’ قتل ‘‘ کا جواز نکالا تھا

اس کی ایک مثال لیجیے۔ یہ مثال وہ ہے جوقرآن کی سورہ نمبر108(الکوثر) کے مطالعہ سے معلوم ہوتی ہے۔

عربی زبان میں ابتر کے معنی ہیں کٹا ہوا۔ عربی میں اس شخص کو ابتر کہا جاتا ہے جو بےاولاد ہو۔ رسول اللہ صلی اللہ علیہ وسلم کے یہاں چونکہ اولاد نرینہ نہ تھی،اس لیے مکہ کے لوگ آپ صلی اللہ علیہ وسلم کو ابتر کہتے تھے۔ یعنی ایسا شخص جس کی نسل آئندہ باقی نہ رہے۔ عاص بن وائل قدیم مکہ کا ایک مشرک سردار تھا۔ اس کے سامنے رسول اللہ صلی اللہ علیہ وسلم کا ذکر کیا جاتا تو وہ کہتا کہ انھیں چھوڑو، وہ ایک ابتر شخص ہیں ان کے بعد ان کا کوئی وارث نہیں۔ جب کہ وہ ختم ہوں گے تو ان کا ذکر بھی ختم ہو جائے گا دَعُوهُ فَإِنَّهُ رَجُلٌ أَبْتَرُ لَا عَقِبَ لَهُ، فَإِذَا هَلَكَ انْقَطَعَ ذِكْرُهُ (تفسیر ابن کثیر،جلد8، صفحہ 477)۔

چنانچہ اس کی تردید میں وہ سورہ اتری جس کو الکوثر (108)کہا جاتا ہے۔ اس میں اللہ تعالیٰ نے اعلان کیا کہ ہم نے محمد کو کوثر دے دیا ہے۔ محمد ابتر نہیں ہیں۔ بلکہ وہ لوگ ابتر ہیں جو محمد کی مخالفت کر رہے ہیں۔

کوثر کے لفظی معنی خیر کثیر کے ہیں۔ حضرت عبداللہ بن عباس نے فرمایا کہ اس سے مراد وہ خیر ہے جو اللہ نے آپ کو دیا هُوَ الْخَيْرُ الَّذِي أَعْطَاهُ اللَّهُ إِيَّاهُ (تفسیر ابن کثیر، جلد8، صفحہ 474)۔ ابن عباس کے شاگرد عکرمہ نے اس کی مزید وضاحت کرتے ہو ئے کہا کہ اس سے مراد نبوت اور قرآن ہے  هُوَ النُّبُوَّةُ، وَالْقُرْآنُ (تفسیر ابن کثیر، جلد8، صفحہ 474) ۔

مرتد اور شاتم کے فرق کو سمجھنے کے لیے ایک مثال لیجیے۔ ابن تیمیہ نے لکھا ہے کہ عرب کے مشرکین رسول اللہ صلی اللہ علیہ علیہ وسلم کے خلاف جو سب و شتم کرتے تھے ، حسّان بن ثابت انصاری اشعار کے ذریعہ اس کا جواب دیتے تھے۔ یہ اشعار ان شاتمین کو تیر سے بھی زیادہ سخت بن کر لگتے تھے۔

اس مقصد کی خاطر حسّان بن ثابت کے لیے مدینہ کی مسجد نبوی میں ایک منبر رکھا جاتا تھا۔ اس پر بیٹھ کر وہ اپنے جوابی اشعار پڑھتے تھے اور اس طرح رسول اللہ صلی اللہ علیہ وسلم کی طرف سے شاتمین کے مقابلہ میں منافحت (مدافعت) کرتے تھے ( الصارم المسلول علی شاتم الرسول،200)۔

پہلی بات انتہائی با معنی معلوم ہو رہی تھی، مگر دوسری بات اتنی ہی بے معنی معلوم ہو نے لگی۔ کیونکہ مرتدین کا مقابلہ تلوار ہی کے ذریعہ کیا جا سکتا ہے، جیسا کہ خلیفہ اول ابو بکر صدیق رضی اللہ تعالی عنہ نے کیا۔ مگر سب و شتم کرنے والوں کا مقابلہ یہ ہے کہ ان کے الفاظ کا جواب زیادہ طاقتور الفاظ سے دیا جائے جیسا کہ حسّان بن ثابت انصاری نے کیا اور کامیاب ہوئے۔ اس مثال سے مرتد اور شاتم کے فرق کو سمجھا جا سکتا ہے۔

اس کے برعکس، شتم کا تعلق مومن اور کافر دونوں سے ہے۔ فقہاء کا عام طور پر یہ کہنا ہے کہ رسول کی شاتمیںگستاخی کرنے والا ہر حال میں قتل کردیا جائے گا، خواہ وہ مومن ہو یا کافر۔ ابن تیمیہ کے الفاظ میں جو شخص رسول اللہ صلی اللہ علیہ وسلم پر سب و شتم کرے، خواہ وہ مسلم ہو یا کافر، بیشک اس کو قتل کرنا واجب ہے ’’ أَنَّ مَن سَبَّ النَّبِيَّ صَلَّى اللَّهُ عَلَيْهِ وَسَلَّمَ مِنْ مُسْلِمٍ أَوْ كَافِرٍ فَإِنَّهُ يَجِبُ قَتْلُهُ، هَذَا مَذْهَبٌ عَلَيْهِ عَامَّةُ أَهْلِ الْعِلْمِ‘‘( صفحہ4)۔

اب ایک ایسی حدیث جس کاتعلق صرف مسلمانوں کے گروہ سے ہو، جس میں مدعی ایمان کا مسئلہ بتایا گیا ہو، اس كو ایک ایسے عمومی حکم کا ماخذ کیوں کر بنایا جاسکتا ہے جس کاتعلق مومن اور کافر دونوں سے ہو، جس کو دونوں گروہوں کے اوپر یکساں طور پر نافذ کرنا مقصود ہو۔

دوسرے مضمون میں ہم نے تفصیل کے ساتھ بتایا ہے کہ قرآن میں استہزاء کرنے والوں کے بارے میں یہ حکم ہے کہ ان کو مناسب انداز میں جواب دو۔ اگر اس کے باوجود وہ نہ مانیںتو ان سے اعراض اور ہجر جمیل کا طریقہ اختیار کرو۔ اسی طرح سنت کے بارے میں بتایا گیا ہے کہ عرب میں جو لوگ رسول اللہ صلی اللہ علیہ وسلم کے خلاف ہجو اور بد گوئی کر رہے تھے، ان کے مقابلہ میں آپ نے منافحت لسانی کا طریقہ اختیار کیا ، نہ کہ منافحت شمشیری کا۔

اسی طرح ابن تیمیہ نے لکھا ہے کہ ابو جہل کو اس کے سب وشتم کی بنا پر دو انصاری نوجوانوں نے قتل کیا(159-160)۔ مگر یہ سراسر بے دلیل بات ہے۔ ابو جہل میدان جنگ میں رسول اللہ صلی اللہ علیہ وسلم کے خلاف لڑائی لڑتا ہوا مارا گیا۔ وہ مشرکوں کی فوج لے کر مدینہ پر چڑھائی کے ارادہ سے نکلا تھا۔ مسلمانوں نے آگے بڑھ کر بدر کے مقام پر اس کا مقابلہ کیا۔ اس مقابلہ میں بہت سے مشرکین مارے گئے۔ انھیں میں ایک ابو جہل تھا۔ اس کو قتل بر بنائے شتم کا کیس قرار دینا بالکل بے معنی بات ہے۔