سامان تضحیک

انگلینڈ میں قدیم زمانہ سے ایک قانون ہے جو مذہبی بے حرمتی (Blasphemy) سے تعلق رکھتا ہے۔ یہ قانون سترہویں صدی میں بنایا گیا۔ عیسائیت (انیگلیسکن چرچ کی تشریح کے مطابق) انگلینڈ کا سر کاری مذہب ہے۔ اس قانون سازی کی وجہ ، بنیادی طور پر، یہ تھی کہ یہ سمجھا گیا کہ مذہب پر حملہ لازمی طور پر خود ریاست پر حملہ ہے

موجودہ حالت میںاس قانون کا تعلق صرف عیسائی مذہب سے ہے۔ برطانیہ کے مسلمان (زیادہ صحیح الفاظ میں ، برطانیہ میں مقیم کچھ ہندوستانی مسلمان)وہاںیہ مہم چلارہے ہیں کہ مذکورہ قانون میں وسعت پیدا کرکے اس کو مسلم مذہب تک وسیع کیا جائے ، تا کہ اس کے تحت سلمان رشدی کی کتاب کے خلاف عدالت میں مقدمہ چلایا جاسکے۔

میرے نزدیک یہ مطالبہ بالکل لغو ہے۔ حقیقت یہ ہے کہ یہ صرف جھوٹی لیڈری ہے، ورنہ خود مطالبہ کرنے والے بھی اچھی طرح جانتے ہیں کہ موجودہ حالات میں اس طرح کے قوانین کا عملی طور پر مطلق کوئی فائدہ نہیں۔

دوسری بات یہ ہے کہ یہ انتہائی سطحیت بھی ہے۔ مسلم ملکوں میں اسلام یا اسلامی شخصیتوں کی بے حرمتی کے خلاف قوانین موجود ہیں۔ کیا مسلمان اس کے لیے راضی ہوں گے کہ ان قوانین کو عیسائیت، ہندوازم اور یہودیت تک وسیع کیاجائے۔ خواہ اس کے تحت دوسرے مذاہب کے لوگوں کو موقع ملے کہ وہ مسلمانوںکے خلاف مقدمات قائم کرسکیں کہ انھوں نے ان کے مذہب کی بے حرمتی کی ہے۔ مسلمان جو حق اپنے ملک میں دوسروں کو نہیں دے سکتے ۔ اس حق کو دوسروں کے ملک میں اپنے لیے مانگنا بلاشبہ صرف سطحی لیڈری ہے، اس کا اسلام سے کوئی تعلق نہیں۔

اس کے جواب میں برطانیہ کے ہوم آفس کے منسٹر آف اسٹیٹ مسٹر جان پیٹن (John Patten)نے انھیں ایک خط بھیجا ہے۔ یہ خط ٹائمس آف انڈیا (6جولائی1989) کے آخری صفحہ پر چھپا ہے۔

برطانیہ کے عیسائی ہوم سکریٹری کے الفاظ مسلمانوں کے اوپر گہرا طنز ہیں۔ اس کا مطلب یہ ہے کہ ہمارا مذہب اتنا طاقتور ہے کہ بے حرمتی کے خلاف قانون کے ہوتے ہوئے بھی ہم اس کے استعمال کی ضرورت نہیں سمجھتے ۔ دوسری طرف تمہارا یہ حال ہے کہ تم سمجھتے ہو کہ تمہارے مذہب کی حرمت اسی وقت محفوظ رہ سکتی ہے جب کہ اس کی پشت پر قانون اپنا ڈنڈا لیے ہوئے اس کی چوکیداری کر رہا ہو۔