Naqaabil-e-mu'aafi jurm

ناقابلِ معافی جرم! سنن ابی داؤد میں یہ روایت ہے کہ رسول اللہ صلی اللہ علیہ وسلم نے کہا کہ خدا نے فرمایا: "کبر میری چادر ہے، اور عظمت میری ایزار ہے"۔ پس ان دونوں میں سے کسی میں جو شخص مجھ سے نزاع کرے گا، میں اس کو آگ میں پھینک دوں گا۔ الْكِبْرِيَاءُ رِدَاءِي وَالْعَظْمَةُ إِزَارِي فَمَن نَازَعَنِي وَاحِدًا مِنْهُمَا قَذَفْتُهُ فِي النَّارِ کتاب اللباس، جلد 4، صفحہ 58۔

اس حدیث میں تمثیل کی زبان میں یہ بتایا گیا ہے کہ ہر قسم کی بڑائی اور ہر قسم کی برتری صرف ایک خدا کا حق ہے۔ جو شخص اس معاملے میں کلی یا جزئی طور پر خدا کا ہمسر بننا چاہے، وہ نہ صرف دنیا میں ذلیل ہوگا بلکہ آخرت میں اس کو شدید تر عذاب کا سامنا کرنا پڑے گا۔ مثال کے طور پر، خدا کی عظمت و کبریائی کا ایک پہلو یہ ہے کہ وہی عزت دینے والا ہے اور وہی ذلت دینے والا۔ وہی کسی کو رزق دیتا ہے اور کسی کو رزق سے محروم کر دیتا ہے۔

اس کے سوا کسی کو یہ طاقت نہیں کہ کسی کو کچھ دے یا اس سے کوئی چیز چھین لے۔ مثلاً ایک شخص کو کسی آدمی پر غصہ آ گیا، یہ غصہ انتقام تک پہنچ گیا، یہاں تک کہ وہ اس کے درپے ہو گیا کہ مذکورہ آدمی کو بے عزت کرے۔ اس کے رزق کا ذریعہ اس سے چھین لے، وہ اس کو اس کے ماحول میں بے جگہ بنا دے۔ کسی شخص کی طرف سے اس قسم کی تخریبی کوشش خدا کی عظمت و کبریائی سے گویا نزاع کرنا ہے۔

یہ نعوذ باللہ خدا کے اختیارات کو اس سے چھیننے کی جسارت کرنا ہے۔ اس قسم کا فعل حد درجہ سنگین ہے۔ جو شخص ایسا کرنے کی کوشش کرے، وہ بظاہر اپنے حریف کے ساتھ یہ فعل کر رہا ہوتا ہے، مگر حدیث کی زبان میں وہ براہِ راست خدا سے نزاع کر رہا ہے۔ وہ خدا کے اس نظام میں دخل دینے کی کوشش کر رہا ہے جس میں خدا نے کسی دوسرے کو شریک نہیں کیا۔

یہ اپنی نوعیت کے اعتبار سے خدا کی خدائی میں شریک ہونے کی کوشش کرنا ہے، اور خدا کی خدائی میں شریک بننے کی کوشش بلاشبہ ایک ایسا جرم ہے جو ہرگز قابلِ معافی نہیں۔ انسان کی بڑائی کبر میں نہیں ہے بلکہ تواضع میں ہے۔ انسانیت کی تمام ترقیاں متواضع انسان کے لیے مقدر ہیں، نہ کہ متکبر انسان کے لیے۔ اسلامک تعارف: مولانا وحید الدین خان، صفحہ نمبر 199۔