فرضی افسانہ

سلمان رشدی کی کتاب شیطانی آیات(The Satanic Verses)جو 547 صفحات پر مشتمل ہے، اس پر نیو یارک کے ہفت روزہ ٹائم (13فروری1989) میں تبصرہ شائع ہوا ہے۔ تبصرہ نگار مسٹر پال گرے(Paul Gray)کا کہنا ہے کہ کتاب کے خلاف مسلمانوں کے عوامی احتجاجات(Public protests)غیر ضروری تھے۔ راقم الحروف خودبھی اس قسم کے احتجاج اور شور وغل کو غیر ضروری سمجھتا ہے۔ کتا اگر ہاتھی پر بھونکے تو ہاتھی کتے پر نہیں بھونکتا۔ کیوں کہ ہاتھی کی عظمت بذات خود کتے کی ہر بھونک کا جواب ہے ۔ اور جب چپ کی زبان کافی ہو تو بولنے کی زبان استعمال کر نے کی کیاضرورت۔

تاہم اس سلسلہ میں تبصرہ نگار نے جو تو جیہ کی ہے، اس تو جیہ سے مجھے اتفاق نہیں ۔ وہ کہتے ہیں کہ کتاب اسکے سوا اور کچھ نہیںکہ تاریخ کی جگالی (Rumination on history)ہے۔ بالفاظ دیگر ،وہ اصلاً تاریخی واقعات پر مبنی ہے، اور جب ایسا ہے تو اس کے خلاف ہنگامہ اور احتجاج کیوں۔ مگر یہ مفروضہ بذات خود واقعہ کے مطابق نہیں کہ کتاب میں جو باتیں درج ہیں ان کی بنیاد کسی تاریخی واقعہ پر ہے۔ حقیقت یہ ہے کہ یہ کتاب اپنے اسلوب کے اعتبار سے بھی افسانہ ہے اور اپنی تاریخی بنیاد کے اعتبار سے بھی افسانہ۔

تبصرہ نگار لکھتے ہیں کہ کتاب میں جبریل اور محمد کے درمیان تبادلۂ کلام ، بظاہر بگڑے ہوئے اور خیالی انداز میں ، ایک قصہ پر مبنی ہے جو محمد کی زندگی میں پیش آیا ۔ پیغمبر ابتداءً اس پر راضی ہو گئے کہ عرب کی تین دیویوں کا اعتراف قرآن میںشامل کردیں، اور بعد کو انھوں نے یہ کہہ کر انکار کر دیا کہ یہ آیتیں شیطان کی الہام کی ہوئی تھیں۔ اگر محمد خود یہ اقرار کر نے کے لیے تیار تھے کہ انھیں دھوکا دیا گیا ہے تو یہ سمجھنا مشکل ہے کہ قدیم گزرے ہوئے واقعہ کا مماسی (tangential)اور افسانوی بیان آج کیوں اتنے ہنگامہ کا سبب بن جائے

"The Gibreel-Mahound exchanges are based, in a distorted and hallucinatory manner, on an episode in the life of Muhammad—the Prophet's early willingness to include in the Quran an acknowledgement of three female deities and his later repudiation of these verses as satanically inspired. If Muhammad was willing to admit that he had been deceived, it is difficult to see why a tangential, fictional version of this long-ago event should cause such contemporary uproar." (p.42).

أَفَرَأَيْتُمُ اللَّاتَ وَالْعُزَّى۔ وَمَنَاةَ الثَّالِثَةَ الْأُخْرَى۔ أَلَكُمُ الذَّكَرُ وَلَهُ الْأُنْثَىٰ۔ تِلْكَ إِذًا قِسْمَةٌ ضِيزَى (53:19-22)۔ یعنی، کیاتم نے لات اور عزیٰ کو دیکھا۔ اور تیسرے ایک اور منات کو۔ کیا تمہارے لیے بیٹے ہیں اور خدا کے لیے بیٹیاں۔ یہ تو بہت بے ڈھنگی تقسیم ہے۔

قدیم عرب میں تین بڑے بت تھے — لات، عزیٰ ، اور منات۔ ان بتوں کو اس زمانہ میں بہت بڑی چیز سمجھا جاتا تھا۔ ان بتوں کی بڑائی بیان کر نے کے لیے لوگوں نے طرح طرح کے کلمات وضع کر رکھے تھے۔ یاقوت الحموی نےمعجم البلدان میں لکھا ہے کہ قریش کعبہ کا طواف کرتے ہوئے یہ الفاظ کہا کر تے تھے اللَّاتَ وَالْعُزَّى. وَمَناةَ الثَّالِثَةَ الْأُخْرى فَإِنَّهُنَّ ‌الْغَرَانِيقُ ‌الْعُلَى وَإِنَّ شَفَاعَتَهُنَّ لَتُرْتَجَى (معجم البلدان، جلد 4، صفحہ 116)۔یعنی،قسم ہے لات اور عزیٰ کی اور تیسرے منات کی۔ یہ سب بلند ترین ہیں ۔ ان کی سفارش ضرور متوقع ہے۔

