اسلام مغربی لٹریچر میں

ڈاکٹر ہٹی(Plilip K. Hitti)عربی زبان اور تاریخ کے مشہور ماہر ہو نے کی حیثیت سے مغربی دنیا میں مشرق قریب کے مسائل پر سند سمجھے جاتے ہیں۔ انھوں نے عرب اور اسلام کے موضوعات پر متعدد کتابیں لکھی ہیں اور انسائیکلو پیڈیا کے مقالہ نگار ہیں۔ ان کی کتابیں یورپ اورا یشیا کی مختلف زبانوں میں ترجمہ ہو تی رہی ہیں۔ وہ مختلف یونیورسٹیوں میں اعلیٰ عہدوں پر فائز رہے ہیں۔ اور اس وقت پرنسٹن یونیورسٹی (نیوجرسی) میں سامی ادب کے پروفیسر ہیں۔

شام کے مشہور عیسائی عالم سینٹ جان آف دمشق(749ء)کو باز نطینی روایات کا بانی کہا جاسکتا ہے۔ جان نوجوانی کی عمر میں بنو امیہ کے دربار میں حا ضر ہوا۔ وہ عربی، سریانی اور یونانی زبانیں جانتا تھا اور اپنے زمانہ کے اہل علم میں ممتاز درجہ رکھتا تھا۔ اس نے اپنی کتاب میں اسلام کا تعارف ایک بت پرستانہ مذہب کی حیثیت سے کیاہے جس میں ایک جھوٹے رسول کی پرستش ہو تی ہے ۔ اس کے بیان مطابق محمد صلی اللہ علیہ وسلم نے ایک آرین راہب کی سر پرستی میں بائبل کی مدد سے اپنے اصول وضع کیے۔ یہ اسلام کے متعلق عیسائیت کے قدیم اور عام تصور کی ایک مثال تھی۔ چنانچہ ڈانتے(وفات 1321ء) نے اپنی مشہور کتاب میں محمد صلی اللہ علیہ وسلم اور علی رضی اللہ تعالیٰ عنہ کو نویں جہنم کے سپرد کردیا جو تفرقہ پر دازوں اور رسواکن اعمال کرنے والوں کے لیے مخصوص ہے(نعوذبا للہ)۔

بازنطینیوں میں پہلا شخص جس نے محمد صلی اللہ علیہ وسلم کا باقاعدہ ذکر کیا اور اسلام پر گفتگو کی، وہ مورخ تھیوفینس(Theophanes)ہے۔ جس کا زمانہ 758-818ہے۔ وہ ایک خانقاہ کا بانی بھی تھا۔ تھیوفین بغیر کسی حوالے کے محمد صلی اللہ علیہ وسلم کو’’مشرقی باشندوں کا حکمراں اور ایک بناوٹی رسول‘‘لکھتا ہے۔ ڈانتے کا ایک ہم عصر مسیحی جس نے بغداد کا سفر کیا تھا، اس نے یہ نظریہ پیش کیا کہ شیطان جب خود مشرقی ممالک میں عیسائی مذہب کی ترقی کو روک نہ سکا تو اس نے اپنی طرف سے ایک آسمانی کتاب تیار کی اور ایک ابلیس فطرت آدمی کو اپنے وسیلہ کے طور پر استعمال کیا۔ یہ آسمانی کتاب قرآن اوروہ وسیلہ محمد ہیں(نعوذبااللہ)۔

عبدالمسیح بن اسحاق الکندی ایک مشرقی عیسائی تھا۔ اس کو اسپین میں ایک سیدزاد ہ مسلمان نے تحریری طور پر اسلام قبول کرنے کی دعوت دی۔ اس واقعہ نے عرب کے عیسائی کو موقع دیا کہ وہ عیسائیت کادفاع کرے اور اسلام پر حملہ آور ہو۔ الکندی نے محمد صلی اللہ علیہ وسلم کو ایک شہوت پرست اور ایک قاتل کی حیثیت سے پیش کیا جن کی کتاب محض مصنوعی الہامات کا مجموعہ تھی اور جن کا مذہب دھوکے،تشدد اور نفس پرستانہ تعلیمات کی چاٹ دلا کر پھیلایا گیا(رسالات الکندی مطبوعہ قاھرہ 1912ء)۔

