Kitab-e-tilawat,ya kitab-e-itaat.

کتابِ تلاوت یا کتابِ اطاعت؟ مسٹر اے اور مسٹر بی کے درمیان ایک جائیداد، یعنی پراپرٹی، کو لے کر نزاع ہوئی۔ دونوں کا دعویٰ تھا کہ جائیداد میری ہے۔ دونوں مسلمان تھے۔

مسٹر اے نے مسٹر بی سے کہا کہ اگر آپ قرآن کو ہاتھ میں لے کر کہہ دیں کہ یہ جائیداد میری ہے، تو میں اپنا دعویٰ واپس لے لوں گا اور جائیداد پر آپ کا حق تسلیم کر لوں گا۔ مسٹر بی نے کہا، "اس معاملے کا قرآن سے کیا تعلق؟ " مسٹر بی ایک مسلمان شخص تھے۔ پھر انہوں نے ایسا کیوں کہا؟

اس کا سبب یہ ہے کہ موجودہ زمانے کے مسلمان خدا کی کتاب کو وہی درجہ دے چکے ہیں جس کو قرآن میں کتابِ مہجور، سورہ نمبر 25، آیت 30 کہا گیا ہے۔ حقیقت یہ ہے کہ موجودہ زمانے کے مسلمانوں کے لیے قرآن برائے تلاوت کتاب بن گیا ہے۔ نہ کہ برائے اطاعتِ کتاب۔ یہ ذہن موجودہ زمانے کے مسلمانوں میں عام ہو چکا ہے۔

مذکورہ واقعہ اسی ذہن کی ایک مثال ہے۔ بہت سے لوگ جو اسلام کے نام پر ادارے یا تحریکیں چلا رہے ہیں، میں نے ان سے پوچھا کہ کیا آپ نے اپنا کام شروع کرنے سے پہلے قرآن کو بار بار اس نظر سے پڑھا تھا کہ قرآن کے مطابق میرے لیے کرنے کا کام کیا ہے؟ مگر غالباً کسی نے بھی یہ جواب نہیں دیا کہ ہاں، میں نے قرآن کو بار بار اس نظریے سے، اس نظر سے پڑھا۔ اور پھر قرآن سے مجھ کو جو روشنی ملی، اس کے مطابق میں نے اپنا یہ کام شروع کیا۔

ایسے لوگ بہت ملیں گے جو قرآن کی تفسیر پڑھیں گے یا عربی زبان سیکھنے کی کوشش کریں گے، تاکہ وہ قرآن کو براہِ راست سمجھ سکیں۔ لیکن ایسا کوئی شخص مشکل سے ملے گا جو قرآن کو اپنے قول و عمل کے لیے ایک رہنما کتاب، یعنی گائیڈ بک، بنائے ہوئے ہو۔ یہی موجودہ زمانے کے مسلمانوں کی سب سے بڑی کوتاہی ہے۔ مسلمان جب تک قرآن کو اپنے لیے رہنما کتاب نہیں بنائیں گے، ان کا کوئی معاملہ درست ہونے والا نہیں۔

کتابِ معرفت، مولانا وحید الدین خان، صفحہ نمبر 285۔