رسول اللہ صلی اللہ علیہ وسلم پر مکہ میں سورہ النجم کی مذکورہ آیتیں اتریں تو آپ نے حسب معمول ایک مجمع میں ان کو سنایا۔ وہاں مسلمانوں کے ساتھ کچھ مشرک لوگ بھی موجود تھے۔ رسول اللہ صلی ا للہ علیہ وسلم کی زبان سے جب یہ الفاظ نکلے أَفَرَأَيْتُمُ اللَّاتَ وَالْعُزَّى. وَمَناةَ الثَّالِثَةَ الْأُخْرى (کیاتم نے لات اور عزیٰ کو دیکھا۔ اور تیسرے ایک اور منات کو)تو بعض مشرکین نے اس میں اپنے الفاظ ملادیے۔ اپنے بتوں کے نام سن کر وہ فوراً وہ الفاظ بول پڑے جو ان بتوں کی نسبت سے پہلے سے ان کے یہاں رائج تھے اور جن کو وہ ان بتوں کے نام کے ساتھ جوڑ کر کہا کرتے تھے۔ وہ الفاظ یہ تھے  فَإِنَّهُنَّ ‌الْغَرَانِيقُ ‌الْعُلَى وَإِنَّ شَفَاعَتَهُنَّ لَتُرْتَجَى (یہ تینوں بلند مرتبے کے خوبصورت پرندے ہیں، اور ان سے سفارش کی امید كي جاتي ہے)۔

ان دوسرے الفاظ کا کوئی بھی تعلق پیغمبر اسلام سے نہ تھا۔آپ نے تو صرف اول الذکرالفاظ (أَفَرَأَيْتُمُ اللَّاتَ وَالْعُزَّى. وَمَناةَ الثَّالِثَةَ الْأُخْرى) فرمائے تھے۔ثانی الذکر الفاظ (فَإِنَّهُنَّ ‌الْغَرَانِيقُ ‌الْعُلَى وَإِنَّ شَفَاعَتَهُنَّ لَتُرْتَجَى) تمام ترمشرکین کے الفاظ تھے جن کو انھوں نے آواز ملا کر اپنی طرف سے کہہ دیا۔ یہی بات بعض مفسرین نے ان الفاظ میں کہی هے

’’أَنَّ الشَّيْطَانَ أَوْقَعَ فِي مَسَامِعِ الْمُشْرِكِينَ ذَلِكَ فَتَوَهَّمُوا أَنَّهُ صَدَرَ عَنْ رَسُولِ اللَّهِ صَلَّى اللَّهُ عَلَيْهِ وَسَلَّمَ، وَلَيْسَ كَذَلِكَ فِي نَفْسِ الْأَمْرِ، بَلْ إِنَّمَا كَانَ مِنْ صَنِيعِ الشَّيْطَانِ لَا مِنْ رَسُولِ الرَّحْمَنِ صَلَّى اللَّهُ عَلَيْهِ وَسَلَّمَ(تفسیر ابن کثیر، جلد5، صفحہ389)۔ یعنی، شیطان نے مشرکوں کے کان میں یہ الفاظ ڈال دیے ۔ پس مشرکوں نے گمان کرلیا کہ یہ خود رسول اللہ صلی اللہ علیہ وسلم کی زبان سے نکلا ہوا ہے۔ حالانکہ حقیقت میں ایسا نہ تھا۔ وہ دراصل شیطان کا کلام تھا، نہ کہ رسول ِ رحمان صلی اللہ علیہ وسلم کا کلام۔‘‘

واقعہ کی سادہ شکل وہی ہے جو اوپر نقل کی گئی ۔ مگر اسلام کے کچھ مخالفوں نے اس واقعہ کو غلط صورت دے کر ایک خودساختہ کہانی بنائی۔ انھوں نے مشرکین کے قول کو پیغمبر کاقول دیدیا۔ اور کہا کہ پیغمبر اسلام پر سورہ النجم اتاری جارہی تھی جب اس کا سلسلہ وَمَناةَ الثَّالِثَةَ الْأُخْرى تک پہنچا تو اس کے بعد شیطان نے مذکورہ الفاظ آپ پر القاء کر دیے ۔ آپ نے قرآن کی آیت کے ساتھ اس کو ملا کر مجمع میں پڑھ دیا۔ بعد کو آپ کو غلطی کا احساس ہوا تو آپ نے اعلان کیا کہ مذکورہ کلام خدا کا کلام نہیں تھا۔ وہ شیطان کا کلام تھا۔ یہ کہہ کر اس کو قرآن سے حذف کر دیا۔