تزکیہ اور تواضع

فصل کے لیے موافق زمین درکار ہے۔ فصل ہمیشہ زرخیز زمین پر اگتی ہے، بنجر زمین پر کبھی فصل نہیں اگتی۔ اسی طرح تزکیے کے لیے بھی موافق زمین درکار ہے؛ تواضع یعنی modesty تزکیے کے لیے موافق زمین ہے۔ جس آدمی کے اندر تواضع کی صفت ہوگی، اس کے لیے تزکیے کا حصول آسان ہو جائے گا۔

اس کے برعکس کبر یعنی arrogance تزکیے کے لیے ایک غیر موافق زمین ہے۔ جس آدمی کے اندر کبر کا مزاج ہو، وہ کبھی تزکیے کے مقام تک نہیں پہنچ سکتا۔ اس کا سبب یہ ہے کہ تواضع یعنی modesty سے آدمی کے اندر کمی کا احساس پیدا ہوتا ہے۔ متواضع انسان کی نفسیات یہ ہوتی ہے کہ مجھے کچھ اور پانا ہے جو میرے اندر نہیں ہے۔

اس احساس کا نتیجہ یہ ہوتا ہے کہ اس کے سامنے جب سچائی آتی ہے تو وہ کسی تحفظِ ذہنی یعنی reservation کے بغیر اس کی طرف دوڑ پڑتا ہے۔ وہ بے لاگ انداز میں اس کا جائزہ لیتا ہے۔ وہ بہت جلد دریافت کر لیتا ہے کہ سچائی اس کے لیے اس کی کمی کی تلافی ہے۔ وہ سچائی کو خود اپنی چیز سمجھ کر اس کو قبول کر لیتا ہے۔

یہی صفت تزکیے کی روح ہے۔ اس کے برعکس معاملہ متکبر انسان کا ہے۔ متکبر انسان کی نفسیات یہ ہوتی ہے کہ میرے پاس پہلے ہی سے سب کچھ موجود ہے، مجھے کسی سے کچھ اور لینے کی ضرورت نہیں۔ اس نفسیات کی بنا پر وہ باہر کی کسی چیز کو لینے کے لیے تیار نہیں ہوتا۔

وہ مصلح کی بات کو آسانی کے ساتھ رد کر دیتا ہے۔ اس کا یہ مزاج اس کے لیے تزکیے کے حصول میں رکاوٹ بن جاتا ہے۔ حقیقت یہ ہے کہ تزکیہ ایک مسلسل عمل ہے۔ تزکیے کا یہ عمل صرف اس شخص کے اندر جاری ہوتا ہے جو تواضع کا مزاج رکھتا ہو۔

تواضع کا مزاج آدمی کے اندر قبولیت کا مزاج پیدا کرتا ہے۔ ایسا آدمی نفسیاتی پیچیدگی یعنی complex سے آزاد ہوگا۔ اور جو آدمی نفسیاتی پیچیدگی سے آزاد ہو، وہی تزکیے کے درجے تک پہنچنے میں کامیابی حاصل کرتا ہے۔