ان باتوں کے نتیجہ میں عیسائی دنیا میں محمد صلی اللہ علیہ وسلم کے خلاف کچھ ایسی فضاپیدا ہو گئی تھی کہ کوئی افسانہ خواہ کتنا ہی عجیب ہو اور اس کی کوئی اصل نہ ہو، فوراً قبول کرلیا جاتا تھا۔ قرطبہ کاایک بشپ ایولوگیس(Eulogius) جو اپنے وقت کا بہت بڑا عالم تھا، وہ لاطینی تحریر کے حوالے سے جو ایک عیسائی راہب نے تیار کی تھی، لکھتا ہے کہ محمد صلی اللہ علیہ وسلم کی وفات کے بعد ان کے اصحاب فرشتوں کا انتظار کر رہے تھے جو اتریں اور ان کے جسم کو اوپرلے جائیں ۔ مگر اس کے بجائے کتے آئے اور ان کے جسم کو کھا گئے اسی لیے مسلمان ہر سال بہت بڑے پیمانے پر کتوں کو ہلاک کرتے ہیں۔ ایولوگیس، اسپین کے مسلم دارالسلطنت میں رہتا تھا۔ وہ معمولی کوشش سے جان سکتا تھا کہ اس پورے افسانے میں صرف اتنی سی حقیقت ہے کہ مسلمان کتے کو ایک ناپاک جانور سمجھتے ہیں۔

بارہویں اور تیرہویں صدی میں صلیبی جنگوں کے ذریعہ اسلام کو مغلوب کرنے کی کوشش جب ناکام ہو گئی تو مسیحی حلقہ میں ایک نیا رجحان ابھرا— اسلام کو تبلیغ و تحریص کے ذریعہ تباہ کیا جائے۔ بے دخلی کی کوشش کی جگہ عقیدہ کی تبلیغ نے لے لی۔ مشنری تحریک وجود میں آئی۔ کارملی رہبانوں کا حلقہ (Carmelite Friar Order)ایک صلیبی ہی نے (1154ء)ماونٹ کارمل پر قائم کیا تھا۔ اس صلیبی کا نام (Berthold)ہے۔ اس جماعت کے لوگ سفید چغہ پہنتے تھے، اسی لیے ان کو سفید پوش رہبان (White Friars)کہا جاتا ہے۔ (مترجم) فرانسس بیکن نے اس کی پیروی کی۔ 1219ء میں سینٹ فرانسس آف اسیسی قاہرہ گئے اور فرانسس کن مشنری سرگرمیوں کا آغاز کیا۔ مگر اس دور کی سب سے بڑی مشنری تحریک ایک اسپینی تحریک تھی، جو ریمنڈلل(Raymond Lull)نے شروع کی جس کا زمانہ 1232-1315ءہے۔ لل نے روحانی صلیبی جنگ(Spiritual Crusades) کے لیے بہت دانشمندانہ نقشے بنائے جس کا مقصد مسلمانوں کو عیسائی بنانا تھا۔ بحث و مناظرہ اور استدلال کے ذریعہ کامیاب ہونے کے بارے میں اس کایقین آ خر وقت تک قائم رہا۔ اس کی تیاری کے لیے اس نے عربی پڑھی اور اپنی خانقاہ میں اس کا درس دینا شروع کیا جو اس نے مرامر(Miramar)میں قائم کی تھی۔ اس کی عربی زبان اور اسلام سے اس کی واقفیت اس زمانہ میں اپنی مثال نہیں رکھتی تھی۔ مگر ٹیونس میں اس کی مشنری سرگرمیاں ناکام ہو گئیں۔ توحید پرست مسلمانوں کے ذہن میں تثلیت کا عیسائی عقیدہ بٹھانے کی کوشش اتنی فضول تھی کہ بالآخر اس نے اسلام پر حملہ کرنا شروع کیا۔ وہ گلیوں میں نکل کر چلاتا پھرتا تھا— ’’عیسائیوں کا عقیدہ صحیح ہے اور مسلمانوں کا عقیدہ غلط ہے۔‘‘ٹیوسن میں ایک مشتعل مجمع نے اس پر حملہ کیا اور پتھر مارنے شروع کیے۔یہاں تک کہ وہ ہلاک ہو گیا۔

