A'ala m'arifat se mahrumi kyun.

اعلیٰ معرفت سے محرومی کیوں؟ قرآن کے مطابق خدا کی اعلیٰ معرفت صرف اس شخص کو ملتی ہے جس کو اللہ سے اعلیٰ تعلق قائم ہو جائے۔ اللہ سے اعلیٰ تعلق کی پہچان یہ ہے کہ انسان کو اللہ سے حبِ شدید—سورہ نمبر 2 آیت 165—اور اللہ سے خوفِ شدید—سورہ نمبر 9 آیت نمبر 18—پیدا ہو جائے۔ جب کسی انسان کو اللہ کے ساتھ اس قسم کا گہرا تعلق حاصل ہو جائے تو اس کے اندر ذکرِ کثیر—سورہ نمبر 33 آیت 41—کی صفت پیدا ہو جاتی ہے۔

یعنی اللہ کو بہت زیادہ یاد کرنا، اللہ کے لیے بہت زیادہ سوچنا، اللہ کے ساتھ تعلق میں اگر 1% بھی کمی آ جائے تو ایسے انسان کو اللہ کی اعلیٰ معرفت حاصل نہیں ہوگی۔ یہود کا حال بعد کے زمانے میں یہ ہوا کہ ان کا گہرا تعلق اللہ سے نہ رہا، بلکہ اپنے احبار اور رہبان سے ہو گیا۔ اس کے نتیجے میں وہ اللہ کی اعلیٰ معرفت سے محروم ہو گئے۔ یہی موجودہ زمانے میں مسلمانوں کا حال ہے۔

مسلمانوں کے ہر گروہ کے کچھ بڑے، یعنی بِگز، ہیں، اور ان کا گہرا تعلق اپنے انہی بڑوں سے ہے، نہ کہ خداوند ذوالجلال سے۔ اپنے ان بڑوں کو انہوں نے مقدس نام دے رکھے ہیں، مثلاً اکابر، اسلاف، مشائخ، بزرگانِ دین وغیرہ۔ مسلمانوں کا حال یہ ہے کہ وہ اپنے انہی مفروضہ بڑوں سے گہرا قلبی تعلق رکھتے ہیں۔ اس گہرے قلبی تعلق کی پہچان یہ ہے کہ وہ اپنے ان بڑوں کے خلاف تنقید کو بالکل پسند نہیں کرتے۔

یہ غیرِ خدا کے ساتھ حبِ شدید کا تعلق قائم کرنا ہے۔ اور جو لوگ کسی غیرِ خدا کے ساتھ حبِ شدید کی نفسیات میں مبتلا ہوں، وہ کبھی اللہ کی اعلیٰ معرفت کی توفیق نہیں پاتے۔ ایسے لوگوں کے حصے میں صرف رسمی عقیدہ آتا ہے، نہ کہ اعلیٰ ایمان باللہ، جو آدمی کو اعلیٰ معرفت تک پہنچانے والا ہو۔ اعلیٰ معرفت کی ایک قیمت ہے، اور یہ قیمت ادا کیے بغیر کسی کو اعلیٰ معرفت حاصل نہیں ہو سکتی۔

کتاب "معرفتِ الٰہی"، مولانا وحید الدین خان، صفحہ نمبر 19۔