Mansuba band amal

منصوبہ بن عمل: قرآن کی سورہ نمبر 46 میں ارشاد ہوا ہے: "پس تم صبر کرو جس طرح ہمت والے پیغمبروں نے صبر کیا"۔ اور ان کے لیے جلدی نہ کرو۔ فَاصْبِرْ كَمَا صَبَرَ أُولُو الْعَزْمِ مِنَ الرُّسُلِ وَلَا تَسْتَعْجِلْ لَهُمْ. الاحقاف 35: زندگی مشکلات اور مسائل کے درمیان جینے کا نام ہے، خاص طور پر جو آدمی کوئی مقصد یا مشن لے کر اٹھے، اس کے لیے تو قدم قدم پر رکاوٹیں اور مخالفتیں پیش آتی ہیں۔

اس کو طوفانوں کے درمیان اپنا سفر طے کرنا ہوتا ہے۔ ایسی حالت میں زندگی کے دو طریقے ہیں: ایک یہ کہ جب کوئی مخالف صورتحال سامنے آئے تو فوری ردعمل کے تحت اس کے خلاف کارروائی شروع کر دی جائے۔ دوسری صورت یہ ہے کہ مخالف صورتحال پیش آنے کے بعد آدمی اپنے جذبات کو تھامے، وہ پورے معاملے پر ٹھنڈے ذہن کے ساتھ غور و فکر کرے۔ اسی کے ساتھ وہ صاحبِ مشورہ لوگوں سے مشورہ بھی کرے۔

اس کے بعد سوچے سمجھے فیصلے کے مطابق جوابی کارروائی کرے۔ پہلے طریقے کا نام عجلت ہے، اور دوسرے طریقے کا نام صبر۔ عجلت کے تحت کیا ہوا اقدام ہمیشہ ناکام ہوتا ہے۔ اس کی وجہ یہ ہے کہ ایسے اقدام میں صورتحال کا پورا جائزہ شامل نہیں ہوتا۔

ایسا آدمی نہ اپنی طاقت کا صحیح اندازہ کرتا ہے اور نہ فریقِ ثانی کی طاقت کا۔ وہ نتیجے کی پرواہ کیے بغیر فوری طور پر مقابلے کے میدان میں کود پڑتا ہے۔ اور یہ فطرت کا قانون ہے کہ اسباب کا لحاظ کیے بغیر اس دنیا میں جو اقدام کیا جائے، وہ کبھی کامیابی کے درجے تک نہ پہنچے۔ صبر کا معاملہ اس سے بالکل مختلف ہے۔

جو آدمی صبر کا طریقہ اختیار کرے، وہ کارروائی سے پہلے اس کے انجام کو سوچتا ہے۔ وہ جذبات کی رعایت کرنے کے بجائے حقیقت کی رعایت کرتا ہے۔ وہ جانتا ہے کہ وہ ایک ایسی دنیا میں ہے جہاں فطرت کے خانون کی حکمرانی ہے، نہ کہ اس کی اپنی خواہشوں اور تمناؤں کی۔ صبر یہ ہے کہ آدمی جذبات سے اوپر اٹھ کر حقیقت کو دیکھے۔

وہ ذاتی خواہشوں سے غیر متاثر رہ کر فطرت کے نظام کو سمجھے۔ صبر آدمی کو اس قابل بناتا ہے کہ وہ منصوبہ بن عمل کر سکے۔ اور اس دنیا میں کامیاب عمل وہی ہے جو منصوبہ بندی کے ساتھ انجام دیا گیا ہو۔ اسلامک تعارف: مولانا وحید الدین خان، صفحہ نمبر 250۔