Ghar ka intezaam

گھر کا انتظام۔ قرآن میں عورتوں کو خطاب کرتے ہوئے کہا گیا ہے کہ وَقَرْنَ فِي بُيُوتِكُنَّ سورہ نمبر 33، آیت 33۔ یعنی: "اور تم اپنے گھر میں قرار سے رہو"۔ مفسرین نے اس کی تشریح "الزمن بيوتكن" یا "أُمِرَ بالقرار في البيوت" کے الفاظ سے کی ہے، یعنی اپنے گھروں میں ٹھہرو، اپنے گھروں کو اپنا دائرۂ عمل بناؤ۔

موجودہ زمانے میں عورت بیرونی نمائش کا ایک سامان بن کر رہ گئی ہے؛ اسلام کا نقشہ اس کے مقابلے میں یہ ہے کہ عورت گھر کے اندر رہے، اور داخلی ذمہ داریوں کو سنبھالے۔ گھر کا انتظام، افرادِ خاندان کی خانگی ضروریات، امورِ خانہ داری کا بندوبست، بچوں کی دیکھ بھال—یہ سب عورت کی ذمہ داری ہے، اور یہ سب "وَقَرْنَ فِي بُيُوتِكُنَّ" میں شامل ہے۔ گھر کو سنبھالنا، چھوٹے پیمانے پر ایک ریاست کو سنبھالنا ہے؛ یہ اتنا ہی اہم اور معزز کام ہے جتنا ملکی ریاست کا کام ہو سکتا ہے۔ عورت کو چاہیے کہ وہ گھر کے معاملات کا انتظام ایک باعزت ذمہ داری کے طور پر کرے۔

گھر کو معیاری گھر بنانے میں وہ اپنی پوری صلاحیت وقف کر دے۔ وہ گھر کے باغ کی مالی بن جائے۔ یہی مطلب ہے اس حدیث کا جس میں رسول اللہ صلی اللہ علیہ وسلم نے فرمایا: المرأة في بيت زوجها راعيةٌ وهي مسؤولةٌ عن رعيتها ۔ صحیح البخاری، حدیث نمبر 5188۔

صحیح مسلم، حدیث نمبر 1829۔ یعنی: عورت اپنے شوہر کے گھر کی نگراں ہے، اور وہ اس کی جواب دہ ہے۔ گھر، گھرِ ہستی، یا امورِ خانہ داری کی مہارت—یہ عورت کا سب سے بڑا زیور ہے۔ جو مسلم عورت اس زیور سے مزین ہو، وہی کامل عورت ہے۔

جو عورت اس امتحان میں پوری اترے، وہی اللہ کے یہاں عزت اور کامیابی کی مستحق قرار دی جائے گی۔ جو عورت دنیا میں ایک مکان کو آباد کرے، وہی جنت کے زیادہ اعلیٰ مکان میں آبادکاری کے لیے منتخب کی جائے گی۔ کتاب "خاتونِ اسلام"، مولانا وحید الدین خان، صفحہ نمبر 276۔