Marifat ka istehqaaq.

معرفت کا استحقاق ایک حدیثِ قدسی ان الفاظ میں آئی ہے: "الكبرياء رداء، والعظمة إزار"، فمن نازعني واحدًا منهما فقذفته في النار. سنن ابی داؤد، رقم الحدیث 4090۔ یعنی اللہ نے فرمایا کہ کبریائی میری چادر ہے اور عظمت میرا ایزار ہے؛ ان دونوں میں سے کسی کے معاملے میں جو شخص مجھ سے نزاع کرے گا، میں اس کو آگ میں پھینک دوں گا۔ اس حدیثِ قدسی سے تواضع یعنی modesty کی اہمیت معلوم ہوتی ہے۔

حقیقت یہ ہے کہ خدا کے ساتھ انسان کی نسبت صرف حقیقی تواضع کی سطح پر قائم ہوتی ہے۔ انسان کے اندر اگر ایک ذرے کے برابر بھی اپنی بڑائی کا احساس پایا جائے تو خدا سے اس کی نسبت ہی نہیں قائم ہوگی۔ اور جس آدمی کی نسبت خدا سے قائم نہ ہو، اس کا حال یہ ہوگا کہ وہ معرفت کا لفظ بولے گا لیکن وہ معرفت سے کلی طور پر بے خبر رہے گا۔ حقیقی تواضع کی پہچان یہ ہے کہ آدمی کا حال یہ ہو جائے کہ تعریف اس کو خوش نہ کرے اور تنقید سے اس کو ناگواری نہ ہو۔

جس آدمی کے اندر حقیقی تواضع نہ ہو، وہ شعوری یا غیر شعوری طور پر اس احساس میں مبتلا رہتا ہے کہ میں بھی کچھ ہوں۔ اس قسم کا احساس اس کے لیے خدا سے تعلق قائم کرنے میں حتمی رکاوٹ بن جاتا ہے۔ اس کی مثال یہ ہے کہ سوکھی ہوئی زمین میں پانی ڈالا جائے تو وہ اس کو پوری طرح جذب یعنی absorb کر لے گی۔ اس کے برعکس گیلی زمین پانی کا ایک قطرہ بھی جذب نہیں کرے گی۔

متواضع انسان یعنی modest man اس قابل ہوتا ہے کہ وہ خدا کی طرف سے آنے والے معرفت کے فیضان یعنی inspiration کو پوری طرح قبول کرے۔ اس کے برعکس جس آدمی کے اندر کامل تواضع نہ ہو، اس کا حال یہ ہو جائے گا کہ وہ معرفت کے فیضان کو قبول کرنے کے لیے اس کا آخذ یعنی recipient نہ رہے گا۔ وہ بارش، وہ معرفت کی بارش کے ماحول میں بھی معرفت سے محروم رہے گا۔ کتاب معرفت، مولانا وحید الدین خان، صفحہ نمبر 58۔