Asbaab-e-shukr ko daryaaft kijiye.

اسبابِ شکر کو دریافت کیجیے۔ اگر آپ لذیذ کھانا کھائیں اور اس کو کھا کر "الحمدللہ" کہیں، تو یہ حیوانی درجے کا شکر ہے، کیونکہ یہ مشاہدہ اور ذائقے پر مبنی ہے۔ اور مشاہدہ اور ذائقے کے درجے کا شکر صرف حیوانی درجے کا شکر ہے؛ وہ اعلیٰ انسانی درجے کا شکر نہیں۔ انسان کے درجے کا شکر یہ ہے کہ جب کھانا آپ کے سامنے آئے تو اس کو دیکھ کر خدا کا پورا تخلیقی نظام آپ کو یاد آ جائے۔

آپ سوچیں کہ یہ تمام غذائی چیزیں پہلے غیر غذائی چیزیں تھیں۔ خدا نے ایک برتر عمل، یعنی پروسیس کے ذریعے، ایک عظیم واقعہ برپا کیا، وہ تھا غیر غذا یعنی نان فوڈ کو غذا یعنی فوڈ میں تبدیل کرنا۔ اس طرح ایک کائناتی عمل کے ذریعے یہ تمام غذائی چیزیں وجود میں آئیں۔ پھر آپ یہ سوچیں کہ یہ غذائی چیزیں اپنی ابتدائی صورت میں میرے لیے توانائی یعنی انرجی کا ذریعہ نہیں ہو سکتی تھیں۔

چنانچہ خدا نے مزید یہ کیا کہ اس نے میرے جسم کے اندر ایک پیچیدہ قسم کا نظامِ ہضم یعنی ڈائجسٹو سسٹم رکھ دیا۔ یہ نظامِ ہضم ایک خودکار نظام ہے۔ جب میں کوئی چیز کھاتا ہوں تو یہ نظامِ ہضم ان غذائی چیزوں کو حیرت انگیز طور پر زندہ خلیات یعنی لیونگ سیلز میں تبدیل کر دیتا ہے۔ پھر یہ زندہ خلیات میرے جسم میں گوشت اور خون جیسی چیزوں میں ڈھل جاتے ہیں۔

یہ سوچ کر آپ کے اندر شکر کا ایسا احساس امڈے، جس کو الفاظ میں ظاہر کرنے کے لیے آپ اپنے آپ کو عاجز پاتے ہوں۔ اس مثال سے اندازہ ہوتا ہے کہ انسانی شکر کیا ہے اور حیوانی شکر کیا۔ اگر آپ کے اندر صرف حیوانی درجے کا شکر ہے تو آپ ہمیشہ ناشکری کے احساس میں جیئیں گے۔ شکر کے اعلیٰ احساس میں جینے کے لیے انسانی درجے کا جذبۂ شکر درکار ہے۔

مگر یہی وہ چیز ہے جو دنیا میں سب سے زیادہ کم پائی جاتی ہے۔ وَقَلِيلٌ مِّنْ عِبَادِيَ الشَّكُورُ انسان سے اللہ تعالیٰ کو جو شکر مطلوب ہے، وہ انسانی درجے کا شکر ہے۔ صرف حیوانی درجے کا شکر انسان جیسی مخلوق سے قابلِ قبول نہیں ہو سکتا۔ کتابِ معرفت، مولانا وحید الدین خان، صفحہ نمبر 316۔