عیسائیت اور اسلام میں زبان کا روک پہلی بار اس وقت ٹوٹا جب فرانس میں قرآن کا ترجمہ لاطینی زبان میں کیا گیا۔ یہ بیرونی زبان میں قرآن کا پہلا ترجمہ ہے۔ یہ ترجمہ تخمیناً 1141ء میں کیا گیاتھا اور اس کے کرنے والے تین عیسائی اور ایک عرب باشندہ تھا۔ اس ترجمہ ٔ قرآن کے ساتھ ایک ضمیمہ اس عنوان کے ساتھ لگاہوا تھا— ’’مسلمانوں کے عقائد کی تردید‘‘اس کے بعد 1649میں فرنچ مستشرق سیورڈوریر(Sieur du Ryer)نے اس ترجمہ کی مدد سے قرآن کو فرانسیسی زبان میں منتقل کیا۔ یہ شخص اسکندریہ میں فرانسیسی قونصل رہ چکا تھا۔ پھر اسی سال سیورڈور یر نے براہِ راست عربی زبان سے فرانسیسی زبان میں قرآن کا ترجمہ کیا۔ اور اس کے بعد اس کو محمد کا قرآن (The Alcoran of Mahomet)کے نام سے انگریزی میں منتقل کیا گیا۔ اس ترجمہ کی اشاعت کا مقصد مترجم کے الفاظ میں’’ان تمام لوگوں کو مطمئن کرنا تھا جو ترکی کے کھو کھلے مذہب(Turkish Vanities)کے جاننے کے خواہش مند تھے۔ لفظMahometخود محمد صلی اللہ علیہ وسلم کی بگڑی ہو ئی صورت ہے۔ آکسفرڈ انگلش ڈکشنری میں اس کی اٹھارہ شکلیں بتائی گئی ہیں۔ اسی طرحMahoundکی سترہ شکلیںMohammadکی پانچMuhammadکو لے کر ایک ہی نام کی 41 مختلف شکلیں ۔(مصنف نے یہاںMaumetکو شمار نہیں کیا جس کی سب سے زیادہ شکلیں آکسفرڈ ڈکشنری میں بتائی گئی ہیں اور ان کو شامل کر نے کے بعد ناموں کی یہ فہرست ستر سے بھی زیادہ تک پہنچ جا تی ہے— مترجم)۔

شکسپیئر سے بہت پہلے جان لڈ گیٹ اس کبوتر کا رنگ تک جانتا تھا۔ اس کے بیان کے مطابق کبوتر کا رنگ دودھیا سفید تھا۔ پھر یہ یقین یہاں تک بڑھا کہ اٹھارہویں صدی کے ایک کبوتروں کے ماہر نے ایک خاص قسم کے کبوتر کا نام مومت (Maumet) رکھ دیا جو دراصل لفظ محمد کی بگڑی ہوئی شکل تھی۔ حالانکہ حقیقت یہ ہے کہ کبوتر عیسائیوں کے یہاں تو روح القدس کی علامت ضرور ہے (لوقا22:3)۔ مگر اسلام میں اس کی کوئی اصل نہیں۔

اسی طرح مومٹ (Maumet)کا لفظ بت کے معنی میں استعمال ہو نے لگا۔ وہ شخص جس نے کعبہ میں سیکڑوں بتوں کو توڑا، جس کے پیرو فخر کرتے ہیں کہ وہی صرف حقیقۃً توحید پرست ہیں اور کسی قسم کے بت یا مورتی کو تسلیم نہیں کرتے ، وہی شخص مغربی من گھڑت كهانيوں میں ایک خدا اور ایک بت بن گیا۔ قرون وسطیٰ کی انگریزی روایات میں مہون(Mahoun)بار بار پرستش کا ایک مظہر قرار دیا گیا ہے۔ یہ مان لیا گیا تھا کہ ترکوں اور مسلمانوں کے یہاں اس کی پو جا ہو تی تھی۔

مومٹ کی طرح قرآن بھی الکرون(Alkaron)کے نام سے مسلمانوں کا ایک بت قرار پایا۔ مغربیوں کو یقین دلایا گیا کہ مسلمان اپنے بتوں کے آگے عبادتی رسوم منعقد کر تے ہیں جن میں لوبان جالایا جاتا ہے اور نرسنگھا پھونکا جاتا ہے۔ اسی طرح سورج(Apollo)ان کا دوسرا دیوتا تھا۔ ایک فرانسیسی مصنف کے بیان کے مطابق 778ء میں شارلی مین کی فوجوں سے مسلمانوں کو’’ شکست‘‘ ہوئی تو انھوں نے اپنا غصہ سورج دیوتا پر نکالا اور اس پر پل پڑے۔ ایلزبتھ کے دور کا ایک اور نامور مصنف فرانسس بیکن(Francis Bacon)محمد کو عطائی (Mountebank) قرار دیتا ہے۔ اس نے اپنے مقالہ ’’ ہمت و استقلال‘‘ (Boldness)میں نقل کیا ہے

