Mughalata angezi.

مغالطہ انگیزی مذہب میں یہ بگاڑ ایک مغالطے کے ذریعے پیدا ہوا؛ مذہب کا تعلق اصلًا انسان کی اپنی زندگی سے ہے، اس لیے مذہب میں زندگی کے تمام پہلوؤں کے بارے میں اصولی تعلیمات موجود ہیں۔ یہ تعلیمات اصلًا ایک آدمی کی اپنی ذات کو مخاطب کرتی ہیں، نہ کہ خارج میں پائے جانے والے پولیٹیکل سسٹم کو۔ مذہب کے پولیٹیکل انٹرپریٹیشن کے لیے ایک طریقہ یہ اختیار کیا گیا کہ جو مذہبی تعلیمات لازم کے صیغے میں تھیں، ان کو متعدی کے صیغے میں ڈھال دیا گیا۔ مثلاً مذہب میں بتایا گیا تھا کہ ہر آدمی کو چاہیے کہ وہ اپنی زندگی میں انصاف کے اصولوں کی پیروی کرے (سورہ الحدید آیت 25)۔

اس ذاتی تعلیم کو بدل کر اس کو سیاسی ٹکراؤ کا موضوع بنا دیا گیا کہ تم لوگ انصاف کا جھنڈا اٹھاؤ، پوری زمین پر بزور انصاف کا نظام قائم کرو۔ اسی طرح یہ تعلیم دی گئی تھی کہ ہر شخص اپنی زندگی میں خدا کے حکموں کی پیروی کرے۔ اس تعلیم کو بدل کر اس کی یہ تشریح کی گئی کہ تم زمین پر خدا کے خلیفہ ہو، اس لیے تمہاری ذمہ داری ہے کہ تم خدا کے نائب بن کر خدا کی زمین پر خدا کا حکم نافذ کرو۔ کتاب "قیامت کا علام" مولانا وحید الدین خان، صفحہ نمبر 39۔