غلط ترجمانی

سلمان رشدی کی کتاب شیطانی آیات (Satanic Verses) پر موجودہ لکھنے اور بولنے والے مسلمانوں نے جس شدت کے ساتھ غصہ کا اظہار کیا ہے اس کی کوئی دوسری مثال غالباً جدید دور میں نہیں ملے گی۔ اردو، انگریزی، عربی اور دوسری زبانوں میں اس کے خلاف کثرت سے بیانات اور مضامین شائع ہو چکے ہیں۔

اس عبارت میں ایک واضح غلطی موجود ہے۔ وہ یہ کہ اس میں مسلمانوں کے رد عمل کے لیے عام انسانوں کے ردعمل کو نمونہ قرار دیا گیا ہے۔ حالانکہ مسلمانوں کے لیے نمونہ رسول اللہ صلی اللہ علیہ وسلم کی سنت میں ہے ، نہ کہ عام انسانوں کی روش میں۔

رسول کی ایذا رسانی پر مسلمانوں کا ردعمل کیاہو، یہ ایک خالص دینی معاملہ ہے۔ اس کا تعین قرآن و سنّت کی روشنی میں کیا جائے گا ، نہ کہ عام انسانوں کے سلوک کی روشنی میں۔ اس کے لیے نمونۂ عمل رسول اللہ صلی اللہ علیہ وسلم کا سلوک ہے ، نہ کہ عام انسانوں کا سلوک۔

اس سے واضح ہے کہ ام المومنین کے بارے میں سلمان رشدی نے جو مجرمانہ فعل کیا ہے، اس جرم کا ارتکاب خود پیغمبر اسلام صلی اللہ علیہ وسلم کی زندگی میں کیا گیا تھا۔ مزید یہ کہ یہ ارتکاب جرم اس وقت ہوا جب کہ پیغمبر اسلام کو مجرم کے اوپر پوری طرح حاکمانہ اختیار حاصل تھا۔ رسول اللہ صلی اللہ علیہ وسلم کی زندگی ہمارے لیے ہر اعتبار سے نمونہ ہے، اس لیے ہمیں دیکھنا چاہیے کہ آپ نے اس وقت مذکورہ جرم کے مجرم کے ساتھ کیا معاملہ فرمایا۔

تاریخ واضح طور پر بتاتی ہے کہ اس مجرم اول (عبداللہ بن ابی)کو اس جرم پر کوئی سزا نہیں دی گئی۔ حضرت عمر فاروق نے، حتی کہ خود مجرم کے بیٹے عبداللہ نے، اس کو قتل کرنے کی اجازت طلب کی ۔ مگر رسول اللہ صلی اللہ علیہ وسلم نے سخت ترین اذیت کے باوجود ، اور یہ جانتے ہوئے کہ وہ ایک ثابت شدہ مجرم ہے، اس کے قتل کی اجازت نہیں دی۔ آپ اس کو چھوڑے رہے، یہاں تک کہ اپنی طبعی موت سے اس کا انتقال ہو گیا۔

یہ ہے نمونہ جو اس طرح کے معاملات میں پیغمبر اسلام نے ہمارے لیے چھوڑا ہے۔ ہمیں اسی نمونہ کو اختیار کرنا ہے۔ عام انسانوں کی روش کا حوالہ دے کر ہنگامہ آرائی کرنا سرکشی کی بات ہے ، نہ کہ ایمان و اسلام کی بات۔

سلمان رشدی کی کتاب کی اشاعت کے بعد مسلمانوں نے لایعنی ہنگامے کیے اس کو دوسرے انسانوں کی روش کو حوالہ دے کر صحیح بتانا لغویت کی حد تک غیر اسلامی ہے۔ کیونکہ مسلمانو ںکے لیے رسول خدا کے عمل میں نمونہ ہے ، نہ کہ دوسرے انسانوں کے عمل میں۔