Izaafa-e-imaan

اضافۂ ایمان: سورج ہماری زمین سے 930000000 میل دور ہے۔ سورج ہماری زمین سے 130000 گنا بڑا ہے۔ سورج زمین کی مانند ٹھوس نہیں ہے، بلکہ وہ پورا کا پورا ایک عظیم دہکتا ہوا شعلہ ہے۔ اس کی گرمی 11000 ڈگری فارنہائٹ ہے۔

یہ گرمی اتنی زیادہ ہے کہ سخت ترین مادہ بھی اس میں پگھلے بغیر نہیں رہ سکتا۔ زمین اگر اس کے قریب کی جائے تو وہ 1 سیکنڈ سے بھی کم عرصے میں پگھل کر گیس بن جائے گی۔ سورج کیسے چمکتا ہے، اور کیسے اتنی بڑی مقدار میں وہ روشنی اور گرمی دے رہا ہے؟ قدیم خیال یہ تھا کہ سورج مسلسل جل رہا ہے، جیسے کوئی لکڑی یا کوئلہ جلتا ہے۔

مگر جب فلکیاتی تحقیق سے معلوم ہوا کہ وہ ہزاروں ملین سال سے اسی طرح روشن ہے، تو یہ خیال غلط ثابت ہو گیا۔ سورج میں اگر کوئی مادہ جل رہا ہوتا تو اب تک سورج بجھ چکا ہوتا، کیونکہ کوئی چیز اتنی زیادہ لمبی مدت تک جلتی ہوئی حالت میں نہیں رہ سکتی۔ اب سائنسدانوں کا نظریہ یہ ہے کہ سورج کی گرمی اسی قسم کے ایک عمل، یعنی پروسیس، کا نتیجہ ہے جو ایٹم بم کے اندر وقوع میں آتا ہے۔ یعنی سورج مادے کو توانائی میں تبدیل کرتا ہے۔

یہ عمل جلنے سے مختلف ہے۔ جلنا مادے کو ایک صورت سے دوسری صورت میں تبدیل کرتا ہے، مگر جب مادے کو توانائی میں بدلا جائے تو بہت زیادہ توانائی صرف تھوڑے سے مادے کے ذریعے حاصل کی جا سکتی ہے۔ مادے کا ایک انس اتنی زیادہ توانائی پیدا کر سکتا ہے جو 1 ملین ٹن سے زیادہ چٹان کو پگھلا دے۔ The sun changes matter into energy; this is different from burning.

Burning changes matter from one from to another. But when matter is changed into energy, very little matter is needed to produce a tremendous amount of energy. One ounce of matter could produce enough energy to melt more than a million tons of rock. کائنات میں اس قسم کی ان گنت نشانیاں پائی جاتی ہیں۔

یہ نشانیاں بتاتی ہیں کہ کائنات کے پیچھے ایک عظیم خالق کی ہستی کام کر رہی ہے۔ عظیم خالق کے بغیر کبھی اس قسم کی عظیم تخلیق ظہور میں نہیں آ سکتی۔ قرآن میں بار بار کائناتی نشانیوں پر غور کرنے کے لیے کہا گیا ہے۔ یہ غور و فکر ایک خالص دینی عمل ہے۔

وہ مومن کے ایمان میں غیر معمولی اضافے کا سبب بنتا ہے۔ وہ مومن کے یقین کو بے پناہ حد تک بڑھا دیتا ہے۔ کتاب معرفت، مولانا وحید الدین خان، صفحہ نمبر 257۔