سیئات، حسنات

قرآن کی اِس آیت میں جو بات کہی گئی ہے، وہ یہ نہیں ہے کہ اللہ اُن کے سیئات کو معاف کردے گا- اِس کے برعکس، یہ فرمایا کہ اللہ اُن کے سیئات کو بدل کر اُن کو حسنات میں تبدیل کردے گا- یہ ایک بے حد قابلِ غور بات ہے کہ ایسا کیوں کر ہوتا ہے کہ خود سیئات بدل کر حسنات بن جائیں-

قرآن کی اِس آیت میں دراصل ایک نفسیاتی قانون کو بتایا گیاہے- انسان جب ایک غلطی کرے اور اس کے بعد اس کے اندر شدت کے ساتھ یہ احساس جاگ اٹھے کہ میں نے ایک غلطی کردی، تویہ کوئی سادہ بات نہیں ہوتی- اِس کے بعد اس کے اندر فطری طورپر شرمندگی (repentance)کا احساس پیدا ہوجاتا ہے- یہ احساس اُس کے لیے ایک ذہنی بھونچال کا کام کرتاہے- اِس کے بعد شدت کے ساتھ اس کے اندر محاسبہ (introspection)کی سوچ پیدا ہوجاتی ہے- وہ شدید طورپر اپنی اصلاح کے لیے متحرک ہوجاتا ہے- اس کے اندر ایک نئے قسم کی ذہنی بیداری (intellectual awakening) پیدا ہوجاتی ہے- یہ ذہنی بیداری اس کی پوری شخصیت میں ایک مثبت انقلاب کا باعث بن جاتی ہے- وہ پہلے سے زیادہ شدت کے ساتھ اپنی اصلاح کے کام میں مشغول ہوجاتا ہے، اِس طرح اس کے اندر ایک نئی شخصیت ایمرج (emerge) کرتی ہے- یہ فطرت کا ایک قانون ہے- جس آدمی کی فطرت زندہ ہو، اُس کا وہی حال ہوتا ہے جس کا ذکر اوپر کیا گیا- ایسے انسان کاحال یہ ہوتا ہے کہ غلطی کا احساس اُس کے اندر ایک نیا پراسس جاری کردتیا ہے- یہ اِسی فطری پراسس کی تکمیل ہے جس کو قرآن کی مذکورہ آیت میں بیان کیاگیاہے-