’’محمد نے لوگوں کو یقین دلایا کہ وہ ایک پہاڑی کو بلائیں گے اور وہ ان کے پاس چلی آئے گی۔ لوگ جمع ہوئے۔ محمد نے پہاڑی کو اپنے پاس آنے کے لیے کہا۔وہ بار بار پکارتے رہے اور جب پہاڑی اپنی جگہ کھڑی رہی تو وہ ذرا بھی نہیں شرمائے۔ بلکہ انھوں نے کہا— ’’اگر پہاڑی محمد کے پاس نہیں آسکتی تو محمد تو پہاڑی تک جاسکتے ہیں‘‘۔

مگر حقیقت یہ ہے کہ اسلام میں اس واقعہ کی کوئی اصل موجود نہیں ہے۔ تاہم قرون وسطیٰ کے تمام مصنفین نے اس خلاف اسلام انداز کو نہیں اپنایا تھا۔ صلیبی دور کا ایک بشپ ، ولیمآف ٹریپولی (William of Tripoli) ،جس کی پیدائش شام میں ہوئی تھی۔ اس نے 1270میں ایک رسالہ لکھا جس میں اگرچہ محمد کو وہ جھوٹے رسول کی حیثیت سے تسلیم کرتا ہے۔ مگر آپ کے حالات میں دشنام طرازی اور افسانوی حصے کو بہت کم کرکے پیش کیا ہے۔ اسی طرح1679میں ایک انگلش پادری لانس لاٹ اڈیسن(Lancelot Addison)نے ایک کتاب لکھی جس میں اس نے ان من گھڑت اجزاء کو الگ کر نے کی کوشش کی جو محمد کے نام کے ساتھ وابستہ ہو گئے تھے۔ بعض مواقع پر اس نے پہلے کسی واقعہ کو افسانوی تصویر کو نقل کیا ہے اور اس کے بعد تاریخی حقیقت کو بیان کیا ہے۔ اڈیسن کے ایک ہم عصرہمفری پرائیڈکس(Humphrey Prideaux)نے آپ کی مکمل سوانح حیات لکھی جس میں کبوتر کے قصہ کو اور اسی طرح دوسری بہت سی کہانیوں کو یہ کہہ کر رد کردیا کہ ان کو صحیح ماننے کے لیے کوئی واقعی بنیاد موجود نہیں ہے۔ تاہم اس سوانح حیات کا مقصد صرف یہ ثابت کرنا تھا کہ اسلام ایک مکارانہ مذہب(Fraudulent Religion)کا معیاری نمونہ ہے۔ یہ سوانح عمری ایک صدی تک مغربی حلقوں میں مستند سمجھی جاتی تھی۔

زیادہ رواداری کا نقطہ نظر اٹھارہویں صدی میں پیدا ہوا۔ اس زمانہ میں مغرب کے عربی دانوں نے اسلام کے متعلق زیادہ قابل اعتماد ذرائع کا ترجمہ کیا۔ سیاح اور تاجر زیادہ اچھے تاثرات لے کر لوٹے اور سفیروں اور مشنری کے عہدیداروں نے بھی اضافۂ معلومات میں حصہ لیا۔ مثال کے طور پرجارج سینڈیز(George Sandys)جس نے قسطنطنیہ، مصر اور فلسطین کی زیارت کی تھی، وہ 1615ء میں اپنے سفر کی رواداد لکھتے ہوئے مسلمانوں کی بہت سی چیزوں کے ساتھ زکوٰۃ کی تعریف کرتا ہے جو عیسائیوں اور یہودی غرباءکو بھی دی جاتی تھی۔ تاہم زیادہ تر مثالوں میں لوگ ذاتی تحقیق سے زیادہ روایتی معلومات ہی پر اکتفا کرتے رہے۔ حتیٰ کہ متخصصین پروفیسروں تک کا یہ حال تھا کہ پیدائشی طور پر سنی سنائی روایات کو دہرادیا کرتے تھے۔1784 میں پکاک کا جانشین جوزف وائٹ (Joseph White) اپنے مشہور بيمپٹن لکچرز(Bampton Lectures)میں مسیحیت کی حمایت کرتے ہوئے جب اسلام پرآیا تو محمد کے لیے اس کے پاس جو لفظ تھا وہی عام روایتی لفظ تھا یعنی مکار اور فریبی (imposter)۔ اسی طرح بعد کے ممتاز علماء مثلاً ولیم میور(اڈنبرا یونیورسٹی )ڈایسا مارگولیتھ (آکسفرڈ) ہنری لامنز (بیروت یونیورسٹی) کے یہاں بھی قدیم رجحانات کے آثار ملتے ہیں۔

مقالہ نگاروں اور مورخوں کے ہاتھوں میں محمد صلی اللہ علیہ وسلم، قرآن اور اسلام کا معاملہ اس سے بہتر رہا ہے جو پہلے مذہبی علماء ، ناول نگاروں اور شاعروں کے ہاتھوں میں اس کا حشر ہوا تھا۔ اس سلسلے میں پہلا قابل ذکر نام سائمن آکلے(Simon Ockley) کا ہے ، وہ کیمبرج یونیورسٹی میں عربی کا پروفیسر تھا۔ اس نے مسلمانوں کی تاریخ پر دو جلدوں میں ایک کتاب لکھی ہے۔ اگر چہ کیمبرج کا یہ عالم بھی مکار (Imposter)کو محمد کے ہم لفظ کے طور پر استعمال کرتا ہے۔ اور اسلام اور تو ہمات اس کے یہاں مرادف الفاظ ہیں۔ مگر مخصوصتاریخی واقعات کے بیان میں اس نے راست گوئی سے کام لیا ہے۔ شام کی فتح کاحال بتاتے ہوئے، مثال کے طور پر ، وہ بازنطینیوں کی غارت گری اور دغا بازی کا مقابلہ ابو بکر کی شجاعت اور ان کے اعلیٰ رویہ سے کرتا ہے، جن کو خلیفہ کی ہدایت تھی کہ کسی عورت یا بچہ کو قتل نہ کریں ۔ کھجور کے درخت نہ کاٹیں اور نہ کھیت کو نقصان پہنچائیں۔آکلے کی اس کتاب نے مستند درجہ حاصل کیا اور گبن کے ظہور سے پہلے تک وہ عرب تاریخ پر بنیادی ماخذ سمجھی جاتی رہی۔

اڈورڈگبن (Edward Gibbon)جو جدید انگریزی تاریخ کا بانی ہے، اس نے اپنی مشہور کتاب ’’ سلطنت روما کا زوال‘‘ کی پانچویں جلد کے پچاسویں باب کو موضوع کے لیے مخصوص کیا ہے۔ اپنے اعتراف کے مطابق وہ ’’ مشرقی زبانوں سے مکمل طور پر ناواقف‘‘ تھا۔ اس لیے قدرتی طور پر اس کا ماخذ وہی کتابیں تھیں جو اس سے پہلے یورپ میں لکھی گئی تھیں اور اس بنا پراس کی ترجمانی بھی واقعہ کے مطابق نہ ہوسکی۔ تاہم اس نے بہت سی روایات کو غلط قرار دیا مثلاً اس نے کہا کہ مکار نبی کا لقب ایک خطر ناک اور ناقابل اعتبار (Perilous and Slippery)چیز ہے۔

اسلامی کلچر کے بارے میں مغربی علماء کا بدلا ہوا نقطہ نظر جس کا آغاز انگریز اور فرانسیسی پروفیسروں نے کیا تھا اور جرمن اور دوسرے ادیبوں اور شاعروں نے جس کو تقویت دی تھی ، وہ انیسویں صدی کے وسط تک بالکل واضح ہوگیا۔ کار لائل کا محمدصلی اللہ علیہ وسلم کو پیغمبرانہ ہیرو کے کردار کے لیے منتخب کرنا، بیک وقت نئے رجحان کی طرف اشارہ تھا۔ اور اس میں اضافہ کرنے والا بھی تھا۔ کارلائل کی کتاب میں مشکل سے کوئی ناخوشگوار فقرہ ہوگا۔ درحقیقت یہ کتاب اس لیے قابلِ تنقید ہوسکتی ہے کہ وہ غیر تنقیدی ہے۔ ’’ محمد ایک سازشی مکارہیں، وہ جھوٹ کامجسم ہیں۔ ان کا مذہب محض عطائی نسخوں کا مجموعہ ہے‘‘— اس قسم کی باتیں کارلائل کو گوارا نہیں تھیں۔ اس کا ہیرو (محمد) واقعی ایک انسان تھا، سچا انسان۔